السبت، 27 يونيو 2009

كيف تخسر صديق .. دون أن تشعر بضيق



1_ كن سئ الظن ( على أساس أنك فهلوى وفاهم كل حاجه و بنظرة عين تعرف اللى قدامك بيفكر فى أيه )

2_ تصيد الأخطاء ولا تقبل الخلاف فى وجهات النظر ( وخليك ماشى بطريقة بوش اللى مش معانا يبقى علينا
وطبعا أنت عارف أيه اللى حصل لبوش فى الأخر .. وتمسك بفكرة أن الاختلاف يفسد الود والقضيه وكل حاجه)

3_ ذكره دائما بما تفعله من أجله حتى ولو كان حقيرا ولا يستحق الذكر ( أحسن ينسى أفضالك عليه وكرم أخلاقك عليه
وبعدين دا انت لولاك عليه كان زمانه لسه بيستعمل مناديل فلورا لحد دلوقتى )

4 _ كن مستمعا سيئا ( يعنى متدهيوش فرصه يفضفض معاك بكلمتين أبدا كل ما يجى يحكى عن حاجه القط أول كلمه فى الحوار
وأفضل أحكي عن نفسك وعن أمجادك فى مثل هذه المواقف مش زى حالاته مش عارف يتصرف ومتفوتش الفرصه بالمره
وأحكيله عن كل أصحابك التانين اللى مبيقدروش يتصرفوا من غير حكمتك و وفهمه بقه أن الحياه كلها مصاعب وأنه لازم يتحمل
شويه مش معقول أول متقابله مشكله يزن ويقرفنا كده مش قصه هى )

5_ الشكوى المستمره ( يعنى كل ما تشوف وشه أو تسمع صوته مترحموش أشتكى من الكهربا المقطوعه والنت اللى فاصل
الحر اللى يخنق والاسعار المولعه العيشه السوده والبلد اللى باظت وافلام رشدى أباظه اللى بيعرضوها ليل نهار
يعنى هم الاصحاب اتعملوا ليه علشان نخنقهم ونكد عليهم طبعا وده على أساس أنك مسمعتش قبل كده احاديث الرسول
صلى الله عليه وسلم ( بشروا ولا تنفروا ) .. ( تبسمك فى وجه أخيك صدقه )
وطبعا معندكش أى فكره عن علم النفس اللى بيقول أن المزاج أو الحاله النفسيه مرض معدى بتتنقل بالرغى أو البوز الطويل

6_ إذاعة سره ( معلش حقك برضه أصله صعبان عليك ومقطع فى قلبك ومش قادر تمسك نفسك من الزعل
لو متكلمتش مع حد هتفرقع من الزعل .. معلش حقك برضو ذيع ذيع ولا يهمك وأكشف ستره وسيحله
مش مشكله وبعدين أنت حكيت لمين يعنى ده للجيران ولخاله سعديه الرغايه ولأصحابك فى الشغل ولفتحيه بتاعة الطماطم
اللى فى أول الشارع .. بس هم دول مفيش غيرهم )

7_ الشكوى من إتصالات وزيارات الأصدقاء الأخرين ( يمكن يحس على دمه ويخف شويه بس لو مفهمش بقه
المره اللى جايه جبهاله على بلاطه يمكن يخاف من البلاطه ويحترم نفسه )

8_ لا تسأل عنه إذا غاب ( يعنى هيتنيل يروح فين .. وبعدين ليفتكر نفسه مهم ولا حاجه .. سيبك منه بكره يرجع
ولا ان شاله مرجع يعنى هيبهللها )

9_ إحكى له عن عيوب أصدقائك الأخرون وعن أسرارهم ( علشان يبقى متطمن على مستقبله معاك وعارف حدوده)

10_ لا تترك فرصه تستطيع أن تذكره فيها أنك افضل منه دون أن تذكره بذلك ( أحسن ينسى أصله ولا حاجه
وينسى أنت مين وهو مين )


مستنيه إضفاتكم لأن اكيد فى حاجات تانيه أنا نسياها

هناك 53 تعليقًا:

همسة ايمان يقول...

هيييييييييييييه اول تعليق

استنى بقى هاقرا واجى

همسة ايمان يقول...

ههههههههههههههههههههههه

دانا كدة هاطفشه يعنى هاطفشة

لالا انتى موش ناسيه اى حاجة

انا بس استعمل خطوة واحد من الى انتى قلتيهم

وهى ببقى هاتتطفش لوحدها

عسوله خالص البوست

اول زيارة ليا واول تعليق وان شاء الله

ميكونش الاخير

تقبـــــــــ مرورى ـــــلى

ستيتة يقول...

