الأحد، 22 مارس، 2009

تتجوزينى........أيوه طبعا




أنت تبحث عن شخص صريح وغير متكلف صادق ...

عليك أن تتعرف عليه إذا ..

أنت و حينما تسأله عن رأيه في أي شئ أمامك احتمالين

لا ثالث لهما إما أن تحصل على إجابة وافيه كافيه دقيقه جدا

أو أنك ستحصل على: لا أعرف

حين تطلب منه خدمة ما أمامك احتمالين إما أن يفعلها لك عن طيب خاطر

وبكل سعادة ودون تكلف

أو أنك ستحصل على : معلش والله عايز أنام أو حتى مليش مزاج

إذا وعد فهو فاعل لا محالة .... اتقان العمل بالنسبة له هدف يسعى لتحقيقه

له دائما اسلوبه الخاص ولمسته الخاصه


في بيتنا القديم وعند الظهيرة رن الهاتف ... رفعت السماعة

مين معايا

هو:أنا فلان الفلاني

أنا :أهلا وسهلا أي خدمه

هو : أيوه كنت عايز أسألك سؤال بسيط

أنا: أتفضل

هو :إنتى طبعا عارفانى كويس وعارفه أهلي

أنا: أيوه

هو : أنا يعنى كنت عايز أسألك لو كلمت والدك توافقى تتجوزينى

أنا: وبعد أن استغرقت في التفكير للحظه ماذا أقول

بجد عاجبنى وموافقة بس لازم أرد رد دبلوماسي ميصحش

لذلك أجبته: بأيوه طبعا

هو: شكرا مع السلامة

تلك هى بداية قصتنا معا .... أحببته ولم أخفى مشاعرى يوما

ولم يخفى هو مشاعره عنى يوما

... زهره حمراء كان يهديها لى فى كل لقاء هى أغلى عندى من أى هديه أخرى ...

زهره حمراء كنت على يقين أنه يهديها لى بقلبه وليس بيده ..

لأنه وبكل بساطه لن يهدينى إيها إذا كان ( ملوش مزاج)

كلمات الحب التى يمطرنى بها أحيانا تجعلنى أطير فى السماء ..

لأنه وبكل بساطه أيضا لن يسمعنى إياها إذا كان ( مبيحبنيش اليومين دول ) .. ....

كنت على يقين دائما أن أيام الخطبه ستكون هى أجمل أيامنا معا ...

ولكن وبعد مرورالعام الأول من الزواج إكتشفت أن للسعاده ألوانا أخرى.....

أحبه .. وأحب دائما أن أراه سعيدا ... يسعدنى أن أراه مشغولا ولو طوال اليوم بشئ يحبه ....

يسعدنى جدا أن أرى إبتسامته وهو يستعد للخروج برفقة بعض الأصدقاء ....

أحبه حين يغيب عنى أسابيع طويله لأنى حينها وحينها فقط أشعر بصعوبة الفراق ....

لا أهتم كثيرا إذا لم يتذكر مناسابتنا الخاصه .... أيامنا معا كلها مناسبات خاصه







هناك 48 تعليقًا:

ELMASRYA - MOSLEMA LELLAH يقول...

أجمل حاجه في إنسان بالمواصفات دي إنك تكوني عارفه ومتأكدة إنه مش ممكن يخدعك أو يكذب عليكي في أي شيء حتى عواطفه

موضوع لطيف يا إيمان

في انتظار المزيد

دمتي سالمة

لجين أبو الدهب يقول...

يااااااه ياأيمى..

قومتى الاحساسات القديمة جوايا تانى ( وش مكسوف )

أنا بقى ياستى كنت شبه كده شوية بس الفرق أنه قالها لى فى قصيدة ..

وبعد الزواج ده بقى حب من نوع خاص جدا استكمال لمرحلة الخطوبة بس اعمق منها بكتير ..

أظن فى تكملة ..

ربنا يصب عليكم الحب صبا ..

دمتِ بخير ..

بحبك ددا ددا ..

عاشقه الرومانسيه يقول...

انا باحجز بس
التالت وامرى لله

هاروح الشغل ولما ارجع بالليل
هبقى اقرا البوست واعلق
بحبك ياايمى

MaNoOoSh يقول...

انسان بالمواصفات دى كنز وربنا يديم العشرة مع انسان جميل كدة

ستيته حسب الله الحمش يقول...

