الاثنين، 2 مارس 2009

أحمد .....رئيس الجمهوريه....1



أحمد هو شاب مصرى جدا ....قد ينطق بكلمه لا يلقى لها بالا
فيطرحك أرضا من كثرة الضحك
ولكنه وحين يعقد حاجبيه ..فليس أمامك سوى الإنسحاب التام
أحمد الجرئ ....هذا هو لقبه ..أحمد شاب (جدع) إلى أقصى الحدود
(صاحب واجب)..لا يتأخر عن تهنئة بفرح..أو مواساة فى جرح
عالى الهمه (سبع صنايع) ..
طموح جدا
(دماغه نضيف وعالى ) هكذا يصفه الأهل و الأصحاب
وسيم .. طويل القامه .خمرى البشره .. وفى أغلب الأحوال غيرمرتب المظهر
وكأنه لوحة فنيه جميله .... يعلوها الغبار
يتسم بصفه كنا نحتار فى تفسيرها كثيرا مما جعلنا نستسلم
لتفسير وحيد وهو أنه قد ولد بهذه الصفه

وأنها من بين خصائص جيناته الموروثه...وتلك الصفه هى
الميل المبالغ فيه للإعتقاد بأنه ... شخص فريد من نوعه
عندما كان أحمد فى الصف الثالث الإعدادى...خرج علينا بالبيان التالى
قررت أنا أحمد الجرئ أن طموحى هو أن أصبح رئيسا للجمهوريه
(ومالو ممكن ليه لأ )هكذا حاول أن يخفف عنا هول الصدمه
ولكنه وبعد فتره ليست بطويله ... قرر أن منصب رئيس الجمهوريه
لا يستحق العناء ...
(أنا ناقص وجع دماغ ) هكذا برر تخليه عن المنصب
وفى إجتماع أخر أطلعنا على سر رهيب ... وهو أنه قرر أن يصبح
(عمرو موسى)
ولكنه وبعد فتره ليست بطويله ..أعلن تخليه عن هذا الطموح
( أيه الميزه فى إن الواحد يكون بيتكلم كويس وبيظهر فى النشره)
هكذا برر تخليه عن عمرو موسى
لم نسمع شيئا من بيانات أحمد بعد ذلك لفتره من الزمن
أحمد نشأ فى بيت لأبوين ملتزمين يقيمان الصلاه و يؤتيان الذكاه
فحاول جاهدا أن يكون
(شابا نشأ فى طاعة الله )... يقيم الصلاه على وقتها
فى جماعه وفى المسجد ... يصل رحمه
يساعد المحتاج ...يقول الحق ولا يخشى فى الله لومة لائم
ولكنه وبعد إلقاء القبض على بعض أصدقائه بسبب
تجمعهم فى المسجد إكتفى بصلة الرحم ...ومساعدة المحتاج
وحين تخرج أحمد من كليته العمليه المرموقه... أعلن أنه لن يأخذ من أبيه
مليما بعد اليوم
( أنا خلاص بقيت راجل ومسؤول عن نفسى)
هكذا خطب فينا ...
ولكنه وبعد فتره قصيره جدا ... عاد إلى وعيه بعد أن إصطدم
بالواقع ...
( المرتب صغير هصرف على الموصلات ولا اللبس
ولا الشاى والسندوتشات..ده أنا خلاص جزمتى دابت وبقت فضيحه)
هكذا برر أحمد عودته إلى وعيه





يتبع

هناك 38 تعليقًا:

عاشقه وغلبانه يقول...

اول رد هييييه

عاشقه وغلبانه يقول...

هو احمد ده مابيثبتش علي قرار....؟؟؟
هو بيعرف يقرر بس مابيعرفش ينفذ ولا ايه....؟؟؟؟

إيمان يقول...

عاشقه وغلبانه
يا أهلا يا أهلا
ايه أخبار لحظات التجلى بتاعتك
مش هقولك أحمد هيعمل ايه البوست إللى جاى
بس احمد هيعجبك قوى
ولد بجد ميه ميه
يمكن كمان تعملى زيه
ربنا يستر

عاشقه الرومانسيه يقول...

