الثلاثاء، 27 يوليو، 2010

مين طفا النور


التزام الصمت في حالة الفتن هو احسن حل.. ده شئ انا مؤمنه بيه جدااااااا
بس موضوع كاميليا شحاته المسيحيه اللى كانت واخده اجازه من جوزها
لمت هدومها واخدت اجازه من الشغل وسحبت قرشين من البنك واختفت
واضح انها كانت عايزه تستجم وتفكر في هدوء بدليل انها خدت اجازه من الشغل اسبوع او اتنين فقط
فيه حاجات كتير حصلت مستفزه وحاجات ملهاش معنى وفى كلام كتير فيه استخفاف بعقول الناس
بس كل اللى حصل كووووووووم والى عايزه اتكلم فيه كوم تانى خااااااااااااالص
قالوا ان المسلمين خطفوها علشان يجبروها على اعتناق الاسلام مش عارفه هل العباره دى مسروقه من فيلم كوميدي ولا اللى اقترح تسخين اخواننا المسيحين بيها كان شارب كوبيتين جهل على الريق طبعا عامة المسيحين لما يغيروا على دينهم ماشي انما لما يكون حد وظيفته انه كاهن في الكنيسه لما يهلل ويقول الكلام ده يبقى ده عييييييييييييييييب قوى يبقى ده كلام ناس مش فاهمه اى حاجه وبتتكلم وخلاص
أحب أطمن أخواننا المسيحين وافرحهم واقول لهم مفيش حاجه في الحياة إسمها ( يجبروها على الإسلام ) أو يخطفوها علشان يجبروها على الإسلام
قال تعالى (لَا إِكْرَاهَ فِي الدِّينِ قَدْ تَبَيَّنَ الرُّشْدُ مِنْ الغَيِّ) سورة البقرة 256
يعنى خلاص يا شباب عيشوا واتطمنوا على الاخر كل حاجه باينه اللى عايز يبقى مسيحي حقه واللى عايز يبقى يهودى حقه واللى عايز يتبع اى دين برضه حقه والمسلم اللى يخطف ست مسيحيه ويجبرها على الاسلام
ممكن نعتبره حرامى كان عايز يسرق المحفظه أو نصاب عايز فديه أو مجنون تعدى على حرمة واحده ست امنه فى بلدها لكن مينفعش نسميه مسلم فاهم دينه وبيتقى الله
وهى مهما هو عمل
مادام لم تؤمن بالاسلام بقلبها وعقلها فهي مسيحيه قلبا وقالبا حتى لو نطقت الشهاده ألف مره
يا اخواننا شوفوا مين بيحاول يوقع بينا
لو فى يوم شوفت مسلم رافع عليك سلاح وبيقولك لازم تسلم اعرف انه مش مسلم ولا يفهم اى شئ فى
الاسلام
ولما حد مسيحي يقولك دول بيخطفوا المسيحيات علشان يجبروهم على الاسلام اعرف انه بيضحك على حضرتك وبيستغل حماسك وحبك لدينك

هناك 17 تعليقًا:

moustafa fawzy يقول...

والله الموضوع ده فكرني أيام ما كنا فإبتدائي و إعدادي كنا أنا و أصحابي نمسك أي واد مسيحي و نكتفه و نقوله قول (لا إله إلا الله محمد رسول الله ) ياد

إيمان يقول...

مصطفى
منور
كنتم بتعملوا كده علشان أطفال مش فاهمين حاجه بس أكيد لما كنت بتحكى لحد كبير كان بيضحك عليك ويقولك ان كده غلط وعيب وربنا كده هيزعل منك لأن مفيش حاجه اسمها اسلام بالتكتيف ومجرد نطق الشهاده لا يجعل من اى أحد مسلم

SHAPE YOUR LIFE (ABOALI) يقول...

بصى يا ايمان
سمعت كثير من الاحاديث من داخل الكنائس مسجلة على الكمبيوتر للاخوة المسحيين
وهناك توجه من جانب الشباب المسيحى الحالى وحث منه لقيادات الكنيسة
على عملة بروباجنده متعمدة واقحام المسلمين فيها
كنوع من اثبات حق وكسب مكاسب اخرى على الارض على سبيل المثال

باءن يتم بناء عدد اكبر من الكنائس او الاستيلاء على مجموعة من الاراضى اكثر وضمها الى حرم الكنائس ولفت نظر الاعلام العالمى
ومثال حى حدث
كنيسة وادى النطرون حيث استولى الدير هناك على 100 الف فدان حوال الدير وبنى اسوار على اساس ان الدير فى الصحراء ولا احد يدرى

وعندما تحدث الضجة من المسلمين يقولون اننا نضطهد والمسلمين يستولون على الارض

اذن يا سيدتى تلك الهمهمات التى خرجت من الكاهن
هى همهمات منظمة ولها اسس

وقد سمعت فى احد الاحاديث لهم فى ندوة

يقولون المسلم لا تهاجمه مباشرة وانما انغزه وشككه فى دينه وبهدوء

ولك ان تلاحظى ايضا تعمد الكثير من المسحيين استفزاز المسلمين بتلك الصلبان الكبيره التى توضوع على الملابس الملبسوه

كلامى يا سيدتى ليس دعوة لفتنه او يفهم هكذا

ولكنه دعوة ان نفيق
ان هناك سياسية مدبرة مرسومة لامتلاك كيان قوى داخل البلد على حساب اغلبية تائهة تنسى ضبغة دينها بسهولة وتتنازل يوميا" عن فدان وراء فدان

ولك ان تلاحظى موضة الاكل الصيامى والاشتغالة دى
على اعتبار انه يعرف غيره انه صائم وليه اكل معين مع انه فى الاصل فاطر

ولكنها سياسة يا سيدتى


تقديرى لما كتبتى

SHAPE YOUR LIFE (ABOALI) يقول...
أزال المؤلف هذا التعليق.
فتاه من الصعيد يقول...

