السبت، 2 مايو 2009

كيف تحصل على أجازة ملهاش أي لازمة ...ومحدش يسألنى عملتى أيه فى الاجازة علشان منخسرش بعض


كيف تحصل على أجازة فاشلة ( وملهاش أى لازمة ) سؤال يطرح نفسه في الأونة الأخيرة

ومن موقعي هذا أستطيع تلخيص الإجابة فى بضع نقاط .. متمنية لكم جميعا أجازات سعيدة

دائما ( مع انكم كنتم بتدعولي من غير نفس خااااالص )

1_ أن تكون الأجازة بعد فترة إرهاق طوووووويلة بحيث تكون ( مفاصلك سايبة وعنيك مزغللة
وروحك في مناخيرك وعلى أخرك وعايزلك أسبوع علشان تفوق وتبقى إبن ناس )

2 _ أن تكون هناك أمور كثيرة معلقة ومهام أكثر مؤجلة بحيث يتم قضاء الأجازة بين الدوائر
الحكومية المختلفة ( وتقضى حضرتك الأجازة كلها صحيان بدري علشان تلحق الموظفين قبل
ما يبدأوا الديش بارتى بتاع الافطار .. أو قبل ميعاد المأموريات اللى لحد غرفة نوم بيتهم )

3_أن تعلق أمالا كبيرة وتضع خططا عظيمة لقضاء الأجازة بين ربوع الطبيعة فكلما عظمت
الخطط كلما كبرت خيبة الأمل ( كفاية عليك شوية تهييس قدام التليفزيون أنت فاكر نفسك فين
كبيرك كوباية شاي بالنعناع وبرنامج البيت بيتك انت هتنهب )

4_ولكي تتأكد أنك ستحصل على أجازة (ملهاش أي لازمة ) يجب عليك إختيار توقيت الأجازة
بعناية فائقة ( يعني لازم تنشن على الوقت اللى كل الناس اللى يهمك أمرهم مشغولين لشوشتهم
ومحدش فاضى لحضرتك وبذلك هتلاقي نفسك فى الأخر مقضيها أفلام أبيض وأسود أو أفلام أكشن
وربنا يسترها عليك وميوصلش بيك الحال لأفلام نبيلة عبيد أو نادية الجندي يعنى لو جت فى إلهام شاهين
يبقى هتعيش أسبوع فى الإنعاش وهتبقى كويس )

5_أن تكون الأجازة خالية تماما من صلة الرحم و زيارات الأهل والعائلة ( على أساس انك مقطوع من شجرة
أوأولادك لقوك مرمى قدام باب المسجد اللى في أول الشارع )

6_وأخيرا وليس أخرا تكون من الناس المحبين للهدوء ..( جرس الباب وصوت مرات البواب وهى بتشتم ولادها
وصوت كلب الجيران وصوت جاركم اللى اشترى لاب توب جديد وفرحان بيه وقاعد فى البلكونة مشغل
فيلم جديد ومعلي الصوت قال يعنى بيعرف يعمل دونلود لأفلام اجنبيه .. لوكل ده بيسببلك تعاسة حقيقية يبقى انت
أكيد فى أجازة فاشلة وزي قلتها )

أتمنى أنى أكون قد أفدتكم .. ومحدش يسألنى عملتي أيه فى الأجازة علشان منخسرش بعض ماشي : (((

هناك 51 تعليقًا:

حسام غانم يقول...

عملتي ايه في الأجازة :)


احم


المهم انك ريحتي شوية وخلاص

وزي ما بيقول أحمد خالد توفيق

توقع الأسوأ .. تجد الحياة كبشة من المفاجآت السارة

إيمان يقول...

هو مين أحمد خالد توفيق ده
هيه نقصه حضرته هو كمان
وبعدين هو انا قولت حاجه دى الجازة كانت فل جدااااااااااااا
منور يا حسام بجد ضحكتنى وانا مليش نفس خااالص

ستيتة يقول...