اييييييييه ده؟
هى عاشقه وغلبانه
كانت قاعده على الباب؟
طيب انا هاعتبر نفسى
الاول مكرر
علشان معنوياتى ماتتجرحش
وهاقرا وارجع

احساس طفلة محبة للرومانسية بس واقعية يقول...

ايمان واضح ان احمد عندو صفات كتير كويسة
بس مش عارف يستغلها كويس
ودئما بيصطدم بالواقع
بس على الاقل بيحاول ومادام عندو طموح
يبقى اكيد هينجح بس يكون عندو اصرار
على النجاح ويبذل مجهود اكتر

تقبلى مرورى

احساس طفلة محبة للرومانسية بس واقعية يقول...

مابين عاشقة وعاشقة
ودئما بتسبقوا وتخدو اول تعليق كدا
هاهاهاهاهاهاهاهاهاها
مستنين نشوف احمد هيعمل اية يا ايمان ؟؟
مش تتأخرى علينا

إيمان يقول...

عاشقه الرومانسيه
صديقتى العزيزه
أنتى تيجى وقت ما أنتى عايزه
وعاشقه وغلبانه مش غريبه
صاحبة بيت يعنى
منورانى
أقرى بسرعه مستنياكى

عاشقه الرومانسيه يقول...

حال احمد هو حال كل المصريين
لو على طموحه فده طموح الشعب اللى الحكومه بتكسره على اول صخره
والشغل والفلوس اللى بيجيبوهاوتزيد قدامها الاسعار 3 اضعاف
الالتزام والتدين اللى الحكومه بتسميه ارهاب والاسلام برئ من الارهاب واهله
يمكن اكون فهمتك غلط
بس ده اللى حسيته اثناء قرائتى البوست

الله ينور عليكى
ومستنيه الباقى

إيمان يقول...

احساس طفلة محبة للرومانسية بس واقعية

يا اهلا يا أهلا بالناس إللى سهرانه
تخمينك فى محله
الولد أحمد ده ولد جامد جدا
بس ظروفه ملطشه زى كل الشباب
أدعيله بقه أصله محتاج للدعاء اليومين دول

إيمان يقول...

عاشقه الرومانسيه
فهمتينى صح جدا جدا جدا
الله ينور
الناس دماغها نضيفه والله
مش أحمد بس

حسام غانم يقول...

أحمد ده مثال لكل شاب مصري

بيبدأ من صغره عنده طموح وعزيمة وأهداف

وتدور الحياه ويفقد كل سنة هدف من أهدافه

إيمان يقول...

حسام غانم
أهلا بحسام الكاتب الفكاهى الكبيييييييير
على فكره أحمد لما كان فى سنك
كان خلاص إتظبط وبقى تمام
ولا عندى أهداف ولا يحزنون
كان خلاص خلص لحد كده
كان كل طموحه إنه يصرف على موصلاته وسندوتشاته
لا أكت ولا اقل
شكرا على مرورك
وصباح الفل

بنوتة يقول...

السلام عليكم
هى دى مشكلة كل الشباب
بيرسم للدنيا صورة حلوة أوى
ويطلع بيها لسابع سماوبعدين يلقى نفسه في سابع أرض من قسوة الواقع
على العموم احنا في انتظار الباقي
تحياتى ليكى

لجين أبو الدهب يقول...

شكلها كده حلوة ..

لا هى اكيد حلوة ما دام ايمان كتبها ..

متابعة ان شاء الله ..

بسمة انور يقول...

يا سلاااااااام على كتاباتك

انا منتظرة الحلقه القادمة على احر من الجمر

الفقيرة إلى الله أم البنات يقول...

والله يا إيمان كلنا عم أحمد ده
يلا منتظرين آخر بياناته العسكريه والمارشات بقى

متتأخريش علينا

SHAPE YOUR LIFE (ABOALI) يقول...

