الأربعاء، 28 يناير 2009

دينر بوكس من كنتاكى




منذ بداية معرض القاهره الدولى للكتاب وأنا أنوى الذهاب ...وكل يوم تظهر أمامى عقبه تمنع ذهابى ...كعادتى كلما حاولت عمل أى شئ أحبه تتراكم أمامى العقبات ... ولكن اليوم كانت الظروف مهيئه وتمام التمام ... أختى الأصغر أنهت إمتحاناتها بالأمس ... ووافقت أن تعتنى بأطفالى سابقا {العفاريت حاليا} ... والبيت تمام ... وطعام الغداء ليس مهما فقد تناولوا العداء بالأمس {مش كل يوم } .... بقى شئ واحد الصحبه فمن غير المعقول أن أذهب بطولى .. و أخذت أفكر من ستكون سعيده الحظ التى ستأتى معى فكلهن يتهافتن على مقابلتى ولكننى دائما مشغوله ... حسنا سأتصل ب{ر} أكيد هتطير من الفرحه عندما أنعم عليها بمصاحبتى ... ولكنها إعتذرت { سورى يا جميل أنا نفسى أشوفك والله بس إنت عارفه إحنا أخر الشهر وبنكمل عشانا نوم ... يلا باى } ... ونزل على الخبر كالصاعقه ... ولكن ما المشكله الأصحاب كتير ربنا يبارك ... فرفعت السماعه وإتصلت ب {س} أهلا {س} ... فرحتها بإتصالى بها أيقظت الأمل فى روحى الحائره .. ولكن ذلك الأمل تلاشى سريعا عندما عرضت عليها الفكره فأخذت تتمتم وتهمهم ..{أه ه ه ... مش عارفه والله أصلى بقالى شهر مروحتش عند مامى دى هتزعل منى قوى لو إعتذرتلها على العموم هشوف .. ولا أقولك روحى إنت وأنا هحاول أحصلك ...طبعا لا هتحصلنى ولا حاجه بمبه}عادى جدا .. بتحصل ... وإتصلت ب{أ} ... وقالت {ياه بجد ده أنا نفسى أشوفك موت بس أنا عندى معاد مع الترزى مقدرش أعتذر .. بصى لو خلصت بدرى هكلمك .} .................. أه طيب سأحاول أن أؤثر على زوجى لأقنعه أن يأخذ أجازه ليأتى معى .... ومن غير تفاصيل بالطبع فشلت فشل زريع ... فليس من المعقول أن يأخذ أجازه ليأتى معى إلى معرض الكتاب حيث اللف على كعوب الرجلين وحيث المصاريف من غير داعى وممكن تبقى مصيبه وأطلب {دينر بوكس من كنتاكى مع إنى مقاطعه} ولذلك رفض الفكره رفض تام... قررت أن أذهب بطولى ولا الحوجه لحد .... ولكنى إكتشفت وللأسف إن أى شئ نفعله من غير صحبه مهما كان ممتعا بالنسبه لنا فهو لا شئ ... عندما نكون وحدنا تفقد الأشياء بريقها {حتى الدينر بوكس السبايسى بتاع كنتاكى}.. لذلك قررت ألا أغيب عن أصدقائى ثانيه ويحصل إللى يحصل

هناك 13 تعليقًا:

ريكو يقول...

معاكى حق أى شىء من غير صحبة مالوش طعم
ربنا مايكتبهاش علينا أبدا
تحياتى

إيمان يقول...

يا سلام ياريكو... دايما منورانى كده...ربنا يخليكى وميكتبش عليكى الوحده أبدا ... ولا يحوجك لحد أبدا...وتفضلى منورانى كده علطول

Unknown يقول...

هههههههه كله مشغول ما هو طبعا لما نغيب عن الناس فترة ونعتذر كمان من حقهم هما كمان يعتذروا
مودتي

إيمان يقول...

شكرا لمرورك الجميل .... وعندك حق أنا إللى أستاهل عشت الدور عملت فيها مديره ,,, وكل ما حد يكلمنى أو يطلب ميعاد أعمل فيها خالتى المشغوله يلا ربنا يسامحنا جميعا

ستيتة يقول...

