الجمعة، 30 أبريل 2010

الساعة اتغيرت ( أتحزم وأرقص ) ؟؟!!!!!


نيمت الولاد ولأول مرة منذ سنوات طوال ربنا يهديهم ويناموا بدرى زى اي ناس طبيعية صاحية من الساعة ستةالصبح 
لقيت البيت هادي والولاد ناموا بدري قولت لا لا لا حرام النوم لما أقعد أقرا شوية على الكامبيوترررر ولا استفرج على مسلسل عودة الندل ولا أعمل اى حاجه ملهاش لازمه يمكن احس انى انسانه ملهاش لازمه ومحدش عايز منها حاجه لها لازمه
فتحت التلفزيون واللاب توب وجبت كتابين تلاته جمبى ( حرمان بقى )
ويدوب لسه بقعد عيني جت على الساعة فى اللاب توب لقيتها واحده وربع اتفزعت وقولت لنفسي هي مش لسه كانت الساعة 11 ونص ايه اللاب توب اتكهرب ولا ايه ؟؟؟
وبعدين بصيت فى الساعة اللى فى الحيطه لقيتها 12 و13 دقيقه تنفست الصعداء وقولت الحمد لله حد لعب في ساعة اللاب توب مجراش حاجه .. أخدت سهرتي وأخر مزاج أبص شوية على مسلسل عودة لندل .. وشوية على اللاب توب.. وفتحت الكتب كلهم وحطيتهم جمب بعض زي سعيد صالح في العيال كبرت..
ثم وفي لحظة انتصر فيها العقل على الرغبات الدفينة ترأى لي أن أذهب الى النوم وكفايه كده ملوش لازمه السهر زياده عن اللزوم .. قوم أيه عنيه جت تاني على ساعة اللاب توب لقيتها اربعة قولت يا نهار ابيض ملوش ملامح لما اقوم اصلي الفجر وبعدين افتكرت ان الفجر لسه مأذنش وأفتكرت ان الساعة حد لعب فيها .. وبعدين نورت فوق دماغي لمبة وبعدين اللمبة اتحولت لبمبه وبعدين البمبه انفجرت ووقعت فوق دماغى
اللا تكون الساعه اتغيرت يا نفيسه
اه صحيح ده احنا في ابريل وابريل كله كدب زي ما انتوا عارفين
فتحت موقع مصراوي وتأكد لدي الخبر ونزلت دموع الحصرة من عيني الساعة بقت 5 ونص وانا لسه صاحية ونهارى بكرة مهبب بهباب ومسلسل عودة الندل اللى اتفرجت عيه وز وز هيطلع عليه بط بط.ماذا أقول في أضلع مزقتها حصرة عليكي يا ايتها الساعة الضائعة .. منه لله اللى شال الساعة 

هناك 8 تعليقات:

عاشقه الرومانسيه يقول...

اوووووووووول تعليق
بعد تغيير الساعه

عاشقه الرومانسيه يقول...

تعرفى انى بسبب تغير الساعه دى
كنت هاخلى الشغل كللللللللله وزمايلى يغيروها قبل معادها بيومين
اول امبارح ماما قالت لى الساعه هتتغير
قوم ايييييييه غيرت ساعاتى وظبطت الموبايلات واتصلت بزمايلى والناس كلها غيرت الساعه على اساس انى قلت لهم
لحد ما ربنا كرمنى بواحده بتفهم وقالت لى الساعه بتتغير اخر خميس فى ابريل يعنى لسسسسه
وطبعا كان شكلى وحششششششش
وده جزاء اللى يسمع كلام ماما



تعرفى ياايمى اننا البلد الوحييييده اللى بتغير توقيتها؟؟؟!!!
انا نفسى افهم ليييييييييييييييه
لو تعرفى عرفينى ينوبك فيا ثواب
(:
وحشتينى قوى ياايمى والله

ستيتة يقول...

هههههههههههههههههههههههههه
طب انا راضية ذمتك
مضحكش يعني ازاي
وازاي اخفي الضحك اللي جوايا كله

هانت
هاااااااااااااااااانت
يعني صبرتي كتير كلها سنة واحدة وزي اليومين دول كل واحد فيهم يبقى على وش جواز :)

بس تعرفي لو لقيت يحي أو ياسمين جايين في الطريق
ساعتها
ساعتها
مش ها اعمل حاجة
هضحك عليكي علني مع سبق الإرصاد والترصد :)

sony2000 يقول...

هههههههههه
وضحكتو كما لم اضحك من قبل
يعني ابرييييييييييييييييييل وكمان الساعه
خبطتين فالراس توجع:)
فكرتيني بالراجل اللي قال:منكو لله ياللي شلتو السلم...لملم...لملم:)

SHAPE YOUR LIFE (ABOALI) يقول...

هوهو هو هو
نامى نامى نناهو
الساعة الساعة اتغيرت اهو
ووووووووووووووواء
وووووووووووووووووواء

اعلنت ساعة جمهورية مصر العربية التغير
بتقديم ساعة زمنية لزوم الحنية والعيشة الملائكية
ان العمل والمواطن هما اساسا التغير
فبدون الاجتهاد ما حدث التغير
والساعة هى العنوان الكبير
وسلامى الى الضفدع الكبير
حزر فزر الضفدع مين ؟
ان عرفت الحل اتصل ب 0900
ترن ترن
الو الو مين مين
يا فندم يسعدنى تهنئتكم باءنك كنت من سعداء الحظ الفائزين معانا
هيييييييييييييييييييييه
وتلك هى الجود نيوز
اما الباد نيوز
انه بعد الفحص تبين
ان الاتصال تم بعد تغير الساعة
وبالتالى اصبحت فى يوم جديد
عذرا لذا لزم التنوية
انك لم تتصل فى الزمان المطلوب
يلا بقى اتحزم وارقص
هههههههههههههههههههههههه

تقديرى

غير معرف يقول...

طيب ماتاني يوم كاناجازه :) ..

كل ساعه وانتي طيبه :)

تحياتي

Lady E يقول...

منه لله اللي شال الساعة فعلا :)

لجين أبو الدهب يقول...

انا بقى وقتها كنت فى الشارع وحاسة ان الدنيا لسه بدرى وهانرح بدرى على الساعة 12 كده ولا حاجة
لاقيت حد بيسأل حد فى المواصلات هى الساعة كام قاله 2 الا ربع

نزلت عليا صاعقة طبعا ان احنا لسه فى الشارع لغاية دلوقتى

ونزلت على دماغى نفس البمبة اللى نزلت على دماغك ..D:


يارب تكونى بخير ياايمى ..
بجد وحشتينى جدا

دمتش بخير ..