العنوان المضبوط يا قمر

كيف تخسر صديق .. يا عبيط
هههههههههههههههههههههههه

انت قلت كل حاجة
بس فاضل شيء واحد بس

افرض وجودك عليه زي ضله لحد ما يقول حقي برقابتي ولا تحترم خصوصياته

اياك وان تعذره على ظروف لم يشرحها لك على عرض حال دمغة وعمرك ما تقول يمكن معذور
هههههههههههههههه

بوست جميل
صباح الفل والياسمين عليك ياقمر

لجين أبو الدهب يقول...

هو لسه فى حاجة تتضاف
هو بس يعمل دول وصاحبه مش هيسأل فيه طول عمره لغاية الممات

ربنا يعيذنا شر الاصدقاء اللى زى دول

ايمان حبيبتى جزاكِ الله خير على البوست الشرير

وعايزين البوست الجديد كيف تعيد الصديق بأسهل طريق ..

دمتِ بخير ..

غير معرف يقول...

ايه الجمال ده ياايمى
وانا اللى عمالة ادور حوالين نفسى
من كام صديقة اخلص منهم ازاى
افادك الله ياحبيبتى
اسلوبك رائع وعلى فكرة اخبارك
الصحية والنفسية ايه ياقمر
عاوزاة اطمن عليكى
ربنا يكتب لك الخير
كان نفسى اكتب حتة تكونى ناستيها
لكن ملقتاش هو انتى سبتى حاجة
تحياتى ياقمر

SHAPE YOUR LIFE (ABOALI) يقول...

الصاحب ساحب

فاءن تم السحب الى الرجيم
بدل من السحب الى الرحيم
والفرق نقطة تحت الجيم
ولكن عندما توضع لها فرق كبير


صناعة الصديق مهارة لا يتقنها الا العقلاء



خالص تقديرى على البوست المميز فى نقاط تعلمت منها الكثير
فلدى صديق يجب ان اخسره

هاطبق عليه و اقولك

تحياتى

MǿиY El-Shreef يقول...

ههههههههههههههههههه

يالهوي

ايه ده انتي مجربه ولا ايه :P

ربنا مايحمها علينا لو كانت كده ياختي

:D

وحشاني اوي يا ايمي

مووووواه

Ahmed يقول...

داحنا كده مش هنخسره بس
داحنا ممكن احسن واسرع نديله رصاصتين في نفوخه ونخلص منه بدل العذاب ده
ههههههههههه

Unknown يقول...

هعلق على العنوان
ن يفقد صديق ولا يشعر بضيق فهو انسان
ميت متبلد المشاعر والاحاسيس

حمدي مناع يقول...

ما شاء الله
افكار تودى فى مصيبة
المهم
انا يا اختى جديد فى عالم التدوين
اتمنى من حضرتك انك تشرفى مدونتى بالزيارة
http://hamdy-manaa.blogspot.com/
شكرا مقدما

ديالا يقول...

ايه الافكار التحفه دي

بس بجد حاجه زي الفل

تقبلي مروري

ومازلتُ أتعلم يقول...

ههههههههههههههههههههههههه
تحفة تحفة وجامدة الافكار ديه

هههههههههههههه

بجد جميلة ولذيذة

شكراً

عاشقه الرومانسيه يقول...

صداقه ايه الطين دى ياايمان؟
بلاها يابنتى الصداقه اللى تجيب المرض دى
انا نزلت بوست قريب من كلامك ده
بس اسلوبك انتى اجمل
هتلاقيه فى الرابط ده
http://mero200528.blogspot.com/2009/05/blog-post_30.html
بس انا مش كان قصدى الصداقه
قصدى الناس بشكل عام

بنجاواتى يقول...

شكرا ع النصايح الغالية

انا شايف ان اهمها هى كثرة الشكوى

بجد بتبقى حاجة تخنق

تحياتى

مجرد مدونة يقول...

أنا معترض على الاتنين دول:



7_ الشكوى من إتصالات وزيارات الأصدقاء الأخرين ( يمكن يحس على دمه ويخف شويه بس لو مفهمش بقه
المره اللى جايه جبهاله على بلاطه يمكن يخاف من البلاطه ويحترم نفسه )


9_ إحكى له عن عيوب أصدقائك الأخرون وعن أسرارهم ( علشان يبقى متطمن على مستقبله معاك وعارف حدوده)

===============================

المفروض يبقى صريح من الأول متهيألى

أم فريده يقول...

