الجمعة، 19 يونيو، 2009

الليل وأخره .. نفوخي يا عالم


سؤال دايما كنت بسأله لنفسى .. ومع الوقت نسيته مع انه كان مهم أعرف إجابته

وليه النهارده أفتكرته رغم انى لسه مش لقياله إجابه ..

حد يفهمنى أمتى ضاع الحق مقصدش حق الفقرا والفساد والكلام الكبير ده

لالا أنا أقصد أمتى ضاعت الحقيقه .. حقيقة الاشياء قيمتها الحقيقيه

ليه لما بنشوف حد بيقول يا جماعه اذكروا ربنا بنقول ده عم الشيخ مع انه مفروض

انه انسان عادى واقل من العادى .. ليه كلنا مش عارفين أن الأمر بالمعروف والنهي عن المنكر

واجب شرعي على كل مسلم .. وواجب على كل مسلم انه يتقبل التوجيه بصدر رحب

وإلا كان مذنب .. لكن بقى الطبيعى دلوقتى اننا نزعل من اللى بيقول الحق أو نعتبره شيخ

ليه بنفلسف كل شئ مع ان احكام ربنا باينه وواضحه زى الشمس .. البنت ترتبط

وتحب فى الجامعة ومن ورا أهلها و تتمرمط مع اللى بتحبوا شمال ويمين وعلشان نفهمها

المصيبه اللى وقعت فيها لازم نحكى حكاية عنتر وعبله مع انه مفروض انه كان من الكافي

اننا نقولها ربك اللى خلقك من فوق سبع سموات قال بلاش حب من ورا الأهل أكيد هو أعلى و أعلم

وهيغضب منك لو مصدقتيش كلامه سبجانه وتعالى ها تختارى ربك ولا حبيب القلب

ليه لو قلنا لحد أتقى الله بيزعل قوى مع ان أغلبنا محتاج يسمع الكلمه دى مع ان اتقانا وافضلنا

محتاج يسمع الكلمه دى .. ليه بيزعل مع ان كلمة أتقى الله هى الحل لكل مشاكلنا من أول

السحابه السوداء لحد أزمة الأقتصاد العالمية .. لو كل واحد أتقى الله يعنى دور وتعب نفسه وشاف ايه

اللى ربنا قال عليه فى الأكل والشرب والنوم والصحيان واللعب والجد والحب والكره وصلة الرحم

كان زمانا عايشين فى المدينة الفاضله

ليه دايما تصورنا عن الحب أنه العلاقة المحرمة بين أى أتنين .. مع أن أقوى قصص الحب

الحقيقي المنزه عن أي غرض كانت قصص حب حلال .. ليه محدش فينا بيتكلم عن

الحب الحلال وسايبين الكلام عن الحب لتامر حسنى وهيفاء وهبي

ليه لما الاسعار بتغلى شويه بنسب ونلعن وميبقاش لينا كلام غير على الاكل والشرب

مع ان الدين بيتهان كل يوم والاخلاق بتضيع كل يوم ومشوفتش حد بيتكلم

مشفتش حد بيقول الرجاله دى بتصلى فى بيوتها ليه ده لو كانت بتصلى اصلا

ومشفتش حد خاف من هجر المساجد ..

حد يفهمنى يا جماعة أمتى المعنى الحقيقى لحياتنا ضاع وازاى نلحقه قبل ميتمحى حتى من

صدور اللى شافوه وعرفوه يوم حد يتكلم ويقول نعمل ايه علشان يبقى الصح صح

حتى لو معملناش بيه والغلط غلط حتى لو كنا بنرتكبه كل يوم

هناك 31 تعليقًا:

ستيته حسب الله الحمش يقول...

عاوزاك تهدي كده
مش حلو علشانك

المهم كل ده ضاع فعلا
واحنا في منحدر حقيقي
ولو ربنا شاف اننا اشكال مش نافعة وسلبية وبنسيب الأمر بالمعروف والنهي عن المنكر وان قلبنا جمد ومبقاش يترقق بذكر الله

مؤكد ها تحصل حاجة

بس ربنا رحيم يستعملنا ويصلحنا ولا يستبدلنا قولي آمين

صباح القشطة وجمعة مباركة على أمة المسلمين كلها

GiGi worled يقول...

الحقيقه فعلا ضاعت بس حقيقى ربنا يعزك على غيرتك دى على الدين والقيم
والنصيحه
ربنا يعزك ويكرمك يارب
تحياتى

د. ياسر عمر عبد الفتاح يقول...

