الجمعة، 1 يناير 2010

ده بجد ولا هزار


لو حبيت نفسك بجد وحبيت الناس بإخلاص حب خالص لوجه الله رغبة في رضا الله

لو إبتسمت للحياة حتى في أصعب الأوقات فقط لأنك مؤمن أن قضاء الله خير وان الله لن يريد بك سوء

أبدا

لو عرفت من قلبك أن تبسمك في وجه أخيك صدقة .. وبقيت بقدرة قادر إنسان لطيف مع الناس كلها

فقط رغبة في حسنات تتقل ميزانك يوم القيامة

لو مثلا مثلا بقيت إنسان مخلص في شغلك

ولو صحيت في يوم ولقيت نفسك بقدرة قادر ممبتجبش في سيرة حد وبتترك الخلق للخالق

لا والمفاجأة إنك بقيت بتلتمس للناس الأعذار ومبقتش سئ الظن

لو فجأة لقيت نفسك دايما بتقول من قلبك ( الحمد لله )

تفتكر ساعتها الجياة هيبقى شكلها أيه وتفتكر

أن دى حاجات ممكن تخلينا نعيش حياة حلوة ونساعد غيرنا يعيشوا حياة حلوة

تفتكروا لو كلنا صحينا في يوم ولقينا نفسنا بقينا كده

الدنيا هيبقى شكلها أيه

وتفتكروا شوية الحاجات دي صعب علينا أننا نعملها

هناك 12 تعليقًا:

غير معرف يقول...

احنا كده نبقى ملايكه :)

بجد اكيد هنكون اسعد

كل سنه وانتي طيبه

عاشقه الرومانسيه يقول...

هاعتبر البوست ده وصفه للسعاده
كل سنه وانتى طيبه ياايمى

SHAPE YOUR LIFE (ABOALI) يقول...

اممممممممممممممم

ويا ترى الوصفة دى يا دكتور كام مرة فى اليوم
وكمان قبل الاكل ولا بعده

هو فعلالالالالالالالالالالالالالا كلام جد
بسسسسسسسسسسسسسسسسسسسس ف وسطه حبة هزار

جعلك الله ممن يصنعون البسمات ان شاء الله

بس والنبى جاوب على الاسئلة يا دكترة

ستيتة يقول...

الف مبروك يا حبي يا تؤامي الغالي
انا لما اتصلت والمسيو رد على موبيلك ماخطرش علي انك مبقيتيش جودزيلا وفقستي
الف مبروك
اه يعني عريس ولا عروسة ولا ايه علشان ابقى على نور

بالنسبة للبوست فيه شيء وحش حصل لي

حد من افراد الجمعية اتصلت وبلغتني كلام بيتقال علي
خدي بالك
انا اروح شغلي اشتغل بس
واضحك ضحكتين بريئتين مع البشر من اول الفراشين وانت طالعة واروح على بيتي
لا حد يجرؤ يجي يجيب لي سيرة حد ولا نعك في الكلام
طبعي كده وبيقولوا علي براوية
اوك عادي

المهم كالعادة الكلام مش بيقف ولا الناس بتهتم بشئونها

بس لما عرفت اني سيرة تلوكها الألسنة واللي بتقول لي بتحاول تقول لي علشان اخد بالي من الناس دول حزنت قوي قوي
وفرحت قوي قوي

حزنت ان الناس مش بتخاف على آخرتها ربنا يعينهم
حزنت اني عاملة فسفس لناس مع اني اقسم بالله ولا بيخطروا على بالي اساسا
حزنت من صاحبتي اللي بتقول لي وتزعلني
انا مش بحب الكلام يا بشر
اعمل ايه
افهمكم ازاي

وفرحت انهم بياخدوا ذنوبي ومش ها ارد ولا اعاتب ولا ها اهاجم حد
إلا لو جه تحت سناني بقى
يبقى نصيبه
ربنا يعينه :)

الف حمد الله على السلامة
نرغي امتى بقى وننم ونغتاب النونو ؟ :)

القدر و انا يقول...

ايمى الحبيبة
كل سنة وانت طيبة ياقمر
وفعلا بوست حميل لبداية جميلة
ومش عيب ولا صعب اننا نتغير للافضل ونحاسب النفس ونوجهها دائما الى ما يرضى الله
والله الكل حيرتاح وتخفف الكثير من همومنا والامنا
حبى وتحياتى لفكرك وقلمك

خالد شوقي يقول...

فعلا لو ان الناس بقت كدا هتكون الحياة اجمل بكتير و المهم كمان يكون كل انسان راضي بحاله و لا يتمني لغيره لا الخير ..
كل سنة و انتي طيبة يا ايمان
خالد شوقي

الفقيرة إلى الله أم البنات يقول...

ايمان لو كده يبقى اجمل شئ فى الدنيا حصل ويبقى ياريت كلنا نعيش مع بعض بنفس الطريقه
بجد ياريت
كلام موزون



ايه حكاية البيض اللى فقس اللى بتقول عليه ستيته ده
اوعى يالهوى وانا مش عارفه
عندك حق تقولى هتعرفى منين وانت قاعده فى الفيس بوك تلعبى مع بنتك


ربنا يرزقك برهم جميعا ويجعلهم من الصالحين


وكلمة من عندك لستيته
العالم الافتراضى اسوأ بكتيير من الحقيقي
علشان الافتراضى بخرج المساوئ بقلب جامد هو حد شايف

ربنا يكفينا شر من لايتقى الله فينا وفى نفسه

ربنا يجعل ايمكم جميعا خير ورضا

لجين أبو الدهب يقول...

امممممممم

كده ما نبقاش بشر

منضبطين ومش بنجيب فى سيرة حد وبنشتغل بانتظام ..

لالالا ده كده كتير اوى ياايمى ..

اظن فى الحاجات دى بس للاسف مش فى المصريين او العرب عموما

اضيف كمان حتة

لونبقى متلحلين شوية ومش لازم نطلع عين اللى اودمنا وكل شوية تعالى بكرة تعالى بكرة ..

هانبقوا كويسين جدا

دمتِ بخير حبيبتى ..

عاشقه الرومانسيه يقول...

مبروووووووووووووووووك ياايمى
الف الف مبروك على المولود السعيد
ياترى ولد ولا بنت؟
ربنا يبارك لك فيه
فرحت علشانك قوووووووى

تامر علي يقول...

إحنا لو عملنا كده مش هانبقى احنا وهانقعد نقول زي محمود عبدالعزيز أنا مش أنا يا دكتور لأننا تعودنا على رأي الوالد الكريم بنتاجر في الأحزان :)))))

كلمات من نور يقول...

يا الله دي تبقى عودة صحيحة إلى ديننا الحنيف .....يسمع منك ربنا يا إيمي ويحقق لنا هذا الحلم فهو ولي ذلك والقادر عليه.تحياتي

MaNoOoSh يقول...

أولا ألف مبروك على النونو الجديد وربنا يبارك لكم فيه

ثانيا
ياريت نصحي من النوم نبقى نص كده حتى

ثالثا
وحشتييييييييييييني جدا يا ايمي