احمد تايه وسط الزحام
نفسه يبقى ليه شكل وعنوان
نفسه يبقى نفسه ويكون شخص مهم كمان
يا ترى مين قدوتى سؤال طرحه على نفسه كل الاحيان
يا ترى اكون مين وفين وامتى والان
يا ترى انا نفسى ولا ماليش مكان

احمد شخص جميل
نفسه بيقول غناوى ومواويل
نفسه حياته تكون موال
كله امل وسهر وشوق
كله عمل وفن وذوق

احمد شخص مبالغ
نفسه فى شقة وعروسه
نفسه فى فسحه ولفه
نفسه يكون مليان بسمه
نفسه الناس حواليه لمه

احمد شخص متلقب
نفسى اكون رئيس البلاد
ولا
نفسى اكلم العباد
ولا
نفسى اكون عبد
يااااااااريت يكون ربانى


احمد شخص جميل

نفسه يكون انسان
ودى اخر اماينه



امتاع ما بعده امتاع
شوق ما بعده شوق

انى اقرء ليكى يا ايمان


تحياتى

ستيتة يقول...

الطفل العربي
يبدأ عمره بذكاء حاد وأحلام تطول السحاب

ثم يدخل المدرسة وهنا يتضافر المعلم مع المنهج عن محو ذرة ذرة من ذكائه حتى ينهوه بشكل تام على الأعدادية
ويتحول الى مواطن شريف بوزوه طويل شوية .. جميل شبه الحمار

يبدأ ابناءنا بأحلام عالية
تتضافر الجهود حتى يكتفي بجزمة من بابا وهو 23 سنه

قولي قولي .. كلامك حكم يا ست انتي

وبعدين أنا معاكي لما تكوني ها تضربي عن الهوم وورك فاهمة

إيمان يقول...

بنوتة
إللى بتتكلمى عنه كلنا عشناه
وأحمد بالذات ولأنه كان بيتعامل
مع نفسه على إنها مفيش منها إتنين
تعب قووووووووووى لحد مفهم الواقع
بغباوته بسلطته ببابا غنوجه

إيمان يقول...

لجين أبو الدهب
شكرا يا جميل على المرور الجميل
مش هتأخر صدقينى
منوره دايما

إيمان يقول...

BAsMA
عثثثثل يا باسمه
منوره يا قمر..أخبار المذاكره أيه
شكرا على التشجيع
يا أهلا يا أهلا

إيمان يقول...

الفقيرة إلى الله أم البنات

أحمد زي أغلبنا..
بس صدقينى هيعجبك بالجامد
أدعيله بقى لأنه محتاج الدعاء
اليومين دول جدا
منورانى دايما

إيمان يقول...

ABOALI
احمد شخص مبالغ
نفسه فى شقة وعروسه
نفسه فى فسحه ولفه
نفسه يكون مليان بسمه
نفسه الناس حواليه لمه

أيه ده هو أنت تعرف أحمد
أوعى تكونوا صحاب شكلك كده تعرفه كويس
أحمد كان فعلا مميز ..وجميل
وكل طموحه إنه ياخد حقوقه العاديه
مركز إجتماعى يناسب تعليمه
وطبيعة شغله
زوجه عاديه ..شقه عاديه
لحظه سعيده ..لمة الأهل والأحباب
بس كان بيفهم وعارف إن دى أحلام صعبه
لذلك فكر إنه لو كان رئيس الجمهوريه يمكن يعرف يحققها
تحياتى وتقديرى لدماغك العاليه يا أبو على

إيمان يقول...

ستوته حبيبتى
الطفل المصرى ... هيعمل إضراب عن الهوم وورك
قبل مايجيله غباء مستحكم
كويس إنك معايا فى الموضوع ده


يبدأ ابناءنا بأحلام عالية
تتضافر الجهود حتى يكتفي بجزمة من بابا وهو 23 سنه

تتصورى إن حلم الجزمه ده بقه حلم قومى
بصى كده على جزم الشبا السمر الشداد
إللى زى الورد هتزعلى أوى
وبعدين عرفت سن أحمد منين؟؟!!
بعبك يا ست يا واعيه يا فاهمه إنتى

أم فريده يقول...

ايمى حبيتى

دايما بتحبى تعبرى بما بين السطور
والشاطر اللى يفهم

احمد هو وانا ايام ما كنت بدرس وغيرى كتير من الناس

كان عندى طموح برضة واصطدمت بالواقع وباشت

بس الحمد لله انا راضية عن حالى احسن من غيرى

مستنية بقيت الحكاية
عايزة اعرف احمد وصل لفين


تحياتى وسلامى ليكى

dodda يقول...

