الأحد، 15 أغسطس 2010

اللهم اني صائمة

الكاتب الكبير / وحيد حامد
كلمه واحده هرد بيها على كل انتاجك الفني .. يعععععععععععععععععععععععععععععععععععع

بجد ريحة افكار سيادتك فايحه .. ريحتها فايحه أخر حاجه

وخاصة في مسلسل الجماعه أخر أعمالك واضح جدااااا إنه مسلسل موجه علشان إنتخابات الرياسه اللى جاية
حاسه وانا بتفرج عليه انه متصور من عشر سنين ايام ماكان الناس بتصدق اي حاجه وسهل تاكلو على دماغهم طبيخ
بس ياريت لما تعمل حاجه زي كده ابقى اتعب نفسك شويه واعملها حاجه مظبوطه ومقنعه تغطى على السم المستخبى يبقى سم فى عسل مش سم فى مش وبدودو كمان .......بصراحه استخفاف بالعقول وحاجه تخنق .. وبعدين ايه اللى دخل الجماعه فى الدين مش عجباك الجماعه انت حر بس متفتيش علينا في الدين وتفهمنا دينا( ونظام الدين معامله والحجاب حجاب القلب والكلام اللى يخنق ده خليه لحضرتك ) وبلاش تعمل فيها مصلح اجتماعي وشيخ طريقه

أنا بتكلم الكلام ده بصفتي مواطنه عااااااااديه من اللى انتوا بتشتغلوها ليل نهار لا أنا إخوانجيه ولا مؤيده للجماعه ولا بفكر انتخب حد فيهم لو حصل ورشح نفسه .. بس برضو شايفه أنها جماعه سياسيه زي اي جماعه من حقهم يحلموا بالسلطه ومن حقهم يتخذوا المنهج اللى شايفينوا صح زي اي حزب سياسي ومن حقى انا ارفضهم او اقبلهم لكن مش من حقي ولا من حق اى حد انه يسفه من افكارهم
وشايفه انه مش معنى انها جماعه اسلاميه تبقى ارهابية أو بتتمول من منظمات اجنبية اصل المرادى مش هتقدروا تقولوا ايران بعد مفلقتوا دماغنا بقصة المد الشيعي اللى عايز يقضي على السنة ويحتل العااااااااااالم
ياريت بقى محدش يعمل واصي علينا واللى عايز يمسح جوخ للحكومه يمسح بس بعيد عننا
.........مليتوا البلد

هناك 14 تعليقًا:

تامر علي يقول...

للأسف مثل هذه النوعيات هي ما تفتح لها المنابر الإعلامية كلها بدون قيود أو شروط ولكن نع هذا فإن مثل هذا الهراء المثير للغثيان لاينطلي حتى على عامة الناس فعلاً يععععع :)))

تحياتي

محمد التركى يقول...

السلام عليكم
ايمان
كل سنه وأنتى طيبه
ورمضان كريم

أنا بريح دماغى ومبشوفش ولا اى مسلسل فى رمضان
وابدء اخدهم مزمزه بعد رمضان

بس بره عن موضوع المسلسل ده
أنا مش هحكم عليه لانى مشفتوش
بس هعلق على كام كلمه من كلامك
بخصوص الاخوان المسلمين
البلد ديه ماشيه احزاب اه
بس ولا الاخوان ولا غيرهم عدلين خلى بالك
لو الاخوان مسكو الحكم
هيبهدلو الدنيا
وهيدخلونا فى حوارات وبلاوى أقصد هيدخلو مصر وهيوقعونا مع العالم
وهيطلع عنينه اكتر من دلوقتى
ثم ياستى ولا تزعلى نفسك
الاخوان مش بتمويل ايران ولا حزب الله بتاع لبنان
دول بتمويل الاخطر من كده
بعيد عنا وعن السامعين اللى ميتسموش
امريكا
يعنى دمار شامل
ربنا يسترها علينا قادر كريم
ويبعد الشيعه والاخوان وكل اللى ميخفش على الشعب ده
بعيد عننا

موضوع حلو جدا
تقبلى تحياتى

محمد التركى

ستيتة يقول...