أولا ربنا يبارك في عمره وصحته ويديم عليكم نعمه ظاهرها وباطنها

ثانيا تعرفي نفس الشخص اللي باطنه كظاهره ده لو كان اتجوز واحدة تانية كان تعب قوي قوي
بس هو ربنا رزقه واحده عاقلة
حطت مميزاته في كفه لقيتها تقيلة قوي رضيت بعيوب طفيفة .. ومن منا خالي من العيوب

اجمل شيء انه بيقول اللي جواه ما شاء الله ربنا يكرمه
وعليه فقلبك مطمأن وغير مضطرة انك تبصي في عينيه لقياس كمية الصدق او حتى انك تشغلي مكر النساء علشان تثبري غوره

ربنا يبارك لكم في بعض ما شاء الله لا قوة الا بالله

ربنا يهدي كل بيوت المسلمين ويخزي الشيطان وحزبه

بعبك بعبك

MǿиY El-Shreef يقول...

الله .. بجد دي احلى مكالمه سمعت عنها يا ايمي

حسيت اني فرحانه اوي كأن فرحك بكرة

فكرتيني بموقف قدييييم

ربنا يخليكوا لبعض ياحبيبت قلبي

وتبقى حياتكوا كلها حب وسعاده

وكل سنه وانتي اجمل ام ف الدنيا

احساس طفلة محبة للرومانسية بس واقعية يقول...

بجد هو دا الحب اللى بجد
عارفة اجمل حاجة انك تكونى عارفة شريك حياتك كويس
وتكونوا متفاهمين والحب بتاع الخطوبة يتحول لحب من نوع اخر اكثر تعقلا و تفهما بعد الجواز
ربنا يديم سعادتكم يا ايمان
وميفرقش بينكم ابدا

تقبلى مرورى

ايوشة يقول...

ربنا يخليكم دايما لبعض ويديم عليكم السعادة بس عجبتنى اوى موضوع اخد رايك فى انه يجى يتقدم وعجبتنى اكتر انك رديتى معتقدش انى ممكن لو حصل معايا موقف زى ده اعرف ارد

إيمان يقول...

مسلمه حبيبتى
أهلا بيكى يا جميل
يارب دايما منورانى
الحمد لله أنا أصلا من النوع الشكاك
ربنا رحمنى وبعتلى اللى صريح وصراحته من الأخر

إيمان يقول...

لوجى الجميله
قصيده مره واحده
لا يا ستى إحنا على قد حالنا
مكالمة تليفون و كفايه
ربنا يسعد أيامك كلها ويملى أيامك حب
وفرح وهنا

إيمان يقول...

عاشقه الرومانسيه صديقتى العزيزه
مستنياكى براحتك على الأخر يا جميل

إيمان يقول...

MaNoOoSh
ربنا يخليكى يا منوش
ويتقبل دعائك
بجد بفرح بمرورك وتعليقاتك
تحياتى وحبى

زوجة عنيدة يقول...

انا متغاظة جدا
انا كتبت تعليق ونشرتة بس مش لاقياه

مش مهم مش خسارة فيكى هكتب تانى

كنت بقولك انى عرفتى كل الناس ان الحب الحقيقي هو اللى بيكون بعد الجواز واللى قبله دا تعارف واعجاب مش اكتر

ومرة سألنى رومنسى عايز يعرف شكل الرومانسية بعد الجواز وانتى جوبتى علية

يا اعقل الزوجات ربنا يهنيكوا ببعض ويزيد حبه ليكى على اد ما انتى بتحبيه وتحترمية

سلام يا احلى ايمى بحبك

إيمان يقول...

MaNoOoSh
ربنا يخليكى يا منوش
ويتقبل دعائك
بجد بفرح بمرورك وتعليقاتك
تحياتى وحبى

إيمان يقول...

ستوته حبيبتى
ربنا يخليكى ليه
ويقبل دعواتك ليه
هو كمان بيقولى كده
ربنا يديم المحبه يارب
بس يعنى إنتى عارفه مكر النسا لابد منه برضو
شوية خباثه كده لزوم الحياه الزوجيه

تامر علي يقول...

فعلاً زي ما قالت الدكتورة ستيته كان ممكن شخص زي ده يتعب جداً مع شخصية لها مواصفات أخرى لاتتحلى بقدرة على النظر فيما وراء المظاهر التي تهتم بها معظم النساء .... بصراحة أنا أرى الأمر في قمة المثالية ولكن من خلال خبرتي (اللوذعية) أستطيع أن أقول أن هذه الطريقة لاتعجب الكثير من النساء .. بس بصراحة كده فل جداً :) أدام الله عليكم السعادة والعافية
أحسن حاجة إنك تسيبي جوزك يخرج ويهيص ويسافر علشان يرجعلك (فريش) مش تلزقي فيه زي ستات كتير :)حاولي تنشري الأفكار دي بين الستات :)

إيمان يقول...