انا مش ها اسأل عملتي ايه
لأنه كله على وشك بان يا جميل
وفهمت فحوى الأجازة وعملتي ايه فيها بالتفصيل
والله دعيت لك من قلبي
طيب هو مفيش ملحق للأجازة دي يمكن تنجح وتعدي؟

نورتي الشاشة تاني
بالروغم من الأجازة السعيدة المهدئة للأعصاب اللي تحسدي عليها من قاسم السماوي

ممممممممممممممممممممؤ

إيمان يقول...

عااااااااااااااا
عااااااااااااااااااا
عاااااااااااااااااااااا
مين قال أنها كانت أجازه مش سعيدة
لالالالالا محدش يفهمنى صح أرجوكم
وبعدين ستوتى حبيبتى أكتر واحده فاهمانى وحاسه بيه
ربنا يستر والجازة تعدي فى الملحق
أحسن والله هتبرى منها ليوم الدين
موووووووووووووه

عاشقه الرومانسيه يقول...

ياحبيبتى

انا مش عايزه اضايقك
بس الفضول بيقتلنى واسئلك
عملتى ايه فى الاجازه؟
(وش بيطلع لسانه)

واضح ياحبيبتى انها كانت اجازه فوق الوصف وجددت نشاطك على الاخر
هههههههههههههههه

حد يابتنى يعمل اجازه ويقول للناس ؟
ماهو لازم تتنشى عين محترمه من اللى بتجيب من الاخر دى

عموما تتعوض
خلى املك فى ربنا كبير

إيمان يقول...

هئ هئ هئ
لالالا أبدا انا مبسوطة وبضحك من قلبى يا جماعة مع انى ضاع منى أجازة
وبطاقتى فى جاكتة سرقوها وغتاته كمان سرقوا الشماعه
هئ هئ هئ
تتعوض اه تتعوض ان شاء الله

مهندس / على درويش يقول...

انا مش هسأل انتي عملتي ايه في الأجازة ؟؟؟؟؟؟؟؟؟؟؟


المهم طبعا ودا الأكيد إن فيه حد كتير بصلك في الإجازة دي

ودا لأنك أعلتني على الملاء إن فيه أجازة

وطبعا لأن فيه ناس مش عارفين ياخدوا اجازة فلا بد من وجود بعض الحقد الطبقي البسيط

ودا طبعا كمان بان جدا في حلاوة الأجازة


نصيحة ....

عندما تأملي بفعل شئ لا تحدثي عنه الأخرين حتي يأتي الحين

إي بعد فعل الشئ نفسه

تحياتي

مهندس / على درويش يقول...

اه

انا عايز طلب صغنون كدا على الماشي

ياريت تدعولي

يا ريت بجد


تحياتي

إيمان يقول...

م/ على درويش

يا رب تحقق اللى بتتمناه وربنا يوفقك

شكرا لنك مسالتنيش عن الأجازة دى حاجه مش هنسهالك ابداااااااااااا

بدعيلك من قلبى ربنا يوفقك
ويكرمك

يارب يارب

د. ياسر عمر عبد الفتاح يقول...

ألجازة باظت..!!
ليه كده بس
فيه حد يروح مصالح حكومية في وقت أجازته
أمال الأنتخة هتبقي إمتي؟

يلا خيرها في غيرها
الصيف جاي وإن شاء الله تقدري تخطفي أسبوع هنا ولا هنا

سارة احمد يقول...

ياعينى يايمان...معلش ولا يهمك تتعوض الاجازة الى جاية ان شاء اللة...حظ سعيد المرة القادمه:)))

SHAPE YOUR LIFE (ABOALI) يقول...

