الخميس، 12 مارس، 2009

أحمد رئيس الجمهوريه ..... 3


< حانت الساعه .... اليوم موعد أحمد مع رئيس الجامعه
الألمانيه ... ليناقش أفكاره لرسالة الدكتوراه .. تعب أحمد
كثيرا طيلة الأسابيع الماضيه ليحضر تلك الأفكار وليستعد
جيدا لهذا اللقاء....ولكن ولأن أحمد شاب مصرى جدا كما ذكرنا
( راحت عليه نومه )
وذهب إلى الموعد متأخرا ... فى طريقه إلى الجامعه فكر كثيرا
فى عدم الذهاب .. لقد وضع نفسه فى موقف سيئ للغايه
( يا فرحتك سهران على النت طول الليل .. خللى النت ينفعك)
هكذا أخذ أحمد يتجادل مع نفسه
ولكنه .. ورغم كل شئ قرر الذهاب
وصل أحمد... متأخرا جدا وبالطبع
لم يستطع الحفاظ على إبتسامته العذبه الواثقه
هذه المره .. فدخل مرتبكا مترددا .. واستأذن فى الجلوس
كانت نظرات رئيس الجامعه .. تحكى مالا تستطيع حكايته الألسن
ورغم كل هذا الإرتباك إستطاع أحمد شرح بعض الأفكار
التى أعدها لرسالة الدكتوراه ... ومع إستمرار أحمد فى محاولة
شرح أفكاره .. بدأت نظرات رئيس الجامعه تقترب للإعجاب
ثم للإنبهار .. شيئا فشيئا .. بالطبع ليس لتفوق أحمد وحديثه الواثق
ولكنه تعجب كثيرا ... من إمكانات خريجى الجامعات المصريه
وتعجب أكثر من كم المعلومات الهائل ..
الذى يدرسه الطالب فى الجامعات المصريه
فأبدى دهشته وإعجابه ببعض الكلمات القليله .. مما جعل أحمد متفاءلا
ولكن وعلى غير المتوقع .. وبعد أن عبر رئيس الجامعه لأحمد
عن إعجابه وتقديره .. إعتذر له عن إمكانية بدأ الدراسه الأن
وأعطاه موعد أخر بعد ثلاثة أشهر .. ..
خرج أحمد من الجامعه .. يقتله اليأس .. وحاول البحث فى داخل عقله
عن أى جمله او كلمه من نوع ( إتقدم إتقدم وكفايه خلاص تتندم)
فلم تسعفه روح التفاءل التى بداخله ..
( راحت عليها نومه )
مرت اسابيع قبل أن يستعيد أحمد نشاطه فى عالم التفاؤل
فترة التدريب قصيره ليس هناك وقت للإحباط
فأخذ يفكر فى حل أخر( الجامعات كتير نحاول تانى)
هكذا أقنع نفسه بالبدأ من جديد فى جامعه أخرى
وبالفعل .. ذهب إلى جامعه أخرى .. دخل إلى أروقة
الجامعه .. وسأل عن رئيس الجامعه
ولكن هذه المره كان رئيس الجامعه إمرأه ..
وصل أحمد إلى مكتبها بعد رحلة بحث مضنيه إستغرقت
يومين ...
هذه المره كان أحمد أكثر إصرارا .. وأكثر تصميما
على الوصول لهدفه
وبالفعل إقتنعت السيده رئيسة الجامعه بأفكار أحمد
وبإسلوبه فى العرض .. وبخفة ظله أيضا
فطلبت منه تحضير أوراق كثيييييييييره ... لعمل معادله لشهادته
ليتمكن من تحضير الدكتوراه مباشرة دون الحصول على الماجستير
خرج أحمد سيعدا متفاءلا ... الحياه أمام عينيه بدت وكأنها (بمبى بمبى)

البقيه الحلقه القادمه


رابط الجزء الأول http://banaty.blogspot.com/2009/03/blog-post.html
http://banaty.blogspot.com/2009/03/2.html رابط الجزء الثانى
.

هناك 44 تعليقًا:

عاشقه وغلبانه يقول...

احمد رجع
هييييييييييييه

وش مكسوف

عاشقه وغلبانه يقول...