في ناس بتحب تهدي النفوس :)

اللي ضايقني انهم سلموها لجوزها ... اصلا دي ست زعلانه منه ولازم يدوها مساحه تزعل زي اي ست

تحياتي

إيمان يقول...

بص يا ابو على

أنا هنا مش بدافع عن نفسي وبقول لحد والنبي اوعى تفهمنى غلط
أنا بس بقول لكل اللى ميعرفوش حاجه عن الاسلام ان لما تحبوا تلفقوا حاجه للإسلام ابقوا شغلوا مخكم شويه
وبلاش اى كلام وخلاص
وبعدين انت دخلتنا فى متهات كبيره
ما اللى عايز يحط صليب على هدومه ربنا يوفقه واللى عايز يتمحك في الغرب ربنا يوفقه وكان اللى قبليه فلحوا امريكا وغيرها هيستغلوهم و بعدين خالتي عند بنت خالتى وكان الله بالسر عليم
على العموم كله بيطلع في الغسيل

إيمان يقول...

فتاه من الصعيد

طبعا الموضوع ده حرق دمي جدااااااااا

يعنى علشان هى مسيحيه مش من حقها تطلق لو جوزها خنقها دى فهمناها شرع دينها ولازم تحترمه
لكن كمان مش من حقها تزعل وتربى جوزها شويه ايه ده فين جمعيات حقوق الستات الزهاقنين في عشيتهم
نورتى يا ست الكل

dodda يقول...

دى اسخف نكته سمعتها فى حياتى!!!!

هى والا غيرها مش حيفرقوا مع الاسلام ولا المسيحيه فى حاجه....
هو ليه الغباء بقى غيه عند الناس كده؟؟؟
لا حول لا قوة ال بالله

إيمان يقول...

دودااااااااااااااااا

بجد نورتى ووحشانى جدااااااا

كنت بسأل تفسي كتير البنت دي راحت فين

من قمة التألق والوحضور لقمة الاختفاء والطناش

ربنا يديم وجودك بينا ويسعد ايامك دايما

هي فعلا نكته قمه فى السخافه وملهاش اي معنى غير أن في ناس بتحاول تحقق مصالحها الشخصية بأي شكل وبأي تمن وعلى حساب أى حاجه

القدر و انا يقول...

مونى
ازيك حبيبة قلبى
اخبار حمزة باشا ايه
انا معاك تماما ان عندنا اول حاجة نتعلمها انه لا اكراه فى الدين
والاسلام دين قلب ومعاملة قبل ان يكون دين مظهر
لكن مع ابو على فى ان من وقت للتانى يثير بعضهم زوبعة ليرى العالم انهم ضعفاء واقلية ويحصلوا على مزيد من المكاسب من حكومة لا تاتى الا بلوى الدراع ..
تحياتى يا قمر

عبد الله محمد يقول...

سلام عليكم
بالوقت هذا الإسلام عملينو شماعة ؟أي شيء يعلقوه عليه . إمرأة مسيحية خرجت من بيتعا شو دخل الإسلام بالموضوع .

تحياتي ............

AHMED SAMIR يقول...

فعلا.....موضوع كاميليا شحاتة دة بيؤكد ان في حاجة غلط
و غلط كبير كمان

إيمان يقول...

القدر وانا

حمدا لله على سلامتك
حمزة بيسلم عليك وبيقولك دادادادا
أما بالنسبة لكلام أبو على فأنا أتفق معاه جدا خالص مالص بس اللى عايزه أقوله أن مفيش حاجه أسمها أمسك سلاح وأقولك قول الشهاده تقوم تقولها أقولك هاهاها ضحكت عليك بقيت مسلم المسلم اللى من النوع ده الاسلام مبيعترفش بيه أساسا وبيعتبره مسيحي ميه في الميه
أن بصراحه قولت أطمن إخواننا المسيحين وقول لهم حتى لو حد سقى أولادكم حاجه أصفرا وقال لهم قولوا الشهاده حتى لو قالوها فهم برضو لا يعتبروا مسلمين
الاسلام شرطه الاقتناع الكامل والرضى

إيمان يقول...

عبد الله محمد
أهلا بيك وبمرورك الكريم
هو ده فعلا اللى استفزني يعنى ست خرجت من بيتها لأسباب يعلمها الله ما دخل الإسلام

إيمان يقول...

أحمد سمير
أهلا بيك بجد نورتني
الموضوع فعلا بقى غريب وعجيب والكلام بقى كله عن جهل وحاجه تنرفز

SHAPE YOUR LIFE (ABOALI) يقول...

بصى يا ايمان
اكيد الموضوع كبير
بس انا قصدت انى الفت النظر انى الكاهن لما عمل كده وقعد يهلل
كان فعل منظم مش كلام وخالص
متأكد من وجهة نظرك انه مش فارق بين الطرفين

بس اللى بيحصل وبتشوفيه كل فترة دى سياسه منظمة

وعلى رايك كله بيشرب ميا


تقديرى

إيمان يقول...

أنا عارفه والله يا أبو على علشان لما بيحصل رغى وبلا بلا بلا بحس انه من الأفضل عدم الرد لكن انا بس استغربت ان الناس بتقول لا محصلش انها اتخطفت على اساس انه اصلا ممكن يحصل
حبيت اوصل بس فكرة انه مفيش حاجه فى الحياه اسمها اسلام بالغصب وياريت اللى يحب يعمل هيصه يبقى ينقى حاجه شكلها أحلى شويه
انا دايما اتفق معاك يا ابو على والمرادى كمان أنا لا أختلف