ممكن ترجمة

عن جريدة الدستور ..8 أكتوبر 2010

أكد د/ عثمان محمد عثمان وزير التنمية الإقتصادية !!!!!!!!
إن موجة التضخم التي تجتاح الأسواق في الفترة الأخيرة وخاصة أسعار الخضروات والفاكهة والدواجن واللحوم تعود لأسباب مؤقته وموسمية أو نتيجة تغير في الطقس أو ثقافة سائدة !!!!!!!!!!!!:)
ونفى أن تكون لأسباب هيكلية في الإقتصاد الذي تمكن من تجاوز الأزمة العالمية الإقتصادية وعاد إلى مستويات نمو معقولة تصل إلى 5.7فى المائة خلال الربع الأول من العام المالي الحالي وعلى خلفية التطور الذي حدث خلال الربع الأخير من العام المالي الماضي مقارنة بدول مناظرة فى العالم النامي


ده جزء من المقال بس من غير ترجمة .. ممكن حد يترجم علشان مش فاهمة
أية علاقة المفاهيم السائدة بالتغير في الطقس بالدول النامية المناظرة

مش فاهمة
يعني أية مفاهيم سائدة في المجتمع وإحنا بنصرف ملايين على أبطال المسلسلات والأفلام
وملايين على الكورة ولعيبة الكورة
وملايين تانية على المطربين والراقصات
مفيش مشكلة نرفه عن الشعب بالمسلسلات والكورة والرقص والغنى بس لازم ياكلو الأول علشان يعرفو يركزو مع المسلسلات ويلاقو أعصاب يتابعوا بيها الكورة
يعني أيه بلد زراعي عنده ازمة قمح ورز وطماطم وخضار أمال كنا بنزرع ايه السنادي
ما علاقة المحاصيل بأزمة الاقتصاد العالمية؟؟!!! ..

حلة طبيخ جاهزة

وبحب الناس الرايقه اللى بتضحك علطول .. أما العالم المتضايقه أنا لأ مليش فى دول
ومليش فى الدمع لالا .. ولا فى الناس الشياله كل اللى في قلبه حاجه أول بأول يقول