مشفتش المسلسل
بس متوقعة والله
من عادل امام مفتي الصفيح الساخن لصديقه وحيد ها نشوف ايه يعني؟
لازم نشوف حجاب القلب
وواحد بيشاور على قلبه وبيقول الدين هنا وهو مسبل لي
بس خلاويص

إيمان يقول...

تامر على

أه للأسف وعلشان كده لما شفت المسلسل حسيت انى هتشل ايه الغباوه والسطحيه دى ده ولا حكايات ماما نجوى
والحوار والسيناريو ضياع في ضياع
يارب ارحمنا برحمتك والله بجد مش ناقصه شلل هى اصلا ماشيه بالعافية

إيمان يقول...

محمد التركي

كل سنة وانت طيب

الصراحه انا مبشفش المسلسلات لا في رمضان ولا بعده كل الحكاية انى كنت في زيارة ناس معرفه وهم اللي كانوا متابعين المسلسل وكل اللي شوفته هي حلقه يتيمه بس كمية الهبل و العبط كانت عالية مووووووووت وجرعة السخافة والهراء كانت حاجه تقرف بصراحه
والقصة هنا مش قصة اخوان و لا اصدقاء ولا وطني ولا وفد ولا يحزنون ولا الموضوع موضوع أمريكا وموزبيق
لأن السياسات الدوليه دي لعبه كبيره شويتين والقصه أكبر من اللى أنت بتتكلم فيه وقصة الإخوان قصه تتطول وأنا بصراحه مبحبش أدخل فى الكلام فيها وقصة أمريكاولعبها في المنطقة برضو قصة كبيرة وشرحها برضو يطول
أنا كل اللى عصبني أن اللى بيحارب الدين الإسلامي مننا وفينا ليه بتدخل الدين في الأخوان وليه بتفتي في شئ أنت متعرفش عنه حاجه أصلا
وعصبني أكتر الاستخفاف بالمشاهد وسطحية الحوار .. الحوار سطحي وعبيط بشكل ينرفز وكله على حساب صاحب الليله

إيمان يقول...

ستوتي حبيبتى

أيوه والله وأنا كمان كنت متوقعه كده

بس حظى المهبب وقعنى في الحلقه دي

إتفرجت عليها بالصدفه البحته

وادى نتيجة اللى ميسمعش كلمه ماما تقولها

دمي فار وقرفت في عشتي وحسيت انى عايزه اقول يعععععععععععععععععععععععععع

دايما كلامك كده بيبقى فى الجون
اننى أحبك يا أختاه

Alaasalim2 يقول...

السلام عليكم

بجد معاكي حق في كل كلمة قلتيها
مسلسل أقل ما يقال على اللي كتبه وأخرجه إنه شخص سفيه
يبدوا إنهم عارفين إن الناس معلوماتها قليلة عن الإخوان فقرروا يعملوا مسلسل ينسيهم القليل اللي هما عارفينه
دا غير فعلا الوصايه الدينيه اللي عاملها في المسلسل وموضوع الحجاب والنقاب وخلافه
عموماً زي ما قلتي تماماً معدش الكلام دا بيأثر في حد ولا بيقنع حد

غير معرف يقول...

موش شفته بس سامعه انه يععععع فعلا

ده نفاق معتاد ماتاخديش في بالك

كل سنه وانت طيبه

تحياتي

د.خالدأمين يقول...