ايه ايه ايه ايه ايه ايه

اجازة
هما مش حذفوا المصطلح اللوزعى ده من مختار الصحاح

عيب عليكى وانتى المؤمنة التقية صاحبة الطلعة البهية الالفاظ دى تستخدميها

اكشفى يا بنتى على الابلاتين بتاع مخك
وحقنة مورفين وكام قرص ترامادوال هايريحوكى جاااااااااامد

خد اجازة
واقعد تحت الشجرة ونام
تضلل عليك وتشم هوا وانغام
وتحلم احلام سعيدة
وانتا مش مصدق نفسك وتقول اوهام
ولما تلاقى نملة
بتاكل فيك قوم من هنا يا انسان
تعرف انه كان طيف فى المنام
خذ اجازة
وريح نفسك
وخلى معاك لبان
اللبان مفيد يقلل الضغط
وفيه كلام عن الحموضة كمان
وخلى بقى بالك من السكر يا حلو
وما تعملش فيها امور وابن ناس قلقان
خد اجازة
ما يهمش هى بطعم المشمش ولا الاناناس
كله بينفع فى يوم فيه تكون محتاس
وعيب عليك تقول انا عندى اجازة
وانتا متبل بكل التوابل
وريحتك على بعد فرسخ واتنين كلها افراح
خد اجازة
وخليك مخطط
يعنى زور حديقة الحيوان
حتى التذكرة والدخول ببلاش
هاتعرف هناك المعنى وكمان معانى
وهااااااااتقول العلم فعلا نور
ويا تارينى كنت فاهم انى متنور يا ناس

خد اجازة


مع الاعتذار
للفطير


عوووووووووووودا حميدا

الفقيرة إلى الله أم البنات يقول...

إيمان
حمد الله على السلامه ويارت تقولى لى اشمعنى مدونتك ومدونة نقطه فى بحر
كل يوم والتانى تزويغ من الريدر وكل يوم والتانى اضفهم لما اكتشف فجأة ان حضراتكم منزلين بوست جديد
على كل حال شوفى لك صرفه فى مدونتك
وانا هاربى الريدر اللى عندى علشان يبطل يطفش ولاد الناس من عندنا


نيجى للموضوع اللى مش هنتكلم فيه

التغيير فى حد ذاته متعه
قلبى حاسس انك ساكنه جانبى...
كانك بتتكلمى عن جيرانى ومرات بواب عمارة جارنا
تصدقى شكلك جارتى وهاعرفها من الايميل ان شاء الله
حمد الله على السلامه وكفايه عااااااااااا
وصلت لغاية عندنا عاوزين ننام

تامر علي يقول...

الأجازه اللي حلتي باظت ... باااااظت .... بااااظت .... وجوازة عتريس من فؤاده باااااظت :)

******

الأجازة دي علشان تبقى أجازة ... لازم تكون في الجنه ... إحنا خلاص ودعنا زمن الإستمتاع زدخلنا في زمن الإستنطاع:)

لاء بجد ... حد ياخد أجازة ويقعد في البيت ؟؟ لازم يحصل كده طبعاً ... اللي ياخد أجازة يكون من قبلها مربط على سفرية ..... مربط على تسريب جميع أفراد الأسرة في مكان وهو حاجز في مكان تاني ... يكون مربط على مغامرة أكشن ... كده مش يقعد في البيت :)

أكيد في حد مكانش متوضي وهو بيدعي فعلاً :)

يالا خيرها في غيرها :) تحياتي :)

لجين أبو الدهب يقول...

هههههههه

ايمان حبيبتى ..

اكيد عين فتكات صابت الموضوع ..

بس كفاية انك غيرتى اى حاجة فى الحياة ..

كفاية انك تقولى انى كنت فى اجازة ..

ان شا الله تقولى قضيت اجازة النهاردة فى صالون بيتى D:

وبعدين اشجبى وعارضى ونددى وطالبى باجازة تانية قريبة لتكون اكثر سعادة من اللى قضيتوها المرة دى ..

صحيح نسيت اسألك ..

عملتى ايه فى الاجازة ؟؟D:

امل يقول...

اجازه اجازه اجازه
طيب ومين يأكلنا
ومين يقضى طلبات البيت
الاجازه دى للرفاهيه
واحنا حياتنا كلها الحد لله رفاهيه
يبقا هاننهب يعنى
عوضك على الله
خيرها فى غيرها

dodda يقول...

انا اللى عندى السبب الاكيد اللى يجيب اى اجازه ارضى من قبل ما تبتدى..