ولا تشيلي هم انا بدور على صحبه لمعرض الكتاب اللي واثقة اني لو رحته لوحدي ها أكتئب انا معااااااااااااكي في الليله دي وخاصة ان العيال خلصت امتحانات وخلصت علي
وبدل الدينر بوكس علشان المقاطعة نطب على عم عبده تلوث بتاع الكبدة الاسكندراني ونديها
ها قولتي ايه؟
مبروك المدونة وقصة صفاء لها اصداء في نفسي من الثانوية ايضا متأكده انك مش برج جدي بس تايه؟

إيمان يقول...

بجد عسسسسسسسسسسسسسسسسسسل يا ستيته .. هو أنا أطول أروح المعرض معاكى ظبطى ويلا أدينى ميعاد
للأسف أنا دلو هو مش باين عليه ؟؟؟

الفقيرة إلى الله أم البنات يقول...

انا عرفت مدونتك من عند ستيته
ولانى بثق فى دماغ ستيته دخلت على مدونتك على طول
والحقيقه يادوب قرأت البوست ده ولسه هاكمل لو بنتى ونورب عينى توقفت عن الزن
شوفى قبل ما الزن يتحول لصريخ
انا مش مع المثل اللى بيقول الجنه من غير ناس ما تنداس
ليه بقى تنداس ونص حد طايل الجنه
وبخصوص معرض الكتاب
معاك زجاجة ميه وسندويتش مفيش باتيه من بتاع فرج الله ..وطبع ريفو او أى مسكن وابدأى العمل
بصراحه قمة الاستمتاع لما نروح المعرض من غير ميكون معانا حد
علشان نتفحص براحتنا
الله يرحم ايام الجامعه
كانت فى القرن الماضى وكنا بنروح كلنا بس كل حد فى مكان محدش بيشغل حد
دلوقت لو حصل وروحت أنا وابو البنات والبنات
يبقى كارثه من كوارث الطبيعه حلت على دماغى
زن من العيال...وزن وشخط من ابوهم برضه
يا بنتى روحى لوحدك تبقى ملكة زمانك
سؤال ولو إنه غبى
هو المعرض لسه شغال ولا خلاص
عاوزة اروح انفرد بنفسى هناك

إيمان يقول...

نورتينى يا أم البنات ... وتصدقى هو ده إللى أنا إكتشفته لما روحت المعرض لوحدى إتفحصت وأشتريت ودفعت وخلصت فى ساعتين فقط ... بس للأسف نسيت الريفو والميه ورحت من غير فطار ... وكمان كنت خارجه من الشغل ولابسه كعب عالى أصلى مديره عقبال عندك ... فطبعا كان يوم تحفه منتهى الصداع ... المعرض لسه شغال .. لو هتروحى بلغينى علشان أجى أنفرد بنفسى معاكى بس المرادى مش هنسى المسكن والمياه

ٌرحيـــــــــــــــــــــــل يقول...

ضحكتيني وايد =)

فديت العفاريت أكيد كيوت مثل أمهم.

معاج حق الروحة بدون حد مب ممتعة... بس السبايسي ميل من كنتاكي بحد ولا بدون حد لذيذة... وسلم لي على المقاطعة .

إيمان يقول...

أهلا برحيل الراحله دائما ... وينك ؟؟؟؟؟؟؟؟؟؟؟؟؟؟
تسلمى أنت والعفاريت يا رب ... بلاش سيرة السبيايسى ميل بتاعة كنتاكى أحسن والله أقاطع المقاطعه وأطلب دليفرى دلوقتى حالا وأنت إللى هتخدى الذنب

إيمان يقول...

غير معرف شكرا على مرورك ... مدونتك ممتازه جزاك الله خيرا

غير معرف يقول...

معلش ياايمان واللة كان نفسى اجى معاكى فعلا بس النصيب,بس الحمد للة ربنا وفقك وجبتى الكتب الى نفسك فيها اينعم الصحبة تحلى ولو كانت وحلا بس ولايهمك تعالى نخرج

إيمان يقول...

س
ياقهلا يا قهلا
عايزه نخرج..سورى مش فاضيه هروح عند مامى