واضح ان احمد كان فى مرحله النمو و النضج
زى اللى بيدوق الاكل فى كل مرحله قبل ما يستوى
مره عشان الملح
ومره عشان التوابل
ومره استوى والا لسه
ومع كده عاجبنى احمد
تحسى انه جامد اوى زى المحشى :0)

إيمان يقول...

زوجة عنيدة
كويس إنك راضيه والحمد لله
المشكله إن الرجاله غيرنا لازم يعملوا
حاجه وميرضوش بقليلهم علشان يعرفوا يعيشوا
تحياتى ليكى ولحماتك
أنا جايه عندك كمان شويه

إيمان يقول...

dodda
ومع كده عاجبنى احمد

هو فعلا ولد بجد شخصيه ودماغ ويعجب أى حد
دعواتك ليه بقى

غير معرف يقول...

looooooooooooooooooooooooooooolll 3agabe 2we 2no 3ad llwak3 b2a5l2k matwlsh y3ne ......


rbna ma3ah w ma3ana ya ret b2a n3rf 7asl 2eh tane

مهندس / على درويش يقول...

تعليق معلق حتي قراءه باقي القصه
لن احكم على شخص من خلا بعض التصرفات التي قد تكون غير ملمه بكل صفاته



تعليقي مؤجل

تامر علي يقول...

جميل جداً هذا التحليل ....خصوصاً اكتفائه بكل ماليس ورائه وجع دماغ عن كل ما وراءه وجع دماغ

راجل عجوز كده أعرفه كنت باتكلم معاه عن موضوع مشابه قاللي " الشباب دلوقتي عجيب ... يبقى الواد من دول طوله مترين .... وعنده 30 سنه ... واسمه حماده .... ولسه ابوه بيصرف عليه حتى بعد الجواز .... وبعد كده يقولك الحياه مظاهر .... جتكو نيله في ايامكو الهباب"
طبعاً مكنش يقصدني أنا كمان برضو:)

marmar يقول...

انا معرفهوش ولا دخلت عنده ولا عندك قبل كده
بس باين عليكي بتعزيه اوي من كلامك الجميل عليه
واكيد الكلام الجميل ده ميطلعش برا انسانه جميله زيك واكيد هو في نظرك يتستحق كل الكلام ده واكتر كمان ..
ربنا يوفقه ويهديه ويوفقك يا جميله

تحياتي

إيمان يقول...

غير معرف
للللللول ...منور

إيمان يقول...

مهندس / على درويش

سأنتظر ردك فى النهايه
من الصعب فعلا إصدار أى حكم الأن
تحياتى على التأنى
الصبر جميل

إيمان يقول...

تامر علي

الناس الكبار دول دايما ظالمينا والله
ربنا يسامحهم
هو كان حد فيهم يقدر يفتح بقه
أيام جمال عبد الناصر
ماشى ماشى
مش هننكر فضلهم علينا برده

إيمان يقول...

marmar
أهلا بيكى
الموضوع مش لأنى بحبه...
هو فعلا إنسان جميل ربنا يوفقه
وهو مش مدون
سعيده بمرورك

hasona يقول...

كلنا نمر بذلك الاحساس
ولكن بنحاول نقنع أنفسنا حسب قدرتنا
وفي حدود قدرتنا بنتعامل مع الواقع
ومش بنتخلي عن أحلامنا الا اذا تخلت عنا

مش مجرد تغير خطط ونهج
الحياة أصعب من ذلك
وفي أوقات كثيرة
نجد الحياة سهلة
وأيسر مما نفكره فيها
ولا تحتاج الي ذلك التعقيد


تحياتي

إيمان يقول...

hasona
مش لاقيه كلام بعد كلامك
ساعات فعلا بتبقى الحياه سهله
وأسهل مما نتخيل
وفجأه وبدون سبب بتبقى صعبه
صعبه جدا
ساعتها مفيش قدمنا غير إننا نتمسك بأحلامنا
ونحاول تانى
سعيده جدا بمرورك