الخميس، 28 أكتوبر 2010

صدق أو لا تصدق

مش مهم إن الشئ يكون حقيقي ولا مش حقيقي علشان نصدقه
المهم أحنا محتاجين نصدقه ولا لأ
محتاج تصدق إن الخير في أمه محمد إلى يوم الدين مهما بان العكس
ولا محتاج تصدق إن الحق والفضل والخير والشجاعة والحب والأمل وكل المعاني دي وهم كلام وراح عليه
محتاج تصدق إن بكره أحسن من النهارده ولا محتاج تصدق اننا رايحين لنهاية العالم زي ما كل الناس على مر العصور حبوا إنهم يصدقوا في وقت الشدائد والفتن
الإنسان ربنا فطره على الخير .. لذلك هو محتاج اساسا لكل معنى جميل علشان يعرف يعيش .. هو كده ربنا خلقه كده.. محتاج يصدق إن لسه في حب علشان يعرف يحب .. محتاج يصدق إن لسه في أمل علشان يعرف يحلم ويستنى بكره .. محتاج يصدق إن الخير بينتصر في النهاية علشان ميموتش مشلول من الغيظ
بشِّروا ولا تنفِّروا ويسِّروا ولا تعسِّروا، ..
قال تعالى (قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم)

وقال تعالى
(ولنبلونكم بشيء من الخوف والجوع ونقص من الأموال والأنفس والثمرات وبشر الصابرين. الذين إذا أصابتهم مصيبة قالوا إنا لله وإنا إليه راجعون. أولئك عليهم صلوات من ربهم ورحمة وأولئك هم المهتدون).

(أحسب الناس أن يتركوا أن يقولوا آمنا وهم لا يفتنون. ولقد فتنا الذين من قبلهم فليعلمن الله الذين صدقوا وليعلمن الكاذبين).

هناك 12 تعليقًا:

عمرو يسرى يقول...

كلامك اكثر من رائع
وفعلا ان الانسان يصدق ان لسه فى خير وحب وصدق بيشجعه على اكتساب الخير والحب والصدق
ولو صدق انهم انتهوا بيتشجع على انتهائهم من عنده
عندك حق

SHAPE YOUR LIFE (ABOALI) يقول...

مصدق ومحتاج دليل
نور وسما وليل
نملة بتعدى وقنفد بيضحك
وصرصور فى الرحاب ماشى
وكلب بيهوهو مووايل
وانسان قاعد بيتفرج
ويقول اه يا محسنين
غلبان انا وفين دليلى
سجارة اخر ننعنشة
والفن صلاته وسجوده
ويرجع يقول مهموم
والحزن غمة مش عاوزة تزول
طب خد عندك شمال ويمين
ربنا قالك عقلك
وانت قولت كبر وكل عيش
خليك بقى كده مداس
وبلاش تقول محتاس
و ان كنت للخير ناوى
وضوء طاهر يدواى
استعانه برب رحيم ليك ضامم
جهد وعرق ونداء حق
توكلت عليك يارب


وتقديرى العميق
وعندك حق
بس ده حال بنى الانس

غير معرف يقول...

كلمة جميلة جدا و تم تناولها بدقة و إختتمتيها بالآيه الكريمة فزينتها أكثر
شكرا يا دكتورة

غير معرف يقول...

يمكن الكلام يبان انه بيديهى او معروف
بس انا اول مرة اخد بالى وفرق معايا كتير فكرة ان فى خير لو مهما الشر كبر و زاد وان اللى احنا فيه ازمة وفترة مؤقتة وهتعدى بس محتاجة مننا اننا نثبت ونكمل صح عشان نقدر نعديها بخير

ستيتة يقول...

يعني ينفع اكذب عليكي انتي تحديدا يا إيمي؟
استحالة
مصدقة ان النصر قادم
والخير في رسول الله صلى الله عليه وسلم إلى يوم القيامة
وأن أمته هم الغالبون

لكن من بين ظاهرنينا؟
اشك كثيرا
هو جيل يمكن يحمل نهايات أسمائنا
بس صفاته لا تمت لنا بصلة

إزاي؟
معرفش

إيمان يقول...

عمرو يسري

ناس كتير دلوقتي بتريح نفسها بأنها تتخلى عن مبادئها وحجتها إن المبادئ بقت شعارات وكلام فارغ مع ان احنا اللى بنختار في كل مره
شكرا لمرورك نورت المدونه

إيمان يقول...

أبو على

ياسلااااااااااام على الخواطر

تحياتي ليك ولكي بوردك دايما كده تتحفنا باحلى معانى واحلى كلام

إيمان يقول...

يوميات شحات

الشكر ليك أنت أن قرأت الكلمات

نورت المدونه

إيمان يقول...

star in the sky

يااااااااااااااااه بجد أسعدتني

فرحت جدااا إنك فهمتيني وفهمتي اللى عايزه أقوله بالضبط

تعرفى العبره مش بمين إنتصر شكلا العبره بمين إنتصرت فكرته مين ثبت على رأيه لحد الأزمه متعدي وحمى فكره ومبادءه وقدر ينقلها لغيره

إيمان يقول...

ستوووووووووووته حبيبتي

لازم كلنا نصدق إن في خير وعدل وحب

حتى لو القوالب نامت والإنصاص قامت

علشان الحق والخير ربنا هو اللى بيحميهم مش إحنا ولو سيناريو الحياه البشر هم اللى بيكتبوه وبيتحكموا فيه كانت العالم إنتهى من زمااااااااااان

قال تعالى
(ولنبلونكم بشيء من الخوف والجوع ونقص من الأموال والأنفس والثمرات وبشر الصابرين. الذين إذا أصابتهم مصيبة قالوا إنا لله وإنا إليه راجعون. أولئك عليهم صلوات من ربهم ورحمة وأولئك هم المهتدون).

وقال تعالى
(أحسب الناس أن يتركوا أن يقولوا آمنا وهم لا يفتنون. ولقد فتنا الذين من قبلهم فليعلمن الله الذين صدقوا وليعلمن الكاذبين).

sara el banna يقول...

يااااااااااا يا ايمي بقالي كتير مدخلتش عندك و اول ما ادخل الاقي الكلام الحلو دا بجد معاكي حق يا ايمان الواحد فعلا بيشوف الدنيا بقلبه و علي حسب نييته وحشتيني :)

إيمان يقول...

سااااااااااااااره

الله بجد بفرح لما بشوفك هنا

مرسي يا سوسو على الكلام الجميل ده

يا بخت اللى في بالى