عايزه كل واحد قبل ما يقرا البوست يعلق إجبارى ويحكيلى أيام طفولته الناس كانت عامله أيه .. يحكيلى الناس كانت عامله ازاى مع بعض بس بأمانه يحكيلى هل كانت ايام حلوة ولا أيام كئيبه زى اليومين دول .. وياريت يكون أكثر أمانه ويقولى هل هو بيوفر نفس الجو الحلو ده لأولاده ولا دايما ضارب بوز ومستنى معجزة تيجى تغير حياته
وياريت بقى يفهمنى علشان أنا علامى على قده
هل مثلا إحنا أحوالنا المادية والاقتصادية و الصحية والانسانيه أسوأ من حال أهالينا لما كانوا فى سننا ..
هل مثلا هم كانوا بيروحوا أشغالهم فى طيرات خاصة ماركة شرق الدلتا
ولا مثلا كانوا بيتغدوا فى هيلتون ويتعشوا فى الميريديان
وهل مثلا البلاوى والفساد اللى كانوا شايفينه ايامها أقل من اللى احنا فيه.
والدتى وهى فى سنى وهى ست متعلمه وموظفه محترمه وزوجه لوالدى اللى هو باش مهندس قد الدنيا ووارث كمان كانت بتعمل حساب تمن المواصلات اللى هتزور فيها أهلها ومع ذلك بتحكى عن مغامرتها فى هذه الفترة بمنتهى السعاده
أما والدى واللى كان ظابط فى الجيش فى الفترة من سنة1968 إلى 1974 وكان من الناس اللى لبسوا فى الحيطه وفضلوا فى الجيش 6 سنين أو أكتر و طبعا مبدأش حياته غير لما خرج من الجيش واشتغل يعنى ضيع من عمره حوالى عشر سنين بسبب التحاقه بالخدمه العسكرية ورغم ذلك بيتكلم عن هذه الفترة بمنتهى الحب وبحس وشه بينور لما بيفتكر ذكريات الفترة الهباب دى ...
والدمويه بترد فى وشه لما مثلا يحكيلنا عن رجليه اللى كانت هتطير لما مشى فى حقل ألغام من غير ماياخد بالة زى ما يكون بيحكى موقف كوميدى مثلا ..
ولا لما يفضل يضحك ساعه قبل ما يحيكيلنا لما كان بايت فى الوحده لوحدوهو والعسكرى وسمع أصوات وحركات ( عفاريت يعنى .. عفاريت بجد مش هزار) ..
العسكرى اللى كان معاه ميت من الرعب ووالدى بيهزأه وبيبهدله علشان خايف زى العيال ..مع أن والدى بيقول انه كان مرعوب أكتر منه ورجليه بتخبط فى بعضها ومن كتر ما نص كلامه وذكرياته عن الفترة دى بحس انه عاش عمره كله فى الجيش
حد يرد عليه هل الفساد والقرف اللى فى بلدنا أقل من اللى كان موجود فى فترة الانفتاح .. حد يفهمنى يا جماعه هل الناس من تلاتين سنة مثلا كانوا عايشين فى مصر تانيه غير اللى احنا فيها .. مصر مثاليه .. هل الحاله الاقتصاديه وقتها كانت فله وتمام ولا الناس دى كان عندها مشاكل ووجع قلب أكتر من اللى احنا فيه الف مرة .. هل الانسان المصرى ساعتها كان عايش فى هنا ونعيم
طيب ليه الناس دى كانت بتحب نفسها وبتحب بعضها وبتحب ولادها .. ليه الناس دى عمرنا ماسمعناها بتشتكى من الهوا زىنا ولا عمرنا سمعناها بتتكلم عن جيرانها سواء مسلمين او مسيحين غير بكل خير ..
ليه أيامها كانت اى سهرة متسمعش فيها غير أصوات الضحك اللى جايب أخر الشارع .. !!!
ليه أيامها كانت كل ست بيت سواء كانت موظفه أو لأ دايما لازم تسيب حلة طبيخ جاهزة فى التلاجه علشان لو أى ضيف جه فجأه .. لأن وقتها مكانش ينفع ضيف يجى بيتك من غير ماياكل
ليه أيامها كان كل بيت رغم الفقر والشقق اللى كانت قد علبة السمنه بتاعة روابى اللى بفتحة سقف كان فيها سرير او اتنين زياده أو على الاقل سرير كبير غير بتاع الاطفال علشان لو فى حد هيبات أصل كان لازم كل أجازة يكون فى حد هيبات ..
ليه زمان كان كل يوم عندنا ضيف ولازم كل يوم نرجع من المدرسة نلاقى حد فى البيت .. ان شالله خالتى سنيه االرغاية جارتنا ..
ارجوكوا يا جماعه سيبكم من حكومتنا المباركه النظيفه الرشيده الغاليه .. وصحصحوا معايا وردوا عليه فى ايه احنا مالنا ؟! ليه كل كمية النكد الغير طبيعيه دى ليه بقينا دايما مأجلين حياتنا لسبب ما .. ليه دايما بنشتكى وعجبتنا اللعبه واستحلينا دور الضحيه

كيف تخسر صديق .. دون أن تشعر بضيق

1_ كن سئ الظن ( على أساس أنك فهلوى وفاهم كل حاجه و بنظرة عين تعرف اللى قدامك بيفكر فى أيه )

2_ تصيد الأخطاء ولا تقبل الخلاف فى وجهات النظر ( وخليك ماشى بطريقة بوش اللى مش معانا يبقى علينا
وطبعا أنت عارف أيه اللى حصل لبوش فى الأخر .. وتمسك بفكرة أن الاختلاف يفسد الود والقضيه وكل حاجه)

3_ ذكره دائما بما تفعله من أجله حتى ولو كان حقيرا ولا يستحق الذكر ( أحسن ينسى أفضالك عليه وكرم أخلاقك عليه
وبعدين دا انت لولاك عليه كان زمانه لسه بيستعمل مناديل فلورا لحد دلوقتى )

