الجمعة، 30 أبريل، 2010

الساعة اتغيرت ( أتحزم وأرقص ) ؟؟!!!!!


نيمت الولاد ولأول مرة منذ سنوات طوال ربنا يهديهم ويناموا بدرى زى اي ناس طبيعية صاحية من الساعة ستةالصبح 
لقيت البيت هادي والولاد ناموا بدري قولت لا لا لا حرام النوم لما أقعد أقرا شوية على الكامبيوترررر ولا استفرج على مسلسل عودة الندل ولا أعمل اى حاجه ملهاش لازمه يمكن احس انى انسانه ملهاش لازمه ومحدش عايز منها حاجه لها لازمه
فتحت التلفزيون واللاب توب وجبت كتابين تلاته جمبى ( حرمان بقى )
ويدوب لسه بقعد عيني جت على الساعة فى اللاب توب لقيتها واحده وربع اتفزعت وقولت لنفسي هي مش لسه كانت الساعة 11 ونص ايه اللاب توب اتكهرب ولا ايه ؟؟؟
وبعدين بصيت فى الساعة اللى فى الحيطه لقيتها 12 و13 دقيقه تنفست الصعداء وقولت الحمد لله حد لعب في ساعة اللاب توب مجراش حاجه .. أخدت سهرتي وأخر مزاج أبص شوية على مسلسل عودة لندل .. وشوية على اللاب توب.. وفتحت الكتب كلهم وحطيتهم جمب بعض زي سعيد صالح في العيال كبرت..
ثم وفي لحظة انتصر فيها العقل على الرغبات الدفينة ترأى لي أن أذهب الى النوم وكفايه كده ملوش لازمه السهر زياده عن اللزوم .. قوم أيه عنيه جت تاني على ساعة اللاب توب لقيتها اربعة قولت يا نهار ابيض ملوش ملامح لما اقوم اصلي الفجر وبعدين افتكرت ان الفجر لسه مأذنش وأفتكرت ان الساعة حد لعب فيها .. وبعدين نورت فوق دماغي لمبة وبعدين اللمبة اتحولت لبمبه وبعدين البمبه انفجرت ووقعت فوق دماغى
اللا تكون الساعه اتغيرت يا نفيسه
اه صحيح ده احنا في ابريل وابريل كله كدب زي ما انتوا عارفين
فتحت موقع مصراوي وتأكد لدي الخبر ونزلت دموع الحصرة من عيني الساعة بقت 5 ونص وانا لسه صاحية ونهارى بكرة مهبب بهباب ومسلسل عودة الندل اللى اتفرجت عيه وز وز هيطلع عليه بط بط.ماذا أقول في أضلع مزقتها حصرة عليكي يا ايتها الساعة الضائعة .. منه لله اللى شال الساعة 

الجمعة، 23 أبريل، 2010

كيلو بتنجان


بالصدفة وقعت يدي على أجندة عام2001( في هذا العام تخرجت و تزوجت بعد التخرج بشهرين )  
في هذه الأجنده دونت بعض القوائم المختلفة لأشياء كنت أود فعلها أو أشياء كنت أود شرائها ودونت أيضا بعض الكلمات والأفكار وشوية شعر حلمنتيشي
وقد راعني ( حلوه راعني دي ) ما قرأت في أجندتي العزيزة وعرفت أد أيه غيرني الزواج و وساعدني على تحقيق أحلامي
أنا مش هعلق أنا هسبكم أنتم تعلقوا

مايو 2001
يجب أن أبدأ في وضع جدول لمراجعة المواد
أريد أن احصل هذا العام على تقدير أمتياز جميل أن التقدير النهائي في كليتنا العزيزة
يحسب بالرجوع لتقدير أخر عام علي أن اراجع أولا
1- الكيمياء البيولوجية
2_ الفارما كولجي
3_الفارما كوكنوزي
يجب أن أركز في مذاكرة الفارما كوكنوزي فدراسة الأعشاب الطبية شئ مهم جداا أشعر أنه قد يشكل تغيرا في مفهوم العلاج وصناعة الأدوية في مصر والعالم
باقي المواد سأرتب جدولها في وقت لاحق