دا مع احترامى طبعا لكل الاسباب اللى قلتيها

بس السبب اللى ميخيبش ابدا
انك تصيحى على البلوج قدام ناس كلهم محرومين من الاجازات وكتير منهم فى عز الامتحانات وتقولى انا حاخد اجازه والحاجات دى....

:0))))
بس ده لا يمنع انى اقولك كب اجازه وانت طيبه يا حبيبتى.

القدر و انا يقول...

ايمان
حمدا لله على السلامة
ماتزعليش يا ايمان .. يمكن لانك منيتى نفسك بحاجات كتير قوى نفسك تعمليها فى الوقت البسيط والظروف اتغيرت غصب عنك
وللاسف المصالح الحكومية دى تنسف اى اجازة وتعكر احلى مزاج
ربنا يعوضك باجازة حقيقية ترتاح فيها النفس
تحياتى وحبى

MǿиY El-Shreef يقول...

هههههههههه

معلش يا ايمي

انتي اكيد مش عايزه حد اجازته تبقى تحفه زي الاجازه بتاعتك

عشان كده بتنصحينا كده صح صح صح :p

المهم انك رجعتيلنا بالسلامه ياقمر

وحشتيناااا

غير معرف يقول...

عارفة ياايمان
موضوع اجازتك ده انتى اخذتى عين جامدة
فيه----------
اصل زى ماتقولى قوله قرفان وزهقان
وفعلا التوقيت ده اقصد قرب نهاية العام الدراسى محدش يجى على باله اى اجازة
تيجى انتىوتقولى واخدة اجازة
يعنى بذمتك مش عايزة الأر يشتغل عليكى
الحقى نفسك فى الملحق
صحيح هو الملحق يمكن يكون امتى اوعى ماتقوليش

Ahmed يقول...

دستووووووووووور
يارب ياساتر
انا دخلت المدونه ديه اهوه بأيدي اليمين عشان متقوليش بنقر ولا منفسنين اكمنك اختي اجازه ولا حاجه
هههههههههههه

لا لا بس متنكريش, شكلها كانت اجازه برده ولا في الأحلام
هههههههههههه
اللهم لا شماته

يعني برضه مش هتحكي عملتي ايه في الأجازه؟
زعلتيني
هههههههههه

ربنا يعوضك أجازات تانيه وتكون كلها سعيده ان شاء الله

assafo anaroze يقول...

ايمان
اهلا بحضرتك من جديد في المجتمع التدويني
يظهر و الله اعلم ان الاجازة مش و لابد
ده اول بوست بعد الاجازة و عاوزة تتخانقي هههههههههه
خيرها في غيرها
مودتي

MaNoOoSh يقول...

ولا تزعلى يا ايمى
ان شاء الله خيرها فى غيرها.. وخلى عندك اصرار واوعى تستسلمى
المرة الجاية خططى للاجازة فى نوفوخك سكيتى كدة وحاولى تظبطى على مواعيد الناس اللى هتاخديهم معاكى واعمليهالهم فجأة كدة.

إيمان يقول...

د/ ياسر

متشكرين على الدعم المعنوى

ان شاء الله تتعوض فى الصيف

مع انى مبحبش السفر او الخروج فى الصيف

حيث زحمة المرور لحد الساعة 2 صباحا

بس يلا أحسن من مفيش

إيمان يقول...

سارة أحمد

اهئ اهئ ماشي يا سارة تتعوض

يارب المرة الجايه تكون احسن يا رب

إيمان يقول...

ابو على

هههههههههههههههه
ههههههههههههههههههه
هههههههههههههههههههه
هو النمل السبب فى كل اللى حصل

معلش بقه اصل الترامادول كان مسحوب

من السوق قلت أجرب الأجازة طيب

وبعدين ملقتش عيش جيبتلك جرير

والحمد لله حصل خير

إيمان يقول...