فيه أسئلة كده
إجابتها صعبة أوي
كل ده طبعاً بسبب بعدنا عن الدين ,, أو قل ابعادنا عن الدين بفعل فاعل.

الله المستعان
اللهم ردنا إلي دينك رداً جميلاً

MaNoOoSh يقول...

انا شايفة ان حياتنا باظت من ساعة ما بقينا نفكر فى الدنيا بس

والراجل بقى اى حاجة الا انه يتحلى بصفات الراجل
والست بقت اى حاجة الا انها تكون ست بجد


بس لو لحقنا نفسنا اكيد هنعرف نعيسش صح

أحمـــــــــــــد أبو العلا يقول...

انا حاسس بصرخه في كلامك

معاكي حق
غريب فعلا لما تتحول الحاجه اللي المفروض انها فرض, انها تتحول لشئ غير طبيعي

يعني ناس كتيره تستغرب ايه ده انتي بتصلي؟ كل يوم؟ والفجر كمان؟ ايه ده انت مش بتدخن؟ وكأن ديه الفضيله
وكأن الطبيعي انك لازم تكون عكس كده

بالنسبه للكلام عن الحب, ده اتجاه تاني
نتيجه اننا اعتبرناه من المحرمات, فبأه الكلام عنه حرام, وأصبح مجرد التفكير فيه فجور, مع الوقت اترجم عندنا الحب على انه المشهد الخارج اللي بيتشاف في السينما او التليفزيون. بقى هوا الأغنيه اللي فيها نحنحه وكليب مش محترم

تربيه قفلت باب فطري في الانسان, فكان الطبيعي ان باب الفتنه يكون هوا المنفذ الوحيد للفطره

دعاء يقول...

انا معاكى فى الكلام وبخاصة "اتق الله" الناس بتتأثر بيها على اعتبار انك بتشتميهم.
ربنا يصلح النفوس

ياسر سليم يقول...

كلامك جه على الجرح

فعلاً المفروض ان ربنا اخرج الأمة المحمدية كلها للأمر بالمعروف والنهي عن المنكر فى قوله تعالى
كنتم خير أمة اخرجت للناس تأمرون بالمعروف وتنهون عن المنكر

وللأسف فعلاً ان فى ناس كتيرة لما تشوف حد بيصلى فى الجامع اللى هو أقل حاجه .. اللى الرسول قال عليها العهد الذى بيننا وبينهم الصلاة
يقوله يا شيخ
يبقى ازاى تعد نفسك من المسلمين وانت ما بتصليش ؟
وهى اول ما يحاسب عليها الانسان فى القبر .. هتقول ايه .. دا الصلاة كانت للمشايخ !؟

والله حاجة تحرق الدم

أم مالك يقول...

عارفة الاجابة ايه ياايمان
الاجابة جاءت مابين سطورك
اننا انشغلنا بالفانية وتركنا الدايمة
البعد عن الدين ياحبيبتى
وعلى راى ستيتة لولا رحمة الله بنا الواسعة لتمت الابادة
فكل يوم البحر يكلم الله هو والسموات والارض طالبين ان ياذن لهم الله فيغرقنا
البحر وتنطبق علينا السماء وتبتلعنا الارض
ويقول لهم ربنا اتركوهم لو خلقتموهم لرحمتومهم
الله المستعان وتحياتى

لاسع افندى يقول...

تعرفى ليه ماحدش بينهى عن المنكر
لان كل الناس بترتكب المنكرات وماينفعش انهى حد عن حاجه وانا برتكبها يعنى ماينفعش اقول للحرامى بلاش تسرق وانا مش براعى ضميرى فى شغلى..ماينفعش اقول للناس تعالوا نصلى وانا طول اليوم بزعق واشتم..لازم كل واحد يصلح نفسه ولما يبقى ميه ميه يدور على الناس


تحياتى

ABOALI يقول...

امممممممممممممممم
الموضوع ده جميل ومميز

وحله ببساطة بوضع جدول وخطة للحياه
يكون فيها الهدف واضح
واذا وضح الهدف يبقى نسعى اليه

الرسول صلى الله عليه وسلم يقول فيما معناه

لو اهتمننا باءخرتنا كفانا الله هم الدنيا

لو انتى نظرتى من فوق برج القاهرة للناس من فوق
تجدى انهم مشتتين وافكارهم مش واحدة وكذلك الهدف
لاءنهم الدنيا جعلوها غايتهم فقط فشغلت كل حياتهم

يبقى احنا محتاجين

هدف واضح
خطة جيدة لتحقيقه
الاستعانة بمن خلق فى الهداية لهذا الهدف

مثال

لو عاوزين هدفنا يكون السعاده مثلا

يبقى الخطة ايه
1- معاملة طيبة لكل الناس
2-العفو عن الاساءة
3- الرضا بالقليل
4-الثقة فى الله


السمو والرقى ياءتى من تتطبيق الدين شكلا وموضوعا

فمن طبق الدين فليكن قدوة حسنة له حتى يجذب الناس اليه

ومن اراد ان ينفر الناس من شيىء كان سلوكه خير منفر


اشكرك على هذا الطرح الراقى
واجراس انذاره

د/عرفه يقول...