4 _ كن مستمعا سيئا ( يعنى متدهيوش فرصه يفضفض معاك بكلمتين أبدا كل ما يجى يحكى عن حاجه القط أول كلمه فى الحوار
وأفضل أحكي عن نفسك وعن أمجادك فى مثل هذه المواقف مش زى حالاته مش عارف يتصرف ومتفوتش الفرصه بالمره
وأحكيله عن كل أصحابك التانين اللى مبيقدروش يتصرفوا من غير حكمتك و وفهمه بقه أن الحياه كلها مصاعب وأنه لازم يتحمل
شويه مش معقول أول متقابله مشكله يزن ويقرفنا كده مش قصه هى )

5_ الشكوى المستمره ( يعنى كل ما تشوف وشه أو تسمع صوته مترحموش أشتكى من الكهربا المقطوعه والنت اللى فاصل
الحر اللى يخنق والاسعار المولعه العيشه السوده والبلد اللى باظت وافلام رشدى أباظه اللى بيعرضوها ليل نهار
يعنى هم الاصحاب اتعملوا ليه علشان نخنقهم ونكد عليهم طبعا وده على أساس أنك مسمعتش قبل كده احاديث الرسول
صلى الله عليه وسلم ( بشروا ولا تنفروا ) .. ( تبسمك فى وجه أخيك صدقه )
وطبعا معندكش أى فكره عن علم النفس اللى بيقول أن المزاج أو الحاله النفسيه مرض معدى بتتنقل بالرغى أو البوز الطويل

6_ إذاعة سره ( معلش حقك برضه أصله صعبان عليك ومقطع فى قلبك ومش قادر تمسك نفسك من الزعل
لو متكلمتش مع حد هتفرقع من الزعل .. معلش حقك برضو ذيع ذيع ولا يهمك وأكشف ستره وسيحله
مش مشكله وبعدين أنت حكيت لمين يعنى ده للجيران ولخاله سعديه الرغايه ولأصحابك فى الشغل ولفتحيه بتاعة الطماطم
اللى فى أول الشارع .. بس هم دول مفيش غيرهم )

7_ الشكوى من إتصالات وزيارات الأصدقاء الأخرين ( يمكن يحس على دمه ويخف شويه بس لو مفهمش بقه
المره اللى جايه جبهاله على بلاطه يمكن يخاف من البلاطه ويحترم نفسه )

8_ لا تسأل عنه إذا غاب ( يعنى هيتنيل يروح فين .. وبعدين ليفتكر نفسه مهم ولا حاجه .. سيبك منه بكره يرجع
ولا ان شاله مرجع يعنى هيبهللها )

9_ إحكى له عن عيوب أصدقائك الأخرون وعن أسرارهم ( علشان يبقى متطمن على مستقبله معاك وعارف حدوده)

10_ لا تترك فرصه تستطيع أن تذكره فيها أنك افضل منه دون أن تذكره بذلك ( أحسن ينسى أصله ولا حاجه
وينسى أنت مين وهو مين )


مستنيه إضفاتكم لأن اكيد فى حاجات تانيه أنا نسياها

الليل وأخره .. نفوخي يا عالم

سؤال دايما كنت بسأله لنفسى .. ومع الوقت نسيته مع انه كان مهم أعرف إجابته

وليه النهارده أفتكرته رغم انى لسه مش لقياله إجابه ..