هههههههههههههههههههههههه

انتى بتعلمينا ازاى نخسر اصدقائنا
اية الجمال دة

لاء بس اسلوب جميل فى الدعوة عن الابتعاد عن بعض السلوكيات الخاطئة واحنا بنتعامل مع اصدقائنا

وتخيلى انا لاقيت نفسى بعمل حاجات منهم من غير ما اقصد

هبطلها

مووووووووووووووووه

MaNoOoSh يقول...

ربنا ما يحكم علينا نطبق اى حاجة فى دول
ولا حتى غصب عننا

بوست جميل قوي يا ايمى
تسلم ايدك يا قمر

جحا المصرى يقول...

هههههههههههههههه
ليه بس الزعل طيب
ربنا ميجيب أى خسارة
سعيد بتعرفى على مدونة حضرتك

Mony يقول...

ربنا يكرمك يا جمي

انا بأه اخلي الكتلاوج ده معاي علشان اول ما الاقي بندين تلاتة الواحد ياخدها من قاصرها بدل قلة القيمة
اصل اختك عبيطة و علي نيتها
و بفرض حسن النية طول الوقت
لحد ما اخد قفا فعلي علي قفايا
:)

إيمان يقول...

همسة إيمان

نورتى المدونه و الشارع كله

ويارب ضيفه دائمه لمدونتى المتواضعه

حلم بيعافر يقول...

لا والله نصايح جامدة
انت شكلك بتهدى النفوس

لاسع افندى يقول...

11 - استلف منه فلوس وماترجعهاش(على اعتبار ان الجيب واحد)

12 - كل ماتشوفه اطلب منه الموبايل علشان تعمل مكالمه مهمه وكلم صاحبك التانى هزر معاه


تحياتى

إيمان يقول...

ستوته حبيبتى

حلو الكلام
افرض وجودك عليه زي ضله لحد ما يقول حقي برقابتي ولا تحترم خصوصياته

اياك وان تعذره على ظروف لم يشرحها لك على عرض حال دمغة وعمرك ما تقول يمكن معذور

وحياتك كنت هكتبهم بس خفت حد يفهمنى غلط ويزعل

ياسلاااام دايما كده تفهمينى من غير متكلم

إيمان يقول...

لوجى

حلوه فكرة البوست كيق تعيد صديق بأسهل طريق
وبعدين ايه رأيك الشر له جماله برضو
منورانى ويارب تكونى بخير دايما

إيمان يقول...

أم مالك

حبيبتى شكرا على سؤالك على واهتمامك

أنا بخير الحمد لله أحسن من الأول

دعواتك معايا

وكويس انى افدتك هههههههههههه

واضح انك كنت على أخرك من الكام صاحبه دول
منورااانى ومنوره عالم التدوين كله

غير معرف يقول...
أزال المؤلف هذا التعليق.
غير معرف يقول...

هههههههههههههههههههههه

دا تطفيش رسمي ولا ايه

دا صاحب لا يطاق

والعكس صحيح والله نصائحك مفيدة جدا

لازم نهتم باصحابنا وتكون علاقتنا معهم متينة وما نضايقهم باي حاجة

تسلم ايدك ياقمر عالبوست الهايل

مرايتى يقول...

سلام عليكم
دى أول زياره لى وعجبنى البوست قوى
بس إلى يتقال عليه بجد صديق دلوقتى بقى نادر جدا
أكيد إلى بتحكى عليه مش صديق لانه لو صديق بجد مش حتزهقى منه أو يعنى منها دا بقى نادر جدا انك تلاقى صديقه وفيه الايام دى

المهم نصايحك هايله للالى مزهقنا

تحياتى ياقمر

يــوم جــديد يقول...

نصائح مفيدة جدا جدا
من إنسانة بعيدة عنها جدا جدا
ووحشتيني جدا جدا جدا :)

beautiful mind يقول...

طيب يا ايمان كان الاحسن تقوليلنا ازاي نكسب صديق
بس ببيني وبين الكلام دا تمام وينفع مع الاصدقاء اللي بقي دمهم تقيل وبقوا بيرخمو علي اي حاجه

دا اول تعليق ليا هنا واول زيارة وان شاء الله لن تكون الاخيره

لاني هضيف المدونه عندي

عجبتني بجد

تقبلي تحياتي

إيمان يقول...

أبو على

احنا جايين نهدى النفوس البوست علشان نتجنب هذه الاشياء اللوزعيه
وانت عايز تحملنى ذنب صديقك لا يا عم مليش دعوه

إيمان يقول...