ذكرتى فى الموضع شوية حاجات عجيبة فعلا

ليه لما الاسعار بتغلى شويه بنسب ونلعن وميبقاش لينا كلام غير على الاكل والشرب

ده علشان الناس بقت مادية اوى والحياة صعبة والكل مركز على شىء واحد


محدش فينا بيتكلم عن

الحب الحلال وسايبين الكلام عن الحب لتامر حسنى وهيفاء وهبي


انا شوفت فعلا قصص حب عظيمة بين ناس متجوزة فعلا بينهم قصص حب وتضحية ملهاش حل



ليه لو قلنا لحد أتقى الله بيزعل قوى مع ان أغلبنا محتاج يسمع الكلمه دى مع ان اتقانا وافضلنا

محتاج يسمع الكلمه دى .. ليه بيزعل مع ان كلمة أتقى الله هى الحل لكل مشاكلنا من أول



كتير كلمة الحق بتزعل
وكتير الكلمة بتمس جروح ولما بتضغطى على جرح لازم يكون فيه ألم



بوست رائع
عجبنى فعلا

Hajar Jackoub يقول...

أشعر بتجربة موجعة من وراء كلماتك . . . ما الذي فجر هذا الموضوع لديك بكل هذا الغضب المتجلّي في كلماتك؟!!
نعم أنا معك في إنه (( شئ يغيظ))!! الواحد بقى بيخاف يتكلم مع الناس عشان النظرة "اللي من فوق لتحت" . . . تقولي للبنت بإبتسامة لطيفة "شعرك باين من قدام الطرحة" فترمقك بنظرة فوق-تحتية و ينقلب وجهها و كأنها تقول لك " انتي مجنونة . . وفيها ايه لما يبان" !!!!! هذا مثال من أمثلة عديدة نواجهها في الشارع المصري . . . و اللي يجننك أكتر إنك تلاقي صحابك بيقولولك خليكي في حالك و سيبك من اللي بيحصل "أصله عادي"!! طب فين يا جماعة الأمر بالمعروف و النهي عن المنكر؟ يقولولك صلحي نفسك الأول . . طب ماهو الواحد كده مش هيوصل لحاجة أبدا . . . أنت إذا نهيت عن المنكر في جزئية معينة ستجد نفسك تخجل من أن تفعل الشئ الذي نهيت عنه و هذا يساعدك بكل تأكيد على إصلاح نفسك :) لكن إذا توقفت عن النهي فسيفجُر من حولك و ستتبعهم أنت أيضا إما عن عمد أو عن جهل لأنك لم تجد من ينهاك و يأمرك بالمعروف!!أصبح من ينهى عن المنكر و يتكلم هو اللي "مش عادي" و أصبح "العادي" إنك تشوف الغلط بيحصل و تسكت يإما الناس ينظرولك نظرة فوق-تحتية!!!!!
ينسى الناس -إلا من رحم ربي- أنهم سيسألون يوم العرض عن أمرهم بالمعروف و نهيهم عن المنكر . . سيسألون أمام الله، و النتيجة ليست علينا إنما علينا البلاغ و كما جاء في القرآن (( معذرة إلى ربكم و لعلهم يتقون)) ،وجاء في سورة هود ((فَلَوْلَا كَانَ مِنَ الْقُرُونِ مِنْ قَبْلِكُمْ أُولُو بَقِيَّةٍ يَنْهَوْنَ عَنِ الْفَسَادِ فِي الْأَرْضِ إِلَّا قَلِيلًا مِمَّنْ أَنْجَيْنَا مِنْهُمْ ۗ وَاتَّبَعَ الَّذِينَ ظَلَمُوا مَا أُتْرِفُوا فِيهِ وَكَانُوا مُجْرِمِينَ (116)وَمَا كَانَ رَبُّكَ لِيُهْلِكَ الْقُرَىٰ بِظُلْمٍ وَأَهْلُهَا مُصْلِحُونَ (117)) لاحظوا و أهلها مُصلحون و ليس "صالحون" و هناك فرق! بل إن الله لعن بني إسرائيل و ذلك بسبب (( لُعن الذين كفروا من بني إسرائيل على لسان داوود و عيسى ابن مريم ذلك بما عصوا وكانوا يعتدون*كانوا لا يتناهون عن منكر فعلوه لبئس ما كانوا يفعلون)) << و هذا هو الشاهد
و هذا درس بعنوان (حراس السفينة) للشيخ محمد العريفي . . الدرس ولا أروع و يتكلم عن أهمية الأمر بالمعروف و النهي عن المنكر ، الرابط مباشر:
http://majdah.maktoob.com/vb/redirectLink.php?link=http%3A%2F%2Fdownload.media.islamway.com%2Flessons%2F3refi%2F400_Horras_Assafinah.mp3
رابط آخر: http://www.islamway.com/?iw_s=Lesson&iw_a=view&lesson_id=67354