حد يفهمنى أمتى ضاع الحق مقصدش حق الفقرا والفساد والكلام الكبير ده

لالا أنا أقصد أمتى ضاعت الحقيقه .. حقيقة الاشياء قيمتها الحقيقيه

ليه لما بنشوف حد بيقول يا جماعه اذكروا ربنا بنقول ده عم الشيخ مع انه مفروض

انه انسان عادى واقل من العادى .. ليه كلنا مش عارفين أن الأمر بالمعروف والنهي عن المنكر

واجب شرعي على كل مسلم .. وواجب على كل مسلم انه يتقبل التوجيه بصدر رحب

وإلا كان مذنب .. لكن بقى الطبيعى دلوقتى اننا نزعل من اللى بيقول الحق أو نعتبره شيخ

ليه بنفلسف كل شئ مع ان احكام ربنا باينه وواضحه زى الشمس .. البنت ترتبط

وتحب فى الجامعة ومن ورا أهلها و تتمرمط مع اللى بتحبوا شمال ويمين وعلشان نفهمها

المصيبه اللى وقعت فيها لازم نحكى حكاية عنتر وعبله مع انه مفروض انه كان من الكافي

اننا نقولها ربك اللى خلقك من فوق سبع سموات قال بلاش حب من ورا الأهل أكيد هو أعلى و أعلم

وهيغضب منك لو مصدقتيش كلامه سبجانه وتعالى ها تختارى ربك ولا حبيب القلب

ليه لو قلنا لحد أتقى الله بيزعل قوى مع ان أغلبنا محتاج يسمع الكلمه دى مع ان اتقانا وافضلنا

محتاج يسمع الكلمه دى .. ليه بيزعل مع ان كلمة أتقى الله هى الحل لكل مشاكلنا من أول

السحابه السوداء لحد أزمة الأقتصاد العالمية .. لو كل واحد أتقى الله يعنى دور وتعب نفسه وشاف ايه

اللى ربنا قال عليه فى الأكل والشرب والنوم والصحيان واللعب والجد والحب والكره وصلة الرحم

كان زمانا عايشين فى المدينة الفاضله

ليه دايما تصورنا عن الحب أنه العلاقة المحرمة بين أى أتنين .. مع أن أقوى قصص الحب

الحقيقي المنزه عن أي غرض كانت قصص حب حلال .. ليه محدش فينا بيتكلم عن

الحب الحلال وسايبين الكلام عن الحب لتامر حسنى وهيفاء وهبي

ليه لما الاسعار بتغلى شويه بنسب ونلعن وميبقاش لينا كلام غير على الاكل والشرب

مع ان الدين بيتهان كل يوم والاخلاق بتضيع كل يوم ومشوفتش حد بيتكلم

مشفتش حد بيقول الرجاله دى بتصلى فى بيوتها ليه ده لو كانت بتصلى اصلا

ومشفتش حد خاف من هجر المساجد ..