يونيه 2001
كلمات أعجبتني
يجب أن تكون أنت التغيير الذي تود أن تراه
انك لن تكون سيد نفسك حتى يكون بمقدورك وضع إهتمامك حيث تريد ولن تسعد أبدا حتي يصير بمقدورك أن تحدد ما ستفكر فيه الساعة القادمة
إن إرادة الاعداد للفوز أهم من ارادة الفوز
كل شخص يعيش من خلال بيع شيئا ما
ان الشخص الخجول هو اكثر الناس أنانية على وجه الارض
كن انت الحدث
لا تعيش في الماضي الا اذا كنت تريد ان تشعر بالذنب ولا تفكر في المستقبل الا اذا اردت ان تخاف انما ركز على الحاض اذا اردت ان تكون سعيدا
كلما عرقت وقت السلم وفرت الدم وقت الحرب


يوليه 2001
روايات وكتب أريد شرائها
الرحيق المختوم
التذكرة
حديث الصباح والمساء لنجيب محفوظ
ليالي ألف ليلة لنجيب محفوظ
قلب الليل

بعد صفحة
قائمة بعواصم الدول العربية
وتأريخ لبعض الأحداث المهمه





يونيه 2001
باقي على الزفاف شهرين
مطلوب شراء
1_ 2 شبشب حمام
2- طقم دواسات للحمام
3_شنطة بني وأخرى (أوف وايت )
4_ صندوق للقمامة
5_ طقم معالق للإستعمال اليومي
6_ قماش الستائر


أغسطس 2001
باقي على الفرح عشرة أيام
تذكري الإتصال بالكوافير وتأكيد الموعد
تحضير شنطة السفر
شراء حذاء مريح للخروج في النهار
شراء إيشارب أزرق للطقم الفحلقي

30 أكتوبر 2001

الخامسة فجرا

جئت اليكي لأصفح عنك
وأوقظ شوقا مضى وأستكان
ألملم بعضا وأنثر بعضا
يثور بقلبي هواك طوفان
أحمل زهورا وأشلاء حلم
ظل بقلبي رغم الزمان
وخوفا بقلبي يلهو بعقلي
ويملأ حولي كل المكان
أقبلت ضحكا .. ترى تذكريني؟
وتذكرين مثلي كل ما كان
كيف ألتقينا وكيف أفترقنا
وكيف تبعثر فينا الحنان
وكيف أنتفضنا من الذعر لما
تفرق شمل العاشقان

توقف الالهام عند هذا الحد

واضح أني كنت فاضية ومفيش ورايا حاجه


ديسمبر 2001

سوبر ماركت

زيت 18 جنيه
برسيل 32جنيه
سكر
ارز
مناديل مطبخ
بريل
شاور جيل
شامبو
دقيق
فانيليا
جيلي
صلصة و مربى
كمفورت ومناديل حمام

يناير 2002

طلبات الاسبوع

عيش
جبنة بيضاء
جبنة رومي
2 كيلو بانيه
كيلو لحمه مفرومه
فرخه
3كيلو طماطم
2كيلو خيار
2كيلو تفاح
2كيلو موز
3 كيلو لبن

مارس 2002
قائمة العزومة
صينية لازنيا
فراخ مشوية
ارز بسمتى بالخضار
صينية بطاطس باللحمة
سمبوسه بالجبنة واللحمة المفرومة
لحمه بارده
طاجن بامية باللحمة الضاني


مايو 2002
طريقة عمل بسكوت النشا

بعد صفحتين

طريقةعمل البتي فور
فى نفس الصفحة
طريقة عمل كيكه بالكريم كراميل

يونيه 2002
التجهييز للسفر

تتبيل البانيه والشاورمة
فتح العيش ووضعه في كيس مغلق
زجاجات عصير وكانزات

زى ما يكون مسافرين فى الصحرا:(


أغسطس 2002

مطلوب شراء

2 فرخه وسط بلدي
كيلو خيار
علبة طحينة
مفارش بلاستك للسفرة
علبتين زبادي
عشر بيضات كبيره
كيلو بتنجان رومي لعمل ( بابا غنوج )
مريلة مطبخ
فوط للمطبخ


وللأسف الأجندة خلصت