السلام عليكم الاول



الاول طبعا انا تقريبا شوفت حلقه واحده من المسلسل ده وفعلا معجبنيش الطرح والكلام عن الشيخ خاصه في المشهد اللي كان فيه وهو طفل وبيتفق مع الاطفال زمايله انهم يلعبوا مؤمنين وكفار بدل العسكر والحراميه

وبعدين ضرب واحدمن اصحبه وفقال لابوه انها كانت لعبه



مش عارف حد شاف المشهد او الحلقه دي والا لا

بس عموما انا مفكرتش اشوفه تاني


وكويس جدا اني ظروفي مش بتسمحلي اساسا اشوف مسلسلات


لكن يمكن يكون هو ده رايه

زي ما فيه ناس كتير رايها وحش في الجماعه دي وان كانت بعض طموحاتها جائزه

بس الفرق بس انه صوتته عالي شويه بس وواصل للناس


يصدقوه بقي ميصدقهوش دي عندهم هم بقي


بس عموما


اللي عاوز يرد بيرد في مكانه زي مانتي رديتي والموضوع مكيخرجش بره انه عرض للاراء



مش هيبطلوا استخفاف واللي اتعود علي فكر واسلوب مش هيتغير


بصي للاجيال اللي جايه واللي زيك وانتي تفرحي


مستقبلنا اكيد كويس طول مابنفكر



تقبلي تحياتي

moky يقول...

السلام عليكم ورحمة الله وبركاته
أختى إيمان
أكتر حاجة اللى تخافى منها اللى ماتعرفهوش
هل أنتى تعلمين ما مصادر تمويل جماعة الأخوان
هل أنتى تعلمين ما هدف جماعة الأخوان
هل أنتى تعلمين نشاط جماعة الأخوان
طبعا لأ ولا انا اعرف ولا حد يعرف
علشان كده نخاف منهم
صحيح البلد فيها فساد بس ربنايفرج عنا الغم ده
ده مش دفاع عن مسلسل ولا شخص ولا سيناريو
لا ده علشان انا مش بأيد جماعة تحكم وانا ماعرفش عنها حاجة
الجماعة تفهمنا كل حاجة عنها واهدافها الحقيقية وبعدين نقرر ولا انا غلطان

وبخصوص الشيعة
مافيش حد مايعرفش ان الشيعة هما سبب مقتل الخليفة عثمان بن عفان و مقتل الخليفة على بن ابى طالب وليهم نشاطات وتعاملات مع اليهود وده مثبت بصور منشورة فى كل حته وتعاملاتهم مع امريكا
والشيعة فى كتبهم بيقولوا ان احنا عندنا 3/4 القرأن وال 1/4 الاخير نزل على السيدة فاطمة من سيدنا جبريل ليخفف عنا الحزن
وان الله يقول فى القرأن اذبحوا بقرة والبقرة دى بيقولوا انها السيدة عائشة ولا عواذ بالله
والشيعة بيكرهونا اكتر ما اليهود بيكرهونا وليهم اهداف يقضوا علينا
وبينشروا مذهب التشييع فى كل حته حتى ان وصل مصر

اختى انا مش بانقدك ولا باهاجمك
بس باناقشك بوجهة نظر وحقايق قدامنا واتمنى مايكونش فيه خلاف

Ruwida Ashour يقول...

بجد كلامك صح .............موفقة انشالله

غير معرف يقول...

كل سنه وانتي طيبه يا جميله :)

معلش لو كنت موش قدرت أتابعك في رمان :)

عيد سعيد عليكي وعلى كل الاسره :)

كلمات من نور يقول...

أضم صوتي لصوتك وداه من خلال من سمعته من الناس .أصل أنا ماليش في التلفزيون خالص بس فعلا : ينفع أقول يع مرات ومرات أصل ملهاش جمع؟

عيد سعيد

إيمان يقول...

شكرا لكل اللي علق على الموضوع واللى قراه
وشكرا للى اتفق معايا وللى اختلف
وسامحونى لو مكنتش رديت على تعليقاتكم فى وقتها واكيد ده مش معناه انى قرأتها فى وقتها وسعدت بيها وباهتمامكم بتبادل الاراء
وكل سنة وانتم جميعااا بخير وسعاده