حد يفهمنى يا جماعة أمتى المعنى الحقيقى لحياتنا ضاع وازاى نلحقه قبل ميتمحى حتى من

صدور اللى شافوه وعرفوه يوم حد يتكلم ويقول نعمل ايه علشان يبقى الصح صح

حتى لو معملناش بيه والغلط غلط حتى لو كنا بنرتكبه كل يوم

أنا مش أنا يا دكتور

أصدقائي المدونين الأعزاء

أسعدني سؤالكم عنى جداااا

وأحب أطمنكم عليه أنا بخير والحمد لله

بس شوية ظروف صحية ولخابيط داخليه

وهكون بخير قريبا إن شاء الله دعواتكم معايا

بجد وحشتونى ووحشنى عالم التدوين

وبعتذر لكل المدونات الشقيقه اللى غبت عن متابعتها

وبعتذر كمان لكل الناس اللى مردتش على تعاليقاتهم

دعواتكم معايا بس بلاش دعوات شبه دعوات الاجازة اللى فاتت

ما هى عاصمة إسرائيل .... سؤال إجابته سهله

الفكرة هي ... كيف نربى أولادنا .؟

وماذا نعلمهم وكيف نبنى شخصيتهم..؟

حدث اليوم أمامى مشهد عجيب طفل فى السادسه

ذكي قوي البنية رياضي يتلقى ضربات مهينه من أحد

أصدقاؤه .. العجيب أن الطفل الذي يضرب طفل ضعيف وجبان جدااا

والطفل المضروب أقوى وأذكى وأكثر قدرة على إتخاذ القرار

ولكنه تلقى الضربات فى صمت مخزي جداااا ولم يحاول

المقاومه نهائيا بل كان خائفا نوعا ما

مع العلم أن أهله وكما أعرفهم لم يربوه على الجبن

ولكنهم أيضا لم يعلموه الشجاعه

شاهدوا الفيديو وشاركوني الرأي

ترى أين الخلل ....؟وكيف يتجنب الأهل تكرار مثل هذا الموقف

مع إبنهم مرة أخرى دون أن يعلموه العدوانية ؟

كلام من الأخر

قال الإمام ابن قيم الجوزية رحمه الله: فمن أعرض عن الله بالكلية أعرض الله عنه بالكلية، ومن أعرض الله عنه لزمه

الشقاءُ والبؤس والبخس فى أحواله وأعماله وقارنه سوءُ الحال وفساده فى دينه ومآله، فإن الرب تعالى إذا أعرض عن

جهة دارت بها النحوس وأظلمت أرجاؤها وانكسفت أنوارها وظهرت عليها وحشة الإعراض وصارت مأْوى للشياطين


وهدفاً للشرور ومصباً للبلاءِ، فالمحروم كل المحروم من عرف طريقاً إليه ثم أَعرض عنهاْ


قرأت الموضوع فى مدونه مميزه جدااااااااا إسمها غريب
المدونه ثريه جداااا بالموضوعات المفيده اضغط على الاسم للزياره
.

ترى كم مرة أعرضنا عن الله سبحانه وتعالى وكم مرة عدنا اليه

فكيف وبعد ان عرفنا وذقنا حلاوة القرب و تألمنا لمرارة البعد

نعود فنكرر الاعراض

كلما رأيت أحدا الان اراه يشتكى .. يشتكى أى شئ

وكل شئ .. الكل يعانى من الاكتئاب أو الملل أو الارهاق

ترى هل لقول الامام ابن قيم الجوزيه رحمه الله علاقه بما نعانى

أنتظر أراءكم

رحلت !!! .. لم أتوقع رحيلها الأن

رحلت !!!... كيف ترحل بهذه السرعة لماذا رحلت ؟ لم أتوقع رحيلها الأن

لازال بينا أمورا معلقة ... لازالت مدينة لي بالاعتذار عن بعض الأشياء

ومازلت مدينة لها بالاعتذار عن كل شئ .

حين علمت برحيلها مر تاريخنا معا أمام عيني .. مر كله في لحظة

بدايات كل صيف .. نهايات كل ربيع .. أيام الشتاء .. بدايات الصبا

أيام الصحة والمرض ..أيام التعاسة وأيام الفرح .. في النجاح والفشل

كانت حاضرة دائما .. اختلفنا كثيرا .. اتفقنا ألا نتفق

لكنني بالرغم من كل شئ أحمل صورها جميعا بداخلي .. صور متعددة

صورة بذلك الثوب البنفسجي وشعرها الكستنائي مسترسل على كتفيها

كانت في ريعان الشباب وكنت أنا في بداية الطفولة لم تبخل بشابها أعطته

لي بلا ندم ....

أمي كم كنتِ جميلة في ذلك الثوب .. دائما يا أمي كنتِ جميلة

لماذا سمحت أنا لذكرياتنا السيئة معا أن تقف بيني وبينك

أحبك ... بالرغم من كل شئ أحبك أكثر مما توقعت

كيف ترحلين هكذا .. لم أكن أتوقع أن هذا حق من حقوقك

كيف ترحلين عن الدنيا وتتركيني وحدي ليس من حققك أن تتركيني وحدي

لماذا لم تعلميني قبل رحيلك .. كيف أتخلص من مرارة الفراق

كيف أوقف دموعي .. كيف اخفي ألمي لغيابك ..