و آسفة على الإطالة

لك منّي كل التحايا . . . . "وحشاني يا إيمي ^^"

بنجاواتى يقول...

السلام عليكم

اول زيارة يا رب تقبلينى

حضرتك قلتى كلام جميل جدا وكلنا كنا بنعمل اننا مش واخدين بالنا منه وزى النعام مش عاوزين حد يقولهولنا ولو حد قالهولنا بنقول عليه غاوى وجع دماغ

القصد بقى انى اقول ان الكلام فعلا صحيح لكن ممكن اسال نفسى واسأل حضرتك سؤال واسأل اى حد نفس السؤال:
بعد الكلام ده ما اتقال او اتكتب او اتسمع ايه اللى اتغير جوانا؟؟

اكيد بنلاقى الاجابة اننا بنتكلم وناسيين نفسنا
يعنى ممكن مثلا نلاقى واحد بيحض على الصلاة وهو ناسى صلة الارحام او العكس وكان من الاولى انه ينصح نفسه الاول

اما كون ان المفاهيم اصلا اصبحت مغلوطة فده شئ انا مش لامسه اوى لانى متأكد ان احنا عدينا مرحلة العلم بالاشياء واصبحنا فى مرحلة هل نعمل بما علمنا؟؟

تحياتى

مجرد مدونة يقول...

أنا فعلا حسيت بصرخة في الكلام ..
هي دي السنن الكونية في كل زمان ومكان سواء ظهرت بوضوح أو لا ..
واجبنا الدعوة إلى تغيير الصورة حتى لا تظل مقلوبة
ولا يكلف الله نفسا الا وسعها

عاشقه الرومانسيه يقول...

عارفه ليه ياايمى؟
علشان نسينا انا مخلوقات ضعييييييييييفه وضئيله قووووووووووووووى
نسينا ان لنا دين ومنهج لازم نمشى عليه
غرتنا الدنيا بكل اللى فيها وهى مش بتساوى عند ربنا جناح بعوضه
ونسينا ان فى جنه ونار وثواب وعقاب ويوم هتترد فيه المظالم لاهلها

ربنا يرحمنا ويعافينا ويصلح لنا حالنا ياااااااااااارب

إيمان يقول...

ستوته حبيبتى

عايزانى أهدى نفسي .. طيب ما أنا هاديه وتمام اهه حد قال أنى متعصبه
دا أنا أخر سعاده وانبساط
هيييييييه دنيا
اللهم استعملنا ولا تستبدلنا
ولا حول ولا قوة الا بالله
ربنا يجعل كل ايامك قشطه

إيمان يقول...

gigi

شكرا على كلامك الرقيق

ربنا يعز الاسلام والمسلمين جميعا

ويصلح احوالنا جميعا

منورانى يا قمر

لجين أبو الدهب يقول...

والله ياايمى اظن السبب فى كل ده جهل الناس اولا وتغيير النفوس ثانيا ..

عارفة اكتر نقطة لفتت نظرى فى البووست بتاعك حكاية لما نقول لحد اتقى الله ..

فعلا كانك بتقولى له مثلا يامجرم ياحرامى ..

يقولك بتقوليلى انا اتقى الله ليه شايفنى حرام ..

جهل الناس وبعدها عن الدين سبب فى تغيير مفهوم حاجات كتير جدا فى حياتنا ..

ربنا يهدينا ويهدى بنا ويجعلنا سبب لمن اهتدى ..

ايمى الجميلة وحشتينى خاااالص ووحشتنى مدونتك الجميلة

دمتِ بخير ..

إيمان يقول...

