الأحد، 15 أغسطس 2010

اللهم اني صائمة

الكاتب الكبير / وحيد حامد
كلمه واحده هرد بيها على كل انتاجك الفني .. يعععععععععععععععععععععععععععععععععععع

بجد ريحة افكار سيادتك فايحه .. ريحتها فايحه أخر حاجه

وخاصة في مسلسل الجماعه أخر أعمالك واضح جدااااا إنه مسلسل موجه علشان إنتخابات الرياسه اللى جاية
حاسه وانا بتفرج عليه انه متصور من عشر سنين ايام ماكان الناس بتصدق اي حاجه وسهل تاكلو على دماغهم طبيخ
بس ياريت لما تعمل حاجه زي كده ابقى اتعب نفسك شويه واعملها حاجه مظبوطه ومقنعه تغطى على السم المستخبى يبقى سم فى عسل مش سم فى مش وبدودو كمان .......بصراحه استخفاف بالعقول وحاجه تخنق .. وبعدين ايه اللى دخل الجماعه فى الدين مش عجباك الجماعه انت حر بس متفتيش علينا في الدين وتفهمنا دينا( ونظام الدين معامله والحجاب حجاب القلب والكلام اللى يخنق ده خليه لحضرتك ) وبلاش تعمل فيها مصلح اجتماعي وشيخ طريقه

أنا بتكلم الكلام ده بصفتي مواطنه عااااااااديه من اللى انتوا بتشتغلوها ليل نهار لا أنا إخوانجيه ولا مؤيده للجماعه ولا بفكر انتخب حد فيهم لو حصل ورشح نفسه .. بس برضو شايفه أنها جماعه سياسيه زي اي جماعه من حقهم يحلموا بالسلطه ومن حقهم يتخذوا المنهج اللى شايفينوا صح زي اي حزب سياسي ومن حقى انا ارفضهم او اقبلهم لكن مش من حقي ولا من حق اى حد انه يسفه من افكارهم
وشايفه انه مش معنى انها جماعه اسلاميه تبقى ارهابية أو بتتمول من منظمات اجنبية اصل المرادى مش هتقدروا تقولوا ايران بعد مفلقتوا دماغنا بقصة المد الشيعي اللى عايز يقضي على السنة ويحتل العااااااااااالم
ياريت بقى محدش يعمل واصي علينا واللى عايز يمسح جوخ للحكومه يمسح بس بعيد عننا
.........مليتوا البلد

الثلاثاء، 10 أغسطس 2010

نداء عاجل لستيته والقدر وأنا ..........أفتحوا الباب ينوبكوا ثواب

ندا ء عاجل لستيته مدونتك كل ما ادخلها

الجهاز يحرن ويقولي الموقع عليه برامج ضاره قد تلحق الضرر بيه أو تسمح لحد انه يعمل هكر عليه نتيجه لزيارة ستيته لدندونه معرفش ايه كده بلوج سبوت
نفس الكلام لقيته عند حبيبتى القدر وأنا
ومن ساعتها مش عارفه ادخل عندكم
متشوفوا ايه الحكايه يمكن الباب يتفتح

الأحد، 1 أغسطس 2010

هل هلالك شهر مبارك



ساعات بتبقى الفرصة قدام البني ادم أدام عنيه وشايفها وعارف انها فرصة ومع ذلك يسبها تروح من ايديه ساعات بسأل نفسي ليه ؟؟ بفكر أنه يمكن ميستحقهاش يمكن الفرصة دي كتير عليه يقوم هو اللى يسبها تروح من اديه كده من غير سبب يضيعها وخلاص لأنه ميستحقهاش ..
بخاف لكون بعمل كده كل يوم بخاف وبفكر يا ترى أيه الفرص اللي قدامي النهارده أيه الحاجات اللي مش لازم أضيعها النهارده ..
رمضان على الأبواب وهو أكبر فرصه بتيجي مره واحده في السنة
رمضان فرصة نشوف نفسنا على حقيقتها نشوفها فيها الخير ولا لأ نواجهها بعيوبها الحقيقية نقولها شايفنك مهما حاولتي تستخبي
رمضان فرصة اننا نراجع نفسنا نعيد حساباتنا في الحياة نبص ورانا وقدامنا نشوف احنا فين بالظبط يا ترى توهنا ولا ماشين صح يا ترى إتجاهاتنا كده مظبوطه ولا كله دخل في بعضه
رمضان فرصة إننا ننسى الدنيا واللى فيها ونفتكر إن فيه خالق عظيم بيمشي كل شي مش إحنا
ونحاول نرتاح شويه ومن مادية الحياة وجنانها
نقول يا رب يا كريم رحمتك
رمضان فرصة إننا نحب نفسنا ونحب الناس من غير شروط من غير قال وعمل
في رمضان فرص كبيييييييييييييييرة متضيعوهاش محدش عارف رمضان اللى جاي هنكون فين والدنيا هيحصل فيها أيه يلا نفرح برمضان ونفتكر أن ربنا فوق كل شئ وفوق كل ظالم

اللهم بلغنا رمضان

كل سنة وانتم طيبين ربنا يسعد ايامكم وتبقى كلها في طاعة

ربنا يجعلنا وأياكم من عتقاء الشهر الكريم