ام البنات حبيبتى

انا معرفش ايه حكايةالرايدر فى مدونتك

شكلة هو كمان كان غيران من الأجازة

لو أنتى ساكنة فى مكان فيه خضرة كتير

والجو فيه تحفة والسما بينا مش مستخبيه فى العمارات

والجيران كلهم قالوا مش معقول نسيب المكان هادي وكويس لما نربي كلاب وكأن الكلاب دي مش نجاسة ولا حاجة ولا مصيبة سودة يبقى أحنا جيران
يعنى طبعا التغيير كويس والله بجد حسيت انى فقت شوية
شكرا على الدعم وعشتى زخرا للزهقانين

إيمان يقول...

تامر على

وحياتك انت كنت مربطه على سفريه محترمة بس الربطه فكت فضلت اشد اشد علشان احكم التربيط قام الحبل اتقطع ونهايتى كانت فى الدواير الحكوميه
الأجازة باااااااااظت بااااااااظت
تتعوض فى الجنة ان شاء الله

إيمان يقول...

لوجي

هو طبعا التغيير حلو ان شاله تخرجى من الليفنج لحد الصالون اهو برضو الواحد يشم هوا يا شيخه
ههههههههههههههههه
وبعدين سمعتحد بيقول اجازه وعملتى ايه متعرفيش مين

إيمان يقول...

ماما

طبعا انا ايامي كلها رفاهيه بس كنت عايزة اجازه ابعد فيها عن الرفاهية شوية الواحد تعب من الراحة وروقان البال بس يخسارة بااااظت الاجازة
منوره جدا يارب دايما

إيمان يقول...

دوددا
هههههههههههه
ههههههههههههههه
وانتى طيبة يا حبيبتي
التصيح دايما ليه فوايد كتيرة
من اهمها انك تتعلمي متصيحيش تاني

إيمان يقول...

القدر وأنا
الله ربنا يخليكي ليه بجد حلوين الدعوتين دول حسيت انهم من القلب
ربنا يسعدك وميبوظلك أجازة قادر يا كريم

إيمان يقول...

ربنا يخليكى يا مونى

انتم اللى وحشتوني اكتر والله

مبروك شكل مدونتك الجديد لون رايق

وجميل

يعنى انتى تعلمتى بقه الاجازة الفاشلة تبقى ازاى اتعلمي يا بنتى من اخطاء الاخرين

إيمان يقول...

أم مالك حبيبتنا
نورتى المدونة ويارب دايما معانا
يعنى انتى عايزانى اقول الملحق امتى طيب مصعبتش عليكى بعد اللى حصلي
منها لله فتكات هى السبب

إيمان يقول...

م/ احمد

اتفضل اتفضل من غير دستور ولا حاجه

اللى راح راح خلاص

وبعدين تشمت ليه هو كان حصل حاجة

دى الاجازة كانت تشحفه تشحفه

عقبال عندك

يوميات شاب منوفى يقول...

اهم حاجة انك ختى اجازة يابختك انا مش بقر انا بحسد بس دانا نفسى اخد اجازة من زمان

احساس طفلة محبة للرومانسية بس واقعية يقول...

ايمى اية اللى حصل ؟
انا قلت دى ايمان اللى منزلة البوست دا ولا فى اية لحقت رجعت
ير
بس اية استمتعتى شوية حتى لو صغيرين ولا اية

على رأى سومة يووووووووووة بقى
شكلنا حسدناكى من غير ما نقصد ولا اية

معلش تتعوض ان شاء الله :) خليكى متفائلة زى البوست اللى فاااات

تقبلى مرورى

ELMASRYA - MRS WRITER يقول...

إيه ده؟

بقى هي دي الأجازةالي قلتي عليها هيييييييييييييه

ماتبقيش تقولي هيييييه تاني إلا لما ترجعي من الأجازة

وبدين ماتضايقيش نفسك خيرها في غيرها

المهم وبعيدا عن موضوع الأجازات الفاشلة

عملتي إيه في الأجازة؟
(وش شرير بيبتسم)نياااهاااااااااااااا

Hajar Jackoub يقول...

