السبت، 9 أكتوبر 2010

ممكن ترجمة

عن جريدة الدستور ..8 أكتوبر 2010

أكد د/ عثمان محمد عثمان وزير التنمية الإقتصادية !!!!!!!!
إن موجة التضخم التي تجتاح الأسواق في الفترة الأخيرة وخاصة أسعار الخضروات والفاكهة والدواجن واللحوم تعود لأسباب مؤقته وموسمية أو نتيجة تغير في الطقس أو ثقافة سائدة !!!!!!!!!!!!:)
ونفى أن تكون لأسباب هيكلية في الإقتصاد الذي تمكن من تجاوز الأزمة العالمية الإقتصادية وعاد إلى مستويات نمو معقولة تصل إلى 5.7فى المائة خلال الربع الأول من العام المالي الحالي وعلى خلفية التطور الذي حدث خلال الربع الأخير من العام المالي الماضي مقارنة بدول مناظرة فى العالم النامي


ده جزء من المقال بس من غير ترجمة .. ممكن حد يترجم علشان مش فاهمة
أية علاقة المفاهيم السائدة بالتغير في الطقس بالدول النامية المناظرة

مش فاهمة
يعني أية مفاهيم سائدة في المجتمع وإحنا بنصرف ملايين على أبطال المسلسلات والأفلام
وملايين على الكورة ولعيبة الكورة
وملايين تانية على المطربين والراقصات
مفيش مشكلة نرفه عن الشعب بالمسلسلات والكورة والرقص والغنى بس لازم ياكلو الأول علشان يعرفو يركزو مع المسلسلات ويلاقو أعصاب يتابعوا بيها الكورة
يعني أيه بلد زراعي عنده ازمة قمح ورز وطماطم وخضار أمال كنا بنزرع ايه السنادي
ما علاقة المحاصيل بأزمة الاقتصاد العالمية؟؟!!! ..

هناك 16 تعليقًا:

ادم المصرى يقول...

والله انا الى تابعتو انهردا على قناه الحياه ان الرئيس عمل اكتماع مع المعافظين مش الوزراء لا المحافظين واداهم امر انهم يبشرو الموضوع ويحلوه وكانت المزيعه بتعلق على كلام المتحدث الرسمى بأسم الرئيس لما طلع وقال الدوله ملهاش علاقه بأسعار الخضار ورد المزيع وقال اذاى واحد مسؤل يقول كدا اذا كانت الطماطم لو جرلها حاجه تكون قضيه امن قومى لأنها بنزبا لمصريين زى رغيف العيش

والله حوديت وقصص والواحد تعب اصلا

FAW يقول...

يعني هي جت عالكلمتين دول
أنا أصلا بحس إن الجرايد بتكلم شعب تاني في دولة تانيه بلغة تاسعه

غير معرف يقول...

هههههههههه

دي اخره اللي يقرا تصاريح الحكومه

يا بنتي انتي لو سألتي الوزير ايه معنى اللي بتقوله اصلا موش هيعرف يجاوب

بس بيتهيئلي انه يقصد ان مصر 100 فل وتلاتاشر .... لان دي النغمه السايده عندهم

تحياتي

د. ياسر عمر عبد الفتاح يقول...

مهو أصل إحنا قررنا فجأة إننا نكون دولة صناعية

فخدنا عوضين واسماعين من الأرض ولبسناهم بدلة زرقا ووقفناهم قدام (مكنة) وقلنالهم انتجوا

طبعاً سماعين وعوضين فشلوا في الصناعة
وقبلها سابوا الزراعة

وربنا يقدم ما فيه الخير

ملحوظة صغيرة كده
مرتكزيش مع كلام الوزاء والمسئولين
الجماعة دول أصلهم رايقين شوية

عمرو يسرى يقول...

=-=-=-=-=-\=-=-\=-\=-0-09-09=0=0=-0=0\==-\-\=-\0-))(_)()()()()+_(+|_|+\=-\=-\=-\=--*/-**/-/-//-*-*/-/--/-//-///-*-/*-/-*/*-/ذ11ذ/*/-*/-*/**/-*/*/-*/*/-/-*/-*/-*/-++++**-*-*-/*/
انتهت الترجمه بنجاح
هههههههههههههههههههههههههههههههههههههه
وهذه ترجمه لاى تصريح لاى مسئول من اى نوع
وعندنا ترجمه ايضا لاحدث تصريحات المسئولين
وعندنا مسئولين اخر موديل مسئولين مش مسئولين للاستعلام اتصل بمصر ههههههه

ستيتة يقول...

كده خطر عليكييييييييييييييي
يُنصح بعد سماع أي وزير بدخول الدماغ في الفريجيدير لمده عشر دقائق على الأقل تفاديا لسيحان النفوخ

تامر علي يقول...

على فكرة بجد والله انا حاسس ان الكلام ده هم مش كاتبينه علشان حد يقراه لكن علشان العنوان بس واللي تحته اي قص ولزق واي كلام في الحمام :))))

علشان كده لما بشوف جريدة قومية مش بحاول ابص نحيتها تجنباً للعدوى

احنا بنزرع فراولة مسممه وبطيخ مهرمن وكنتالوب ببذور شيطانية اسرائيلية وخوخ متعفن
ارضنا الطيبة وسر الأرض :)

إيمان يقول...

أدم المصري

كله كلام في كلام

وربنا هو الستار .. ربنا يعوض علينا

انا هسمع نصيحة البلوجارية وابطل اقرا

تصريحات المسؤليين

إيمان يقول...

faw

على رأيك يعنى هم الكلمتين دول اللى هيوقفوا المراكب السايره ..

إيمان يقول...

فتاة من الصعيد

ههههههههههه
تصدقى بالله انتى بتفهمي
هو شخصيا مش عارف الترجمه
عليه العوض ومنه العوض

إيمان يقول...

د / ياسر

احنا لا حصلنا صناعية ولا زراعيه

المصيبه ان حتى اللى لسه قاعدين في الأرض ومسبوش الزراعة الوزارة مطلعه عنيهم ومش عارفين يتحركوا بسببها كله ممنوع استنوا شويه لا شيلوا لا حطوا لحد ما خربوها وهي دي المصيبه

إيمان يقول...

عمرو يسري

هههههههههه

مش تقول كده

هي دي الترجمة ولا بلاش

كله واضح وتمام

إيمان يقول...

ستوته حبيبتي

انا كنت بجيب ورق جرايد لأم أدهم علشان تنضف الأزاز وانا بديها الورقه لمحت التصريح.. بالغلط يعني
وأكمني مش متعوده على مثل هذه التصريحات فحصلى اللى انتى قرتيه ده
أعراض فهم متـأخر
وحشتينى موووووووووووووووت ووحشتنى الحياه بتاعة البني أدمين

إيمان يقول...

تامر على


ههههههههههههههه
هههههههههههههههههه
هو حقيقة لا يتخطى كونه كلام حمامات علشان كده تحس انه اى كلام في الحمام
سر الارض ان وزارة الزراعة بتتخبط وملخبطه المزارعين معاها ومعرفش ده بالظبط لمصلحة مين

eng gam3a يقول...

فيه حاجات كتيييير بقت محتاجة ترجمة مجتش على المقال ده

إيمان يقول...

eng gam3a

أه بجملة الطلاسم يعني جت على الكلمتين اللى ملهومش لازمه دول
نورت المدونه ويا رب دايما