لم أتوقع أني سأحتاج لتعلم كيف أنساكِ لم يخطر لي أبدا أني سأحتاج

يوما لنسيانك

هل تصدقين ...؟ أتمنى الآن وبعد رحيلك يوما واحدا معك .. كنتِ معي

في كل يوم تتمنين صحبتي وكنت أنا غائبة ... اليوم وبعد رحيلك أتمنى

يوما واحدا معك .. سأرضى ولو بيوما واحدا

هل تعرفين ؟ !! لو أن الله كتب لك العودة ليوم واحد .. يوم واحد فقط

كنت سأقضيه كله معك ... كنت سأترك جسدي لأحضانك دون تذمر

كنت سأترك وجهى تغرقيه بقبلاتك كالعادة دون تململ .. لم أكن لأحرم

نفسي من حديثك حتى وإن لم يثر اهتمامي

هل تصدقين ؟!!! ...كنت سأسامحك عن كل شئ

وكنت سأعتذر عن كل شئ .... لم أكن لأقيم لكِ تلك المحاكمة السخيفة

التي اعتدت أن أقيمها في كل لقاء بيننا ...

يوما واحدا فقط معك هو كل ما أتمنى .. يوما أخر تظلين فيه معي

ماما ... ماما .. ماما .. أصحي الشمس نورت ... ماما الصبح جه

هكذا أيقظتني ابنتي الصغيرة ببراءتها الجميلة ووجهها الذي يحمل ملامحك

و بصوتها الرقيق الذي يحمل نبرات صوتك

لقد كان حلم .. رحيلك كان مجرد حلم هذا ما عرفته الآن

استيقظت لأجد أنه يوم أخر ولازلتِ معي لم ترحلين .. رزقني

الله يوما أخر معك .... ترى هل سأقضي هذا اليوم بين أحضانك ؟!!!!!

أم سأكون غائبة كالعادة

كيف تحصل على أجازة ملهاش أي لازمة ...ومحدش يسألنى عملتى أيه فى الاجازة علشان منخسرش بعض

كيف تحصل على أجازة فاشلة ( وملهاش أى لازمة ) سؤال يطرح نفسه في الأونة الأخيرة

ومن موقعي هذا أستطيع تلخيص الإجابة فى بضع نقاط .. متمنية لكم جميعا أجازات سعيدة

دائما ( مع انكم كنتم بتدعولي من غير نفس خااااالص )

1_ أن تكون الأجازة بعد فترة إرهاق طوووووويلة بحيث تكون ( مفاصلك سايبة وعنيك مزغللة
وروحك في مناخيرك وعلى أخرك وعايزلك أسبوع علشان تفوق وتبقى إبن ناس )

2 _ أن تكون هناك أمور كثيرة معلقة ومهام أكثر مؤجلة بحيث يتم قضاء الأجازة بين الدوائر
الحكومية المختلفة ( وتقضى حضرتك الأجازة كلها صحيان بدري علشان تلحق الموظفين قبل
ما يبدأوا الديش بارتى بتاع الافطار .. أو قبل ميعاد المأموريات اللى لحد غرفة نوم بيتهم )

3_أن تعلق أمالا كبيرة وتضع خططا عظيمة لقضاء الأجازة بين ربوع الطبيعة فكلما عظمت
الخطط كلما كبرت خيبة الأمل ( كفاية عليك شوية تهييس قدام التليفزيون أنت فاكر نفسك فين
كبيرك كوباية شاي بالنعناع وبرنامج البيت بيتك انت هتنهب )

4_ولكي تتأكد أنك ستحصل على أجازة (ملهاش أي لازمة ) يجب عليك إختيار توقيت الأجازة
بعناية فائقة ( يعني لازم تنشن على الوقت اللى كل الناس اللى يهمك أمرهم مشغولين لشوشتهم
ومحدش فاضى لحضرتك وبذلك هتلاقي نفسك فى الأخر مقضيها أفلام أبيض وأسود أو أفلام أكشن
وربنا يسترها عليك وميوصلش بيك الحال لأفلام نبيلة عبيد أو نادية الجندي يعنى لو جت فى إلهام شاهين
يبقى هتعيش أسبوع فى الإنعاش وهتبقى كويس )

5_أن تكون الأجازة خالية تماما من صلة الرحم و زيارات الأهل والعائلة ( على أساس انك مقطوع من شجرة
أوأولادك لقوك مرمى قدام باب المسجد اللى في أول الشارع )