أنا قرأت الموضوع كله و كمان قرأت كل التعليقات و حسيت إني مكسلة أكتب رد بعد ماقريت ردود الناااااس كلها :)))

ما علينا . . .
هانتجنب إن شاء الله الحاجات ديه و هنلاقي اللي فاضلنا إجازة سعيدة
بس الأهم من الإجازة هي الرغبة في إنها تكون سعيدة سواء سافرنا ولا لأ ، مش كده ولا ايـــه؟!!
تحياتي ^ــــ^

۩ Nour ۩ يقول...

السلام عليكم..
اخبارك ايه يا إيمان ان شاء الله بخير دايماً..
وشكلى أتاخرت كتير.. فالتمسى لى العذر كنت فى اجازه قصيرة وربما يعقبها اخرى طويلة لظروف صحية..
اولاً: مبارك الشكل الجديد والتجديد ..
ثانياً : حمدلله على السلامة .. على الرغم من عدم معرفة سبب الاجازة او بوست الاجازة..
وبالنسبة للاجازة.. افضل شىء تكون فى هدوء تام بعيداً عن كل من لدية لسان صارخ او اصوات صاخبة.. تختلى بنفسك فى نفسك .. ومن ثم العودة فى حاله نقاء وصفاء ذهنى ..
ومعذرة على التاخير ولكن مهما طال.. فى يوم ساخط لك سطور هنا دوماً..
دمتِ بخير دوماً.

دعاء يقول...

إيمان
كل أجازة وأنتى طيبة و تتعوض المرة الجاية إن شاء الله.

دعاء

إيمان يقول...

أسافو

منور المدونة

لا ربنا ما يجيب خناق ولا حاجه

وبعدين سمعت حد بيقول اجازة مش ولابد

مين قال دي كانت تحفففففففففه

بعيد عنك وعن السامعين

إيمان يقول...

منوش

خلاص انا مش هزعل نفسي خالص

خالص اهئ عادي يعني كلنا لها

وبتحصل فى أحسن الأجازات

بس بجد وحشتينى وكانت بوستاتك اثناء اجازتى جاااااااامده

إيمان يقول...

يا أيها الشاب المنوفي العزيز

لا قر ولا حسد ما خلاص اللى راح راح

منور والله ويارب منجيلكش فى أجازة

بايظة

إيمان يقول...

احساس طفلة محبة للرومانسية بس واقعية

حاضر هكون متفاءله عااااااااااااادي

وانا ايه اللى هيزعلني حصل ايه يعنى

وحشتيني بجد

إيمان يقول...

مصرية حبيبتى

محدش بيتعلم بالساهل

حرمت اقول هييييييييييه قبل الهنا بسنه

وبعدين ليه تسأليني وتجرحيني وانا فيه اللى مكفيني عاااااااااااااااااااا

إيمان يقول...

هاجر يعقوب

لأ مش كده انا كنت عايزه اسافر

مليش دعوه بقه

يعني انتي اكتر واحده كنتى متابعه معايا جو التشويق والاثاره هنسافر بالليل لا الفجر طيب العصر لا خلينا بكره طيب بعده طيب بلاش بقه علشان مش هينفع عاااااااااا

إيمان يقول...

نور

يارب تكوني بخير دايما

وبصحة جيدة ويبعد عنك كل شر

انا مستنية قلمك الجميل ينورني دايما

تحياتى وتقديرى

إيمان يقول...

دعاء عبد الفتاح

أهلا بيكى فى مدونتى المتواضعه

بجد نورتينى جدااااااااااااا

خالد شوقي يقول...

علي فكرا انا كمان نفسي في اجازه و اتمنالك اجازه سعيده بس علي فكره واضح ان دمك خفيف اوي يا ايمان .. ربنا يوفقك و الي الامام دائما .. سلام

إيمان يقول...

خالد شوقى

خلاص الاجازه طلعت فشنك وحصل اللى حصل

يسعدنى مرورك دائما

ويهمنى رأيك

دمت بكل ود وربنا يرزقك بأجازة بس مش زى بتاعتى