مونى الشريف
منوررررررره جدا
وبحبك جدا
وبحب تعليقاتك جدا
هموت وأقرألك جدا
بس كل ماجى أدخل عندك النت يعصلج
اتمنى دايما تتحفينى بتعليقاتك الجميله
ربنا يحميكى

ٌرحيـــــــــــــــــــــــل يقول...

=) لأنج انسانة طيبة وعسل الله رزقج بزوج يشبهج، الطيور على أشكالها تقع.

بس جد رديتيلي الأمل في الزواج ، بصراحة فكرتي عن الزواج سودا ومنيلة...

الله يعطيج العافية شبيهتي :)

حسام غانم يقول...

ربنا يخليكوا لبعض يا إيمان


بجد حلو جدا الصراحة في العلاقة

إنه لما لما يبقى متضايق يقول

فبالتالي لما يقول أنا بحبك

تبقي عارفة انه مش بيكدب أو بيقول كلام وخلاص

إيمان يقول...

احساس طفلة محبة للرومانسية بس واقعية
كلامك جميل
ربنا يسعد أيامك ويحميكى
ويملا أيامك كلها حب وسعاده

إيمان يقول...

أيوشه
منوره يا جميل
بس أيه رأيك قولت الحقيقه ولا همنى
الحمد لله ربنا ستر ومطلع واحد نص كم
كان كل شويه قالى دا أنتى مصدقتى
بس صدقينى أنا من النوع الخجول جداجدا
بس لقيت كده الموضوع مش طالب تمثيل

إيمان يقول...

زوجه عنيده
بلوجر شكله زهق مننا
انا كمان مش عارفه أعلق عند حد
ولا حتى أرد على التعليقات اللى عندى
عجبنى جدا إنك عرفتى الحب اللى بعد الزواج
انا رأيى أن الحب بعد الزواج زيه زى الحب قبله
نفس الرومانسيه والهبل والتنطيط
الموضوع فى ادينا احنا
منوره يا جمييييل
كنت عايزه إيميلك أو أكتبلك أيميلى على الياهو ونتعرف
لو مكنش عندك موانيع يعنى

إيمان يقول...

استاذ \تامر
والله انا غلبت مع الستات اصحابى اقولهم
متخنقوش الرجاله تبعكم..أحسن بعد شويه
هيصدرولكم الطرشه مفيش فايده
وبينى وبينك يعنى إنتم برضو بتتخنقوا بسرعه
مفيش طولة بال خالص
ربنا يسعدك ويسعد أيامك
تحياتى

إيمان يقول...

رحيل
أهلا بحبيبة قلبى
لا تخشى الزواج أبدا
المهم الإختيار الجيد والمناسب
وياريت تبطلى تنشيف دماغ شويه
والدنيا هتبقى فله

إيمان يقول...

حسام غانم
ربنا يخليك ويسعد أيامك
الصراحه راحه..
والكدب اكيد بيبان
منور يا دكتر معرفش انت مرتبط ولا لأ
بس يارب ايامك مع شريكة حياتك تكون كلها حب وسعاده

assafo anaroze يقول...

ما فيش اي كلام ح ازيدو غير ربنا ينعم عليكم بدوام الحب
مودتي

hasona يقول...

السلام عليكم ورحمة الله وبركاته

كما أن الخط المستقيم هو أقصر خط بين نقطتين
فأن الصدق والوضوح هما أقرب الطرق الي القلب

عندما نستشعر الصدق في شخص وخصوصا اذا كان من المحيطين بنا أو أقربهم ( الزوج أو الزوجة )فأن ثقتنا تزيد في كل كلمة وفعل يخرج منه

وكل يوم حبنا يزيد له مقترنا بثقة كبيرة
وقتها نتذوق كل طعم للسعادة
ونستقبل كل شئ برضا تام
،،،،
أنعم الله عليكم بالرضا
وظللكم بالحب والتقوي
ورزككم الذرية الصالحة

وكل سنة وانتم طيبين

تحياتي

ABOALI يقول...