6_وأخيرا وليس أخرا تكون من الناس المحبين للهدوء ..( جرس الباب وصوت مرات البواب وهى بتشتم ولادها
وصوت كلب الجيران وصوت جاركم اللى اشترى لاب توب جديد وفرحان بيه وقاعد فى البلكونة مشغل
فيلم جديد ومعلي الصوت قال يعنى بيعرف يعمل دونلود لأفلام اجنبيه .. لوكل ده بيسببلك تعاسة حقيقية يبقى انت
أكيد فى أجازة فاشلة وزي قلتها )

أتمنى أنى أكون قد أفدتكم .. ومحدش يسألنى عملتي أيه فى الأجازة علشان منخسرش بعض ماشي : (((

يلا نقضى أجازة سعيده ... قولوا آمييييييييين

منذ عام تقريبا شاهدت فيلم أمريكى عن الأجازات

وإزاى الأجازه ممكن تغير حياة الانسان وتخليه يبدأ من جديد

.. قصة الفيلم

أثنين من النساء واحده عايشه فى أمريكا والتانيه فى

إنجلترا كل واحدة فيهم بتعانى فى حياتها من مشاكل شايفه

ان ملهاش حل ... بشكل أوبأخر كل واحده بتفكر تطلع أجازه

بيتعرفوا على بعض عن طريق النت وبتروح كل واحده تعيش فى بيت التانيه

لمدة اسبوعين .. كل واحده بتكتشف فى بيت التانيه وحياتها

حاجات جميله صاحبة البيت الاصليه بسبب عوامل كتير

مبقتش شيفاها.. وكل واحده الأجازة بتغير فيها حاجات كتير

وهم الاتنين بيرجعوا لحياتهم اليوميه بعد الاجازة بروح تانيه

والمشاكل اللى كل واحدة ماكنتش لقيالها حل بتكتشف ان الحل

كان فى ايدها من البدايه

طبعا من ساعة ما شوفت الفيلم وانا نفسى فى أجازة

وكل ما أحس أنى تعبانه أو فى حاجه عايزة قرار أقول

هفكر فيها على رواقه لما أطلع أجازة(قال يعنى

وبعد طول انتظار وبعد خلاص ما كنت قربت أفقد الأمل

هطلع اجااااااااازه إدعولى تبقى أجازة سعيدة

طبعا هحاول أتابعكم على قد ما أقدر

لكن أسبوع او عشر أيام وهرجع

أنا بجد فرحانه بالاجازه ادعولى

هتوحشونى كلكم وهفتقدكم جدااااااااااااا

سلااااااااااااام مؤقت على احسن ناس




) ...

نظرية الناس اللى ميتسموش فى السيطره

قرأت فى كتاب الأمير لمكيافللي نظريه رائعه يستطيع بها

الأمير (أمريكا أو إسرائيل مثلا) السيطره على المدن التى كانت

قبل إحتلالها تعيش فى ظل قوانينها الخاصه ( العراق أو فلسطين مثلا أو حتى الشرق الأوسط)

يقول مكيافللي أنه لا سبيل لحكم مثل هذه المدن إلا بثلاثة سبل

1_تجريد هذه المدن من كل شئ ( واخدين بالكم تجريدها من كل شئ )

2_أو يذهب الأمير المحتل ليقيم فى ربوعها بنفسه

3_أو أنه يسمح لأهلها بالعيش فى ظل قوانينهم الخاصه

ولكن بعد أن يخلق فيها حكومه تعتمد على الأقليه المواليه للحاكم وتدرك

مثل هذه الحكومه أنها تعتمد فى بقائها على صداقة هذا الأمير وحمايته

لذا فهى تبذل بالغ الجهد للحفاظ على مثل هذه الصداقه
ولكن يحبذ مكيافللي السبيل الأول .. إذ لا وسيله للحفاظ على مثل هذه المدن