مونى الشريف

لا يا جميل متخفيش ربنا يبعد عنك الصداقه اللى بشكل ده
انتى اللى وحشانى يا قمر

إيمان يقول...

م/ احمد ابو العلا

تتصور فكره رصاصتين فى دماغه ونخلص

بس المشكله تمن الرصاصتين على مين

إيمان يقول...

نهر الحب

عندك حق اللى يخسر صديق دون ان يشعر بضيق يبقى معدوش احساس اصلا
منوره المدونة يارب دايما

إيمان يقول...

حمدى مناع

مبروك دخولك عالم التدوين

نورت والله مدونتك جميله ومميزه

ماشاء الله

إيمان يقول...

ديالا

نورتى المدونه

كويس ان الافكار عجبتك

مستنياكى دايما

إيمان يقول...

ومازلت أتعلم

ههههههههههههه
أنا شخصيا عجبانى الافكار
الغريب ان كتير مننا بيعملها مع اصحابه
اللى بيحبهم تفتكرى قصده ايه
نورتى المدونه

إيمان يقول...

عاشقه الرومانسيه

مش عجباكى الصداقه دى يعنى بذمتك ممرتش عليكى قبل كده
قريت البوست بتاعك بجد تحفه وعجبنى جدااا
وموضوعه روعه تسلم ايدك

إيمان يقول...

بنجواتى

اه بصراحه موضوع الشكوى ده بقى حاجه تخنق بجد كل حاجه شكوى ومن اى حاجه
لدرجة فى ناس بتشتكى انها اكلت كتير امبارح وبطنها وجعتها
حاجه بجد خنقه

إيمان يقول...

مجرد مدونة

طبعا بتهزر

يعنى بتبقى حاجه وحشه جدااا

لما تيجى واحده صحبتى تقولى على سر واحده تانيه او تشتكى منها وتجيب سيرتها بحس انى خايفه ومن قال لك قال عليك ولا ايه
منور دايما

إيمان يقول...

حبيبة سى السيد

تصورى فعلا كتير منا بيعمل بعض حاجات

من هذه الافعال السوداء

ربنا يكفينا شر هذه الصداقه

إيمان يقول...

منووووش

يارب بجد اصل اللى يجيله قلب يطبق حاجه من دول
اكيد بيكون خلاص فقد المعنى الحقيقى للاصدقاء
منوره يا ست البنات

إيمان يقول...

جحا المصرى

ههههههههههه
الزعل طيب برضو

نورت المدونه وانا اسعد بمرورك

إيمان يقول...

مونى

كويس انك استفدتى من البوست لكن ربنا يستر
ونبقى بنهدى النفوس انتى عارفه طبعا

إيمان يقول...

حلم بيعافر

هو انا طبعا جايه اهدى النفوس هو مش باين ولا ايه
نورت المدونه

إيمان يقول...

لاسع افندى

ههههههههههههههههه

اه صح جامده بجد 11 و12

هضيفهم طبعا

شكرا على الافاده

إيمان يقول...

نواره
نورتى المدونه
احنا فعلا مفروض نكون اكثر حرصا على اصحابنا كتر من كده
لأن الصديق اللى بيروح تعويضه فعلا صعب

إيمان يقول...

سمسمه

فعلا عندك حق الاصدقاء الحقيقي بقوا قليلين
وفعلا مبنزهقش منهم
لكن هى بس محاوله علشان منزهقش بعض
نورتينى ونرتى المدونة بتعليقك المميز

إيمان يقول...

يوم جديد

انتى اللى وحشانا جداااا يا جميل

نورتى المدونه وكويس ان النصايح عجبتك

إيمان يقول...

العقل الجميل

الفكره من البوست هى لفت نظر الناس للحاجات اللى بيعملوها من غير ما يحسوا وفى الاخر يقولوا مفيش اصحاب
والناس مبتسألش علينا
نورت المدونه يارب منورنا دايما

حــــــــــواء يقول...

اول زياره لمدونه جميله
انا بقي بصراحه معنديش حد اخسره
لانهم هما اساسا يتعدوا علي الصوابع
يلا اهو قرينا علشان اللي يعمل معانا حاجه من ديه نبقي عارفين برده


بوست جميل اوي
تحياتي

assafo anaroze يقول...

سلام كبير للست ايمان
انت ايه ده انت مش حتكسبي صديق بل حتطفشي كل الاصدقاء ايه النصائح النحس ديه
مودتي المتواصلة

مجرد مدونة يقول...

هو أنا فعلا بهزر اصلي لقيتهم اخف اثنين ..