د. ياسر عمر عبد الفتاح

ايوه هو السبب ابعادنا عن الدين

واحنا كمان عجبتنا اللعبه وقلنا تمام

ما احنا منعرفش

ربنا يردنا الى دينه ردا جميلا

اميييييييين

إيمان يقول...

منووش

أيوه الراجل بقى اى حاجه غير انه راجل

والست اى حاجه غيرانها تبقى ست

بس المشكله نلحق نفسنا ازاى

منوره وواحشانى جدا

إيمان يقول...

م / أحمد أبو العلا

عجبنى رأيك جداا

وخاصة الجمله

تربيه قفلت باب فطري في الانسان, فكان الطبيعي ان باب الفتنه يكون هوا المنفذ الوحيد للفطره

يلا ربنا يرحمنا ويصلح احوالنا جميعا

إيمان يقول...

دعاء

منوره يا جميل

الواحد تقوليلو اتقى الله يبصلك شزرا على اساس انك بتشتميه شتيمه جامده
وكأنه معصوم من الخطا وماشى صح فى كل حاجه
يلا ربنا يرحمنا جميعا ويصلح احوالنا

إيمان يقول...

ياسر سليم

اهلا بمرورك منور المدونة

هى فعلا احوالنا كلها بقت تحرق الدم

واللى يتأمل فى أحوالنا يجيله شلل دماغى من انقلاب الحقائق وفساد الاحوال
وحسبى الله ونعم الوكيل فى كل واحد يحب ان تشيع الفاحشة بين الناس

إيمان يقول...

أم مالك

ربنا ينزل رحماته علينا اصل الموضوع بقى صعب قوى
ربنا يرفع مقته وغضبه عنا
ويجعل الدنيا فى ادينا وليست فى قلوبنا

إيمان يقول...

ابو على

حمدا لله على السلامه

تعرف كلامك صح ميه فى الميه

دايما وضوح الهدف بيخلى الانسان

عارف هو رايح فين

ويروح ازاى

إيمان يقول...

د / عرفه

كل العلاقات الزوجيه اللى شوفتها فى حياتى كان فيها حب من الطرفين
طبعا كان فيه مشاكل وبلاوى
لكن كان فيه علاقة حب قوية اقوى كتير من قصص الافلام والاغانى .. معرفش مين بالظبط اللى زرع فى دماغ الناس غير كده
حسبى الله ونعم الوكيل فى كل واحد اشاع الفاحشه بين الناس وسوق للمعصيه
وتفه الطاعه
وسخر من صورة المشايخ

إيمان يقول...

هاجر يعقوب

تخمينك مش صح

محصلش حاجه فجرت الكلام ده جوايا

ولا حصل شئ معين

انما ممكن تقولى ايه اللى مش يغيظ ويفرس

ممكن تقولى ايه اللى ماشى صح وايه اللى معصبنيش

إيمان يقول...

استاذ بنجواتى

أهلا بيك دائما

المشكله اننا محتاجين نشجع بعض محتاجين اننا نتفق على الصح يعنى انا لما اقولك صلى اكيد انا كمان هتكسف مصليش
واكيد انا لما اشوفك بتصلى وتذكرنى بالصلاه هصلى لازم
تعرف المشكله فين المشكله اننا بقينا بنتكسف من الصح يعنى لو انت مش بتسمع اغانى هتتكسف تقول ليقولوا عليك عم الشيخ
ولو انت مش موافق على معصيه او خطأ هتتكسف تتكلم ليقولوا عليك شوف نفسك الاول انما كلمه شوف نفسك الاول دى من الشيطان يعنى لولا دفع الناس بعضهم بعضا
ولا ايه ؟

إيمان يقول...

مجرد مدونه

عندك حق الدعوه هى الحل بس المشكله ان الناس بتتعامل مع اللى بيدعو على انه مفروض يكون ملاك وبيتصيدولوا الاخطاء
وحسبى الله ونعم الوكيل

إيمان يقول...

لاسع افندى

انا معاك ان كلنا بنرتكب الغلط
ومستفدين من الفوضى واللخبطه
لكن لازم كلنا نساعد بعض
ومينفعش لما حد يقول كلمة حق لله نقوله شوف نفسك الاول
والا مفيش حد هيتكلم لأننا بشر مش ملايكه وكلنا أخطاء
منور المدونه يا لاسع افندى

إيمان يقول...

عاشقه الرومانسيه

عندك حق ميه فى الميه

بس المشكله ازاى نرجع تانى زى زمان

ازاى يرجع الخير فينا