إلا عن طريق تجريدها من كل شئ لأنها ستجد دائما الحافز على العصيان

باسم الحريه وباسم أعرافها القديمه التى لن يسدل الزمن عليها سجف النسيان

فإنه لن يستطيع أن ينسى أهلها أسم مدينتهم أو أعرافها إلا إذا مزقهم شر ممزق

وفرقهم شيعا .. فهم دائما سيظلون ذاكرين هذه الأعراف ينشدونها بلا ملل

أعزائى هل تجدون حقا أدنى تشابه بين هذه النظريه ( اللوزعيه ) وما تطبقه أمريكا

من نظريات فى المنطقه .. أوما تطبقه إسرائيل فى فلسطين

هل نحن الأن حقا أمه يتم تجريدها من كل شئ .. كل شئ حتى القيم والأخلاق

حتى الأمل فى غد افضل ..

تنويه : كتاب الأمير لمكيافللى كتاب سياسى قديم يرجع اليه كثير من الزعماء والقاده

فى العالم الكتاب تم تأليفه منذ 400 عام

تتجوزينى........أيوه طبعا

أنت تبحث عن شخص صريح وغير متكلف صادق ...

عليك أن تتعرف عليه إذا ..

أنت و حينما تسأله عن رأيه في أي شئ أمامك احتمالين

لا ثالث لهما إما أن تحصل على إجابة وافيه كافيه دقيقه جدا

أو أنك ستحصل على: لا أعرف

حين تطلب منه خدمة ما أمامك احتمالين إما أن يفعلها لك عن طيب خاطر

وبكل سعادة ودون تكلف

أو أنك ستحصل على : معلش والله عايز أنام أو حتى مليش مزاج

إذا وعد فهو فاعل لا محالة .... اتقان العمل بالنسبة له هدف يسعى لتحقيقه

له دائما اسلوبه الخاص ولمسته الخاصه

في بيتنا القديم وعند الظهيرة رن الهاتف ... رفعت السماعة

مين معايا

هو:أنا فلان الفلاني

أنا :أهلا وسهلا أي خدمه

هو : أيوه كنت عايز أسألك سؤال بسيط

أنا: أتفضل

هو :إنتى طبعا عارفانى كويس وعارفه أهلي

أنا: أيوه

هو : أنا يعنى كنت عايز أسألك لو كلمت والدك توافقى تتجوزينى

أنا: وبعد أن استغرقت في التفكير للحظه ماذا أقول

بجد عاجبنى وموافقة بس لازم أرد رد دبلوماسي ميصحش

لذلك أجبته: بأيوه طبعا

هو: شكرا مع السلامة

تلك هى بداية قصتنا معا .... أحببته ولم أخفى مشاعرى يوما

ولم يخفى هو مشاعره عنى يوما

... زهره حمراء كان يهديها لى فى كل لقاء هى أغلى عندى من أى هديه أخرى ...

زهره حمراء كنت على يقين أنه يهديها لى بقلبه وليس بيده ..

لأنه وبكل بساطه لن يهدينى إيها إذا كان ( ملوش مزاج)

كلمات الحب التى يمطرنى بها أحيانا تجعلنى أطير فى السماء ..

لأنه وبكل بساطه أيضا لن يسمعنى إياها إذا كان ( مبيحبنيش اليومين دول ) .. ....

كنت على يقين دائما أن أيام الخطبه ستكون هى أجمل أيامنا معا ...

ولكن وبعد مرورالعام الأول من الزواج إكتشفت أن للسعاده ألوانا أخرى.....

أحبه .. وأحب دائما أن أراه سعيدا ... يسعدنى أن أراه مشغولا ولو طوال اليوم بشئ يحبه ....

يسعدنى جدا أن أرى إبتسامته وهو يستعد للخروج برفقة بعض الأصدقاء ....

أحبه حين يغيب عنى أسابيع طويله لأنى حينها وحينها فقط أشعر بصعوبة الفراق ....

لا أهتم كثيرا إذا لم يتذكر مناسابتنا الخاصه .... أيامنا معا كلها مناسبات خاصه

---