فى ناس
لما تزعل
تبستم ليها العيون
وتتمنى تفتح عينك
وتحرسها بين الجفون
ويجرى بسرعة ليهم قلبك
ويشتاق ليهم بجنون
ونفسك يكونوا جنبك
وتقول عليهم حكايات
مهما تتطول
ولما يبعدوا عنك
قلبك يخرج منك
تايه يلف عليهم
ويركب موجة
ينادى
لعل وعسى
يلاقيهم تانى
ولما تشوفهم تانى
تحس
انك عاوز يضمهم قلبك
وعمرهم ما يبعدوا عنك
وتغمض عينك عليهم
ويبتسم فمك
وتتكسف عيونك
علشان حبك ليهم
وترتاح نفسك
بس ياترى
فى ناس فعلا
لما تزعل
تبستم ليها العيون
شوف طفل برىء
او شيخ شاخ
فى جبهته رسم طريق
امك نظراتها همساتها
كلها حنان عليك
شوف حبيبك
لما يغيب ويقرب
ياااااااااا سلام
فى ناس لما تزعل
تبتسم ليها العيون



تحياتى الراقيه
وادام الله الود والخير

زوجة عنيدة يقول...
أزال المؤلف هذا التعليق.
زوجة عنيدة يقول...

انا بعت الايميل يا رب يكون وصل

norahaty يقول...

ربنا يخليكو لبعض ويديم عليكم
نعمة الامن والامان والحب والسلام

aidy يقول...

أكيد الحب ده اجمل شئ فى الدنيا

ربنا يتم نعمته عليكم

كنت دايما بقول لأصحابى ان كل وقت وليه طريقة معينة فى الحب

وكل ما الانسان ينضج بيبقى للحب شكل أعمق

تحياتى ,,

د/عرفه يقول...

ربنا يديم الحب بينكم
ويرزقكم بالزريه الصالحه ان شاء الله
بس انا كنت عايز اشوف القصص القديمه
يبدو ان اللينكات مش سليمه هاتى المواضيع من الارشيف
مش من تحرير الرسايل
متهيألى كده او يمكن المشكله عندى
سلام

عاشقه الرومانسيه يقول...

ربنا يبارك لكم فى بعض يااااااااارب
ويجعله لكى زوج الدنيا والاخره ياحبيبتى

Lady E يقول...

اه يا قلبي
هو ده اللي بيسموه الحب الحب , الشوق الشوق :)

ربنا يباركلكم في بعض ويجعل حياتكم كلها حب ومودة ورحمة

د/عرفه يقول...

السلام عليكم
فى أثناء حديثك وكلامك عن الموضوع
فى الختام ذكرتى
لا أهتم كثيرا إذا لم يتذكر مناسابتنا الخاصه .... أيامنا معا كلها مناسبات خاصه

[e1]

[e2
أظن إن فى الاخر ده روابط لتلك المناسبات الخاصه
ولكنها لا تعمل
هذا ما قصدته

مهندس / على درويش يقول...

أدام الله عليكم نعمه الحب والموده
وجعل أيامكم كلها سعاده وهنا



تحياتي

إيمان يقول...

assafo anaroze
أهلا بمرورك
ربنا يسعد أيامك
دمت بكل ود وسعاده
على فكره رائع موضوع تاريخ الأمازيغ
أنا قرأت جزء ولسه هكمل

إيمان يقول...

hasona
دائما تملك قلما واثقا مميزا
أسعد الله ايامك وسدد خطاك
شكرا للمرور المميز
تقبل تحياتى ووافر تقديرى

إيمان يقول...

أبو على
مش عارفه اقولك ايه بصراحه
ردودك مميزه جدا وبتفحمنى جدا
مشكرين على المرور الرائع
المميز
تعيش وتعلق

إيمان يقول...

norahaty
شكرا للمرور الرقيق
وشكرا للدعاء
تحياتى

إيمان يقول...

aidy العاقله
يسلم فمك والله هم دول الكلمتين اللى كنت عايزه اوصلهم للناس الحب الحلال احلى شئ فى الدنيا
ربنا يسعدك ويكملك بعقلك

إيمان يقول...

د/عرفه
أهلا بيك وبمرورك الكريم
أنا اسفة جدا على اللخبطه
العناوين اللى كانت موجوده
غلطه غير مقصوده
معلش بقه الجهل نور
دمت بكل خير

إيمان يقول...

عاشقه الرومانسيه
ربنا يخليكى ليه
وميحرمنيش من دعواتك الجميله
بحبك فى الله ويارب يحميكى من كل شر

إيمان يقول...

ليدى هانم
ايوه يا ستى هو ده الحب الحب الشوق الشوق
عقبالك يارب ونفرح فيكى قريب جدا جدا
منورررررررررررررره
وليكى وحشه

إيمان يقول...

مهندس / على درويش

تقبل الله منك

ورزقك سعادة الدارين اللهم امين

غير معرف يقول...

الله اكبر
ما شاء الل ولا قوة الا بالله
ربنا يديم سعادتك وفرحك
ويبعد عنك العيون.....

dodda

إيمان يقول...

dodda
منووووووووووووووره
كويس انى شوفت تعليقك
لأنك بجد وحشانى
شكرا لدعائك يا جميل