ماتحكي القصه علي بعضها يا ايمان
انا مش بحب التشويق ده
بتغاظ ياجميل والله
بتفكريني بالمسلسلات التركي
هههههههههههههههههههههههههههه

وبعدين حصل ايه بقي
قوليلي

عاشقه وغلبانه يقول...

انا لوحدي هنا ولا ايه
يا ايمااااااااااااااااااااااااان

عاشقه وغلبانه يقول...

صحيح يا روح قلبي هي عاشقه الرومانسيه قافله البلوج للكل ولا ليا انا بس
انا حاسه اني مطروده

لو مفتوح ليكي قوليلها تفتحلي
اهئ اهئ

عاشقه الرومانسيه يقول...

ايمى

وحشتيـــــنى

عاشقه وغلبانه يقول...

عاشقه الرومانسيه

يعني انتي شايفه ايمي ومش شايفه اللي بتسأل عليك

انتي طرداني من بيتك
اهئ اهئ
ماكنش العشم

إيمان يقول...

عاشقه وغلبانه

وبعدين معاكى خلى عندك صبر
وبعدين بصراحه أنا عايزه أنام
منمتش من يومين
مقدرتش أكتب أكتر من كده معلش سامحينى
وبعدين مين هيتحملنى غيركم
ينفع كده

إيمان يقول...

عاشقه الرومانسيه
إنتى إللى وحشانى جدا جدا
مينفعش إللى إنتى بتعمليه ده
وبعدين على فكره أحمد حصل معاه موقف
شبه موقفك ده بالظبط
كبرى دماغك شويه
روقى d

عاشقه وغلبانه يقول...

روحي نامي يا ايمان
انا كمان هاقوم اخطفلي ساعتين قبل الشغل اصل اروح انا علي اقرب سرير هناك
هههههههههههههههههههههه

عاشقه وغلبانه يقول...

يا عاشقه الرومانسيه

كبري الجي والدي وكل حروف الانجليزي زي ما ايمان قالتلك
بس افتحيلي باب المدونه
اهئ اهئ

احساس طفلة محبة للرومانسية بس واقعية يقول...

برضو 10 تعليقات قبلى وكلهم عاشقة وعاشقة وايماااااااان
طيب اعمل اية عشان اكون اول تعليق هنا
اقولك يا ايمان ابقى قوليلى ميعاد تنزيل البوست اللى جى
هاهاهاهاهاهاهاها

اسمحيلى اقولك لعاشقة الرومانسية تفتح مدونتها
وان شاء الله كل الامور هتتحل بس فى ناس كتير بتحب تتابعك

نيجى بقى لموضوع احمد
انا مبسوطة انك رجعتى تكملى الحكاية تانى
والحمد لله انه وافق اخيرا
الجميل فى الحكاية اصرار احمد وعدم استسلامة لليأس
بس الغريب بقى انى مش فاهمة ازاى دكتوراه من غير ماجيستير
مستنين باقى الاحداث
واوعى تسمعى كلام عاشقة وغلبانة التشويق حلو جدا وبتقفى عند نقاط فاصلة
كملى متبعاكى
تقبلى مرورى

د/عرفه يقول...

دايما كده الكتاب بتوعنا بيحبوا النهايات السعيده رغم ان القصه منتهتش بس اكيد نهايه سعيده
وبعدين
نزلى الحلقات ورا بعضها على طول علشان مننساش اللى فاتوا مش بحب السلاسل الطويله اللى بتتاخر
مش كفايه انها طويه
هههههههههههههههه
على العموم اكتبى براحتك ادينا مستنيين
ورانا ايه

ELMASRYA - MOSLEMA LELLAH يقول...

كده برضه يا إيمان ؟

شوقتيني أعرف الباقي وسبتيني

ياترى يا أحمد عملت إيه؟

يللا بقى كملي بسرعه

الموضوع ده لو توفر في كل شاب حال مجتمعنا هيختلف 360 درجة

دمتي سالمة

ABOALI يقول...

ههههههههههههههههه
التعليقات كلها حروف العين

ايه الحكايه

ما بين العاشق والرومانسى


على العموم يا ايمان

احمد كان جعان
ونفسه يبقى ناجح كمان
ولاءنه هو نفسه
قال
انا ليا مضمون وكيان
وشوفوا حكايتى مع ابله ايمان


منتظر


تحياتى

Lady E يقول...

اهيء اهيء اهيء يعني انا اغيب عن المدونة شوية صغنونين الاقي فاتني كل البوستات دي هقرأ من الاول وهاجي تاني

بنوتة يقول...

السلام عليكم
ازيك يا ايمى
حلوة لأوى أوى
وبجد متشوقة جدا أعرف لباقى دا
انا مبسوطة انك رجعتى تكمليها تانى
سلام يا قمر
وتحياتى

فليسيتى يقول...

يعنى افهم بقى
اجمد ده واقع ولا من بنات افكار ايمان
اصلى لسه جديده ومش متابعه قوى
بس اكيد مش واقع النجاح ده ميطلعش من شاب مصرى ابداااااااااااا(حبه تفاؤل )

زوجة عنيدة يقول...

هيه هيه هيه
احمد رجع تانى هموت واعرف اية اللى وصلة احمد

انا مش لحقت اقرا بوست عاشقة الرومانسية الاخير وداع

هو فى اية قوليلها يا ايمى ترجع بلاش دلع


بحبك يا احلى ايمى

طوبة ذهب وطوبة فضة يقول...

جميل اوى الاسلوب تسلم ايدك اول زياره وان شاء الله مش هتكون الاخيره

mony يقول...
أزال المؤلف هذا التعليق.
حسام غانم يقول...

ايه التشويق ده ؟

متنزليها مرة واحدة

بس الاسلوب جااامد

تامر علي يقول...

أحمد ده حكايته حكايه :) .... مش بعيد يطلع رئيس جمهورية (كندا) ... وبكده يبقى تغلب على كل تحدياته :) ... في انتظار باقي الحكاية .. وربنا يسترها معك يابوحميد :)

hasona يقول...

السلام عليكم

الحمد لله لحقت قبل العرض ما يخلص

وبسرعة
عملت نسخ ولصق
قبل الحذف
وأقري براحتي بقي
مش حاسس ان فيه حد بيجري واريا
ويمكن مش ألحق اكمل قراءة والعرض يخلص
أو حد يرجع في كلامه

تحياتي

dodda يقول...

ايمان

انا عاوزه ايميلك
ممكن تكتبيه عندى فى تعليق وتمسحيه وانا حاخده من الميل عندى

-------
بتمنى ان اى حاجه بمبى
تخبط فيا
او تعدى حتى من جنبى

ستيته حسب الله الحمش يقول...

عارفة اللي زي الشاب الهمام ده سهل جدا جدا يطلع رئيس الولايات المتحدة

عندنا موظف بجرنال وبطيخة ويدخل على المودام ينام ويصحى يقعد على القهوة

راجل بالطموح ده حقه يحلم يبقى رئيس جمهورية

ها لخصي وخلصي بدل ما ادعي
ارحميني

إيمان يقول...

احساس طفلة محبة للرومانسية بس واقعية
شكرا لتشجيعك ..ولمتابعك بجد سعيده جدا
أتمنى إنى مكنش ممله ..
تحياتى ليكى ولرومانسيتك الواقعيه

إيمان يقول...

نسيت أقولك ...فى ألمانيا كان فيه قانون يسمح لأى حد يدرس بحريه فى أى مجال ..وبيسمح كمان بتحضير رسالة الدكتوراه مباشرة من غير ماجستير
الموضوع يرجع للمشرف على الرساله ..ولتقديره
للأسف القانون ده إتغير فى 2009
والموضوع ممكن يكون أصعب دلوقتى
لكن مش مستحيل

إيمان يقول...

د/عرفه
ياسلالالالالالالام مفيش صبر خالص
على العموم أنا مقدرتش أكمل القصه إمبارح
لأنى كنت تعبانه جدا وعايزه أنام
معلش بقه سامحنى يا دكتور
وبعدين بجد والله أنا مكتبتش نهايه سعيده
من نفسى هو ده إللى حصل بالظبط
معرفش الحلقه الأخيره عالبا مش هتكون سعيده
إنت عارف ..تحيا مصر وموظفين مصر والخدمه العسكريه المصريه
تحياتى

إيمان يقول...

ELMASRYA - MOSLEMA LELLAH
منووووووووووووره
أيه رأيك فى أحمد .. بس إنتى عارفه
والله أحمد شاب عادى جدا جدا
الفرق بينه وبين شباب كتير
إنه مش عايز ولا ناوى يتنازل
كل ما الدنيا تتقفل فى وشه
يدور على مخرج ..مبينشفش مخه مع الدنيا
بيخدها على قد عقلها

إيمان يقول...

ABOALI
ماشى يا ابو على وصلت لأبله إيمان
ده أنت شكلك زهقت منى على الأخر
معلهش بقه .. إحنا إخوات برضو
ولإخوات لبعضها .. إتحملنى

إيمان يقول...

ليدى هانم
مستنياكى تقرى وترجعى
وبعدين مردتيش عليه فى موضوع دروس التقويه
ههههههه
ماشى

إيمان يقول...

بنوته
وحشتينى جدا وزعلانه جدا إنك قفلتى المدونه
ماشى ربنا يسامحك
سعيده جدا جدا لأنك لسه موجوده فى وسطنا
أتمنى إنك متغبيش أبدا
تحياتى ليكى ولقلمك الجميل اللى وحشنى

إيمان يقول...

فليسيتى
أهلا بيكى يا قمر
قصة أحمد حقيقيه جدا
وعلى فكره أحمد مش أحسن من أى شاب مصرى أخر
هو بس مش راضى يستسلم
عنده حبة تفااااااءل

إيمان يقول...

زوجة عنيده
أهلا أهلا بأجمل زوجه
معرفش عاشقه الرومانسيه
شكلها زعلانه شويه إن شاء الله
تروق قريب
تحياتى لمتابعتك
وفين أختك

إيمان يقول...

mony
أهلا بيكى ..هو إنتى ليه مسحتى التعليق
متخافيش مكنتش هزعل من أى حاجه
تحياتى ليكى وتنورينى فى أى وقت

إيمان يقول...

حسام غانم
ليه كده المعامله دى
محدش فيكى طايقنى كده ليه
هو أنا زهقتكوا أوى كده
منور يا استاذ حسام
وبالنسبه للأسلوب ميجيش من بعد أسلوبك
إنت أللى فنان ماشاء الله

إيمان يقول...

تامر علي
أهلا أهلا أهلا
منور يا أستاذ تامر
والله أحمد ده طلع ليه فوايد كتير
كفايه إننا نتطمن عليكوا ونشوف أخباركم
تحياتى وتقديرى ووافر إحترامى

إيمان يقول...

hasona
أهلا بيك
وبمرورك المميز دائما
فى إنتظارك رأيك ونقدك
بعد القرأه المتأنيه
تحياتى

إيمان يقول...

dodda
ياسلام يا دودا ده أنا إللى كون مبسوطه جدا
لما أتعرف عليكى إيميلى يا ستى
reem2345@yahoo.com
مستنياكى فى أى وقت

إيمان يقول...

كده يا ستوته يا حبيبتى
عايزه تدعى عليه
ماشى ربنا يسامحك
على العموم هلخص ..هلخص بس من غير ضرب
لو سمحتى
بحبك جدا جدا

زوجة عنيدة يقول...

اختى عندها مذاكرة بعد الشر فكرت انها تذاكر بعد الدرجات التحفة اللى كانت جايبها فى الترم الاول

انا قلتلها امبارح وقالتلى هتشوفة

سلام يا احلى ايمى

ايمان روحي يقول...

هيييييييييييييه انا التعليق 42
مبسوطه بنفسي
هههههههههه
بس يعطيكي العافيه الامل شي حلوا كتير يارب كلنا نتحلي فيه
وهستني الجزء الباقي
تحيــــاتي

إيمان يقول...

زوجة عنيدة
ماشى ربنا مع أختك
البنت كانت بتجرب الدرجات التحفه
مفيهاش حاجه يعنى
سلميلى عليها جدا

إيمان يقول...

ايمان روحي
أحلى تعليق ومسك الختام
أخر العنقود بقه
مستنياكى دايما .. أصلك بتفكرينى بشبابى
ههههههههه
والله انا مش كبيره